36
Tami thoenae hoi Cathut kuepcingnae
Kathutkung: Devit
1 Tamikathoutnaw ni kâtapoenae dawk
ka lungthung hoi ka tâcawt e teh,
ahnimae mit dawk Cathut takinae banghai awm hoeh.
2 A payonnae hmawt hoeh,
panuek hoeh telah, a mithmu vah amahoima
tamikalan lah a kâsak awh.
3 A dei e lawk teh, thoenae hoi dumnae dueng doeh.
Kahawi hno sak hane hoi
lungang hane hah a pahnawt awh.
4 A ikhun van hawihoehnae hah a pouk teh,
kahawihoehe lamthung thama lahoi a dawn teh,
yonnae hah panuet hoeh.
5 Oe BAWIPA na pahrennae teh kalvan ao teh,
yuem na kamcunae ni tâmai koe a pha.
6 Na lannae teh kalen e mon patetlah ao teh,
na lawkcengnae teh ka dungpoung e tui patetlah ao.
Oe BAWIPA, tami hoi saringnaw hah ouk na khetyawt.
7 Oe Cathut, na lungpatawnae teh banghloimaw a sungren.
Hatdawkvah, tami capanaw ni na tâhlip hah a kâuep awh.
8 Na imthung vah, kapap e hnokahawi hoi na boum sak teh,
na konawmnae palangtui na nei sak.
9 Nang koe vah hringnae tuikhu teh ao.
Na angnae dawkvah, angnae hah ka hmu awh.
10 Oe, nang kapanueknaw koe,
na lungpatawnae pou awm na seh,
lungthin kalannaw koe na lannae kamnuek naseh,
11 Kâoupnae khok teh kai taranlahoi
tho nahanh seh.
12 Haw tueng vah, tamitongthoenaw koung a rawp awh toe.
Tâkhawng lah ao awh teh, thaw awh mahoeh toe.