65
Rungngangnae hoi khetyawtnae dawkvah, Cathut pholen
Kathutkung: Devit
1 Oe Cathut pholennae niyah na ring,
lawkkamnae teh nang koe ka sak awh han.
2 Oe, ratoumnae lawk kathaikung,
tami pueng nang koe a tho awh han.
3 Payonnae ni na taran teh, kâtapoenae ni na ka tâ nakunghai,
kaimae yonnae hah nang ni yontha pouh toe.
4 Na thongma dawk ao thai nahan,
nang koe hnai hanlah na rawi e tami yawkahawi e lah ao.
Na im hawinae hoi na bawkim hawinae dawk ka lungkuep han toe.
5 Lannae dawk kângairu hnosak e lahoi na pato han.
Oe ka rungngangnae Cathut,
nang teh talîpui namran lah kaawmnaw hoi, talai poutnae koe kaawmnaw hoi,
6 thaonae hoi kamthoup niteh,
thaonae hoi monnaw kacaksakkung,
7 Ka cairing lahun e talîpui hoi tuicapa ka thaw lahun e hoi,
tamimaya ruengruengtinae karoumsakkung, lah na o.
8 Ahla poungnae koe kaawmnaw nihai,
na mitnoutnae hah a taki awh.
Amom tangmin kaphatnaw koe konawmnae na phu sak.
9 Talai heh na rip teh, kho thouk na rak sak teh,
tui hoi ka kawi e Cathut e palangnaw hah tawntanae hoi na pathoup.
Hottelah, talai heh na pathoup teh,
talai van kaawmnaw a pawhik na rakueng pouh.
10 Laikongnaw hah tui na awi teh, laikawknaw hah na cak sak.
Khotui hoi na nem sak teh, caticamu ka paw e naw hah yawhawi ouk na poe.
11 A kumnaw hah na hawinae hoi na ramuk teh,
na khoknaw ni a thâw a lawi sak.
12 Kahrawng e thingkung ni dik kahringcalah ao teh,
monruinaw hai a lunghawi awh.
13 Pho kahringnaw onae koe saringnaw akawi teh,
ayawn hai rawca kung hoi akawi teh,
konawm laihoi la a sak awh.