73
Tamikathout poutnae hoi BAWIPA kâuep yawhawinae
Kathutkung: Asaph
1 Cathut teh Isarel hane hoi lungthin
kathoungnaw hanelah ahawi tangngak.
2 Hatei, kai raitat meimei ka rawp teh,
meimei ka thawn toe.
3 Bangkongtetpawiteh, tamikathoutnaw e
yawhawi ka hmu navah, kakaisuenaw hah ka ut toe.
4 Ahnimouh teh a due awh hoehroukrak
patawnae khang awh hoeh, a tha pou ao awh.
5 Ayânaw patetlah runae dawk awm awh hoeh,
ayânaw patetlah kuekluek pataw awh hoeh.
6 Hatdawkvah, kâoupnae teh awi lah a awi awh teh,
rektapnae khohna hah a khohna awh.
7 A thâw awh lawi vah, a mitkatueng awh.
A pouk awh e hlak ka paphnawn a tawn awh.
8 Repcoungroenae hah a panuikhai awh teh,
kâoupnae lawk a dei awh.
9 A lawk dei e ni kalvan totouh a taran teh,
a lai ni talai pueng a katin.
10 Hatdawkvah, a taminaw teh ahnimouh koe a ban awh teh,
tui moikapap e hah koung a nei awh.
11 Bangtelah hoi maw Cathut ni a panue.
Lathueng Poung dawk panuenae ao maw telah ati awh.
12 Khenhaw! hetnaw heh Cathut ka bari hoeh e,
banghai pouk laipalah ka hring e lah ao awh teh,
hoehoe a tawnta awh.
13 Ka lungthin kathoung sak nakunghai,
atangcalah cungkeihoeh.
Yon thuengnae lahoi ka kut ka pâsu nakunghai cungkeihoeh.
14 Hnin tangkuem tarawknae hoi
amom karoitawi yuenae doeh ka khang.
15 Hottelah ka dei han ka tet pawiteh,
khenhaw! na catounnaw koe torei teh,
tamikalan hoeh lah kaawm han.
16 Hetheh, thaipanuek nahanelah ka pouk torei teh,
hothateh kai hanelah ka pataw katang e lah ao.
17 Cathut hmuen kathoung koe kâen toteh,
ahnimouh poutnae heh ka thaipanuek katang toe.
18 Ahnimouh teh pâhnannae koe na ta teh,
rawkphainae hmuen koe na tâkhawng.
19 Oe, bangtelah, tawkkadek dawk rawknae koe louk a pha awh vaw.
Takitho e ni koung louk a ca awh vaw.
20 Kâhlaw toteh, karum mang patetlah,
Bawipa na pâhlaw toteh,
ahnimae meikaphawk hah na pacekpahlek pouh han.
21 Hot patetlah ka lungthin a pataw teh,
ka pouknae hai a ru.
22 Panuenae ka tawn hoeh e hoi tamipathu lah ka o teh,
na hmalah saring patetlah doeh ka o.
23 Hatei nakunghai, nang koe pou ka o teh,
aranglae kut dawk na kuet pouh.
24 Na mae kâpankhainae lahoi lam na hrawi teh,
hathnukkhu bawilennae hah na coe pouh.
25 Kalvan vah nang laipalah apimouh ka tawn.
Talaivan hai nang laipalah,
ka ngai e alouke awm hoeh toe.
26 Ka takthai hoi ka lungthin teh a tâwn.
Hatei, Cathut teh, a yungyoe hoi
ka lungthin thaonae hoi ham lah ao.
27 Bangkongtetpawiteh, nang hoi kâhlat e teh,
kahmat awh roeroe han doeh.
Nang koe kâyawt e pueng teh raphoe lah ao han.
28 Hateiteh, kai hanelah teh Cathut hnai e heh ahawi.
Na sak e hno pueng heh ka kamnue sak thai nahanlah,
Bawipa Jehovah dawk doeh ka kâuep toe.