72
Messiah uknae Bawilennae hoi lentoenae
Kathutkung: Solomon
1 Oe Cathut, na lawkcengnae heh siangpahrang poe nateh,
na lannae hah siangpahrang capanaw hanelah hrueng pouh haw.
2 Ahni ni na taminaw hah lannae hoi lawkceng vaiteh,
nange karoedengnaw hah
3 Monnaw ni tamimaya koe roumnae poe vaiteh,
monruicanaw ni lannae hah na poe awh han.
4 Ama ni ka mathoe e tamimaya koe kângingnae thokhai vaiteh,
ka voutthoup e catounnaw hah rungngang vaiteh,
rep kacuengroenaw hah a rek awh han.
5 Kanî hoi thapa a kangning roukrak,
tami kâkuen e pueng ni nang teh na taki awh han.
6 Ama teh pho kahring va hoehnahlan e kho ka rak e patetlah thoseh,
talai kakawkkung kho a rak e patetlah thoseh a kum han.
7 Ama se nah teh, tamikalannaw kâroe vaiteh,
thapa ao roukrak teh, lungkuep roumnae ao han.
8 Ama ni talîpui avanglah hoi avanglah totouh,
talîpui koehoi talai pout totouh a uk han.
9 Kahrawngum vah kho kasaknaw ni
a hmalah tabawk awh vaiteh,
a tarannaw ni vaiphu hah a palem awh han.
10 Tarshish ram hoi tuilum siangpahrangnaw ni,
hno poe hane sin awh vaiteh,
Sheba hoi Seba siangpahrangnaw ni hai
poehnonaw hah a poe awh han.
11 Bokheiyah, siangpahrangnaw pueng,
a hmalah tabawk awh vaiteh,
miphun pueng ni a thaw a tawk awh han.
12 Bangkongtetpawiteh, kavoutthoupnaw a hram awh toteh, a rungngang han.
Mathoenaw hoi kabawmkung ka tawn hoeh naw hai a kabawp han.
13 Mathoe hoi voutthoup naw hah pahren vaiteh,
voutthoup hringnae hah a rungngang han.
14 Repcoungroenae hoi kaisuenae thung hoi
a hringnae ratang vaiteh,
a thipaling teh a mithmu vah ka sungren poung e lah ao han.
15 Ama teh a hring vaiteh, Sheba sui hah ama koe poe lah ao han.
Ratoumnae hai ama koe pou poe lah awm vaiteh,
hnintangkuem pholen lah ao han.
16 Ram dawk cakang moi awm vaiteh,
monsom e a pawhiknaw hah Lebanon patetlah kâhuen vaiteh,
khothung e taminaw teh,
talai phokahring patetlah a kâhuet awh han.
17 A min teh a yungyoe roum mahoeh toe.
Kanî a ang roukrak a min ao yungyoe han.
Ama dawk ayânaw ni yawhawi hmawt awh vaiteh,
miphun pueng ni tami yaw kahawi e ati awh han.
18 BAWIPA Cathut, Isarel Cathut,
kângairu hno kasakkung dueng pholen lah awm lawiseh.
19 A min sungren teh a yungyoe pholen lah awm naseh.
Talai abuemlah a sungrennae hoi
kawi lawiseh. Amen hoi Amen.
20 Jesi Capa Devit ratoumnae a pout toe.