35
A taminaw hanlah BAWIPA ni moipathungnae
Kathutkung: Devit
1 Oe BAWIPA, kai na ka tarannaw hah, taran van haw.
Kai na katuknaw hah tuk van haw.
2 Taisawm hoi bahling lat nateh,
kai kabawp hanelah kangdout haw.
3 Tahroe hai patuem nateh, na kapâleinaw hah ngang haw.
Ka hringnae koe vah na kaie rungngangnae doeh tie dei haw.
4 Ka hringnae la hanelah, kakâcainaw hah kayayeirai hoi awm sak nateh,
runae poe hanlah kakâcainaw hah yawng sak nateh,
lungpout hoi awm sak haw.
5 Kahlî ni vaikong palek e patetlah awm awh naseh.
BAWIPA e kalvantami ni koung kahmat lah pâlei naseh.
6 Ahnimouh ni a dawn awh e lamthung teh, kahmot e,
ka pâhnan e lam lah awm naseh.
Hawvah, BAWIPA e kalvantaminaw ni pâlei naseh.
7 Bangkongtetpawiteh, a khuekhaw awm laipalah,
ka kâman nahanelah arulahoi tamlawk a yap awh toe.
A khuekhaw awm laipalah, ka bo nahane tangkom a tai awh.
8 Pouk laipalah ahnimouh teh rawk awh naseh.
Arulahoi tamlawk a yap awh e dawk amamouh kâman awh naseh.
Amamae tangkom dawk amamouh bawt awh naseh.
9 Ka hringnae heh BAWIPA dawk a lunghawi vaiteh,
a rungngangnae dawk a konawm han.
10 Ka hru pueng ni, BAWIPA nang patetlah apimaw kaawm.
Ahnimouh hlak a tha kaawmnaw thung hoi mathoenaw hah na rasa.
Bokheiyah, mathoe hoi ka voutthoup e hah,
ahnimouh karaphoekung thung hoi na rungngang toe, ati awh han.
11 Kapanuekkhai kaphawk a tho awh teh,
ka panue hoeh e naw hah na pacei awh.
12 Ka muitha lungmathoe sak nahanelah,
hawinae hah thoenae hoi a patho awh.
13 Hatei, kai niteh, a pataw awh navah, buri ka kâkhu,
rawcahai hoi kârahnoum hoi ka o.
Hahoi, ka ratoumnae teh ka lungthin koe letlang a ban.
14 Hui hoi hmaunawngha ka khui e patetlah,
manu hoi ka khui e patetlah ka kâhlai teh ka tabut.
15 Hatei, ahnimouh niteh, ka kangduenae a mathoe toteh,
konawm laihoi a kamkhueng awh.
Na ka tarannaw teh cungtalah a kamkhueng awh teh,
hot hah ka panuek hoeh. Kâhat laipalah, koung na phi awh.
16 Cathutlaipa e naw ni,
pawibu vennae koe na panuikhai awh teh, a hâkam na kata sin awh.
17 BAWIPA nâtotouh maw sut na khet han.
Raphoe hanlah kâcainae thung hoi na rungngang haw.
Sendek koehoi ka hringnae hah hlout sak haw.
18 Ka lentoe e kamkhuengnae koe,
konawmnae lawk hah ka dei vaiteh,
tami moikapap hmalah ka pholen han.
19 Laithoehrawnghrang lahoi ka tarannaw ni kai dawk a konawm hanh naseh.
A khuekhaw awm laipalah, na kahmuhmanaw ni,
na hmaiet hanh naseh.
20 Bangtelah tetpawiteh, roumnae lawk hah dei awh hoeh niteh,
hete ram taminaw duem ao awh lahunnah,
dumnae lawk dueng doeh a dei awh.
21 A pahni na ang sin awh teh,
vehveh, ka mit hoi ka hmu toe ati awh.
22 Oe BAWIPA, het heh na hmu doeh.
Duem awm hanh. Oe BAWIPA, na hlat takhai hanh.
23 Ka Cathut hoi ka BAWIPA,
kai dawk ka phat e lawkceng hane kabawp hanelah,
kâhlaw nateh, thaw haw.
24 Oe BAWIPA, ka Cathut, na lannae lahoi lawk na ceng pouh haw.
Kai dawk a konawm awh nahanh seh.
25 Ahnimouh ni a lung thung hoi
maimae lungngai akuep han toe,
koung payawp awh han toe tet awh hanh naseh.
26 Ka rucatnae dawk a lungkahawi e naw hah, kayak awh naseh.
Kai lathueng kâoupnaw hah kayayeirai hoi awm awh naseh.
27 Ka lannae dawk kanawmkhaikung teh,
lunghawi hoi la sak naseh.
A san dawk a lung ka hawi e BAWIPA teh,
pholen lah awm seh telah pou dei awh naseh.
28 Hahoi, ka lai ni na lannae lawk a dei vaiteh,
kanîruirui nang na pholen han.