71
Rungngangnae lungsong Cathut
Kathutkung: Panuekhoeh
1 Oe BAWIPA, nang doeh na kâuep.
Kaya hoi na awm sak hanh.
2 Na lannae hoi na rungngang nateh, na hlout sak haw.
Kai koe lah na hnâpakeng nateh na rungngang haw.
3 Kai ni pou ka pâtam teh ka onae lungsong lah awm haw.
Kai rungngang hanelah kâ na poe teh,
kaie lungsong, kaie rapan lah na o.
4 Oe ka Cathut, tamikathout kut dawk hoi thoseh,
tamikalanhoehe hoi tamitongthoe kut dawk hoi thoseh,
na rungngang haw.
5 Bangkongtetpawiteh, oe Bawipa Jehovah,
nang teh ka camo nahoi na kâuep e lah na o.
6 Pek ka khe hoi na kuet teh,
nang teh anu von thung hoi na ka lat e lah na o.
Nang teh pou na pholen han.
7 Tami moikapap kângai karusakkung lah ka o.
Hatei, nang teh kacake kânguenae doeh.
8 Ka pahni teh nang pholennae hoi akawi teh,
hnintangkuem nange pholennae hoi kawi naseh.
9 Ka matawng toteh na hnoun hanh lah a.
Ka tha a youn toteh na cettakhai hanh lah a.
10 Bangkongtetpawiteh, ka tarannaw ni na pathoe awh.
Kai thei han a ngai awh dawkvah, pouknae a kâpoe awh teh, na pawp awh.
11 Cathut ni a ceitakhai toe.
Pâlei awh nateh man awh.
Bangkongtetpawiteh, ka rungngang hane awm hoeh telah ati awh.
12 Oe Cathut, na hlat takhai hanh.
Oe ka Cathut, karanglah na kabawm haw.
13 Ka hringnae ka tarannaw hah kayayeirai hoi rawknae koe phat awh naseh.
Runae poe hanlah kakâcainaw hah pahuipalamnae hoi
yeiraiponae ni ramuk awh naseh.
14 Hatei, pou ka ngaihawi vaiteh,
hoehoe ka pholen han.
15 Ka pahni ni na lannae a dei vaiteh,
na rungngangnae heh hnintangkuem a hramkhai han.
Bangkongtetpawiteh, a lungmanae parei teh baw thai hoeh.
16 Bawipa Jehovah, thaonae dawk ka cei han.
Na lannae nange lannae dueng doeh ka dei han.
17 Oe Cathut, ka camo nah hoi na cangkhai toe,
Atu totouh kângairu hno na sak e hah ka pâpho.
18 Sekatha taminaw hoi ka tâcawt hane naw koe na thaonae hoi
na hnotithainae ka pâpho hoeh roukrak,
ka matawng teh ka sam a po toteh, Oe Cathut na cettakhai hanh.
19 Oe Cathut, na lannae hai a rasang poung.
Oe Cathut, hnokalen kasakkung, nang patetlah
apimouh ouk kaawm va.
20 Kalen ni teh ka patawpoung e runae
na kâhmosakkung nang ni na roung sak nateh,
kadung poung e talai thung hoi bout na rasat haw.
21 Ka tawntanae na pung sak vaiteh,
lung bout na pahawi han.
22 Tamawi hoi na pholen han.
Oe Cathut, yuemkamcu lah na onae hah ka pholen han.
Oe Isarel e Kathoung Cathut,
ratoung hoi la sak laihoi na pholen han.
23 Nang pholen laihoi la ka sak toteh,
ka pahni teh a lunghawi katang han.
Na ratang e ka hringnae hai a lunghawi han.
24 Ka lai ni hai kanîruirui pout laipalah na lannae a dei han.
Bangkongtetpawiteh, runae poe hanlah kakâcainaw hah
lungpout laihoi yeiraipo sak lah ao toe.