66
Hno kalan a sak e dawkvah, Cathut pholen
Kathutkung: Panuekhoeh
1 Talaivan pueng Cathut koe
konawm hoi hram awh haw.
2 A min bari laihoi la sak awh nateh,
ka sungren poung lah pholen awh.
3 Cathut koe, na sak e heh banghloi kângai lah a ru.
Kângairu na sak e dawkvah,
na tarannaw hah nang koe a poe han.
4 Talai van pueng ni, bawk laihoi nang koe pholen la sak awh vaiteh,
na min pholen laihoi la a sak awh han
telah tet awh naseh. Selah.
5 Tho awh nateh Cathut ni sak e naw hah khenhaw.
Tami capanaw hanelah, a sak e naw hah kângairu hanelah ao.
6 Ama ni talîpui hah talai kaphui lah a coung sak teh,
talîpui dawk khok hoi a cei awh.
Hawvah ama dawk a konawm awh.
7 A thaonae hoi pou a uk, A mit hoi miphun pueng hah a khet.
Tarankathawnaw teh kâphokâlen awh hanh naseh. Selah.
8 Oe tamimaya, maimae Cathut teh pholen awh haw.
Pholennae lawk heh thai kamcu lah sak awh.
9 Kahringnaw koe maimouh hringnae hah a kuet teh,
maimouh kamthui hane hai na pasoung hoeh.
10 Bangkongtetpawiteh, Oe Cathut, nang ni na tanouk teh,
ngun tanouk e patetlah na tanouk.
11 Tamlawk hoi na man teh,
kaimae loung dawk hnori hah na patue.
12 Kaimae lû dawk tami na kâcui sak teh,
hmai hoi tuikalen hah na raka.
Hatei, kakuep e tawntanae hmuen koe na hrawi.
13 Hmaisawi thuengnae hoi kathâw e saring hoi
hmuitui tuca hoi na im dawk a kâen han.
14 Hat hateh, runae ka kâhmo navah,
ka pahni hoi ka dei e patetlah ka pâpho tangcoung e doeh.
15 Hmaisawi thuengnae dawkvah,
kathâw e saring hoi hmuitui tuca hoi ka poe vaiteh,
maitotan hah hmae hoi ka poe han. Selah.
16 Cathut ka taket e pueng, tho awh nateh thai awh haw.
Ka hring nahanelah a sak e hah na pâpho pouh vai.
17 Ka pahni hoi ama koe ka hram teh,
ka lai hoi ama teh ka tawm.
18 Ka lungthin ni payonnae hah noutna hoeh pawiteh,
Bawipa ni na thai pouh mahoeh.
19 Hatei, Cathut ni na thai pouh katang teh,
ka hramnae lawk hai kahawicalah a thai.
20 Ka ratoumnae pahnawt hoeh niteh,
kai koehoi a lungmanae ka puen hoeh e,
Cathut teh pholen lah awm seh.