34
Cathut kâuepnaw konawmnae
Kathutkung: Devit, Abimelek hmalah pathu a kâsak nah ahni ni a hrek teh, a ceitakhai nah sak e la
1 BAWIPA teh pou ka pholen han.
Ama pholennae teh ka kâko hoi pou tâcawt seh.
2 Ka hringnae ni BAWIPA dawk a kâoup han.
Kârahnoumnaw ni a thai awh vaiteh, a lunghawi awh han.
3 Oe BAWIPA teh na pholen khai awh haw.
A min teh rei kâoupkhai awh sei.
4 BAWIPA ka tawng navah, ama ni na thai pouh.
Ka takinae pueng thung hoi na rasa.
5 Ama kakhennaw teh, minhmai a pan awh.
Nâtuek hai kayanae awm mahoeh.
6 Hete mathoe ni a hram teh, BAWIPA ni a thai.
Runae pueng thung hoi a rasa.
7 Ama kataketnaw teh, BAWIPA e kalvantami ni
a teng vah petkâkalup lahoi a tungpup sin awh teh, ouk a rasa awh.
8 Oe, BAWIPA hawinae patek awh nateh khen awh haw.
Ama kâuepnaw teh tami a yawkahawinaw doeh.
9 Oe, a tamikathoungnaw, BAWIPA teh taket awh.
A ma kataketnaw teh voutthoup hoi awm boihoeh.
10 Sendektancanaw patenghai ca hane tawn laipalah
vonhlam hoi ouk ao awh.
Hatei, BAWIPA katawngnaw teh, hnokahawi tawn laipalah,
awm awh mahoeh.
11 Camonaw tho awh haw, ka lawk thai awh haw.
BAWIPA takinae na cangkhai awh han.
12 Apimaw nuenkahawi hoi hring han ka ngai.
Apimaw hnokahawi hmu hanlah hring saw ka ngai.
13 Na lai teh yonnae thung hoi ring nateh,
na pahni hah dumnae lawk dei hoeh nahanlah ring haw.
14 Yonnae cettakhai nateh hawinae sak.
Roumnae tawng nateh pâleih.
15 BAWIPA mit ni tamikalannaw a khet teh,
a hramnae lawk thai hanelah a hnâ a pakeng.
16 BAWIPA minhmai ni hawihoehnae kasakkungnaw hah a taran.
Talai van ahnimouh pou pouknae tâkhawng pouh lah ao han.
17 Tamikalan a hram toteh, BAWIPA ni a thai pouh teh
runae thung hoi a rasa.
18 A lungkareknaw hanelah,
BAWIPA a hnai teh, muitha lungkamathoutnaw a rungngang.
19 Tamikalannaw ni runae moi a kâhmo awh.
Hatei, BAWIPA ni hotnaw thung hoi a rungngang.
20 A hru pueng a ring pouh,
buet touh boehai khoe lah awm mahoeh.
21 Hawihoehnae ni tamikathout thet vaiteh,
tamikalan kahmuhmanaw teh thoebo lah ao awh han.
22 BAWIPA ni a sannaw hringnae hah a ratang teh,
ama kâuepnaw teh buet touh boehai thoebo lah awm mahoeh.