89
Cathut lawkkam
Kasakkung: Ethan
1 BAWIPA lungmanae teh la hoi pou ka sak han.
Yuemkamcu lah na onae teh se pueng dawk
ka pahni ni a pholen han.
2 Lungmanae teh a kangning.
Yuemkamcu lah na onae teh kalvan roeroe vah,
acak telah ka dei toe.
3 Ka rawi e koevah lawk ka kam toe.
Ka san Devit koe thoe ka bo toe.
4 Na catoun hah pou ka caksak han.
Na bawitungkhung hah se pueng dawk
kangdue sak han. Selah.
5 Oe BAWIPA, kalvannaw ni kângairu lah
na onae hah a pholen awh teh,
tamikathoungnaw kamkhuengnae koe
yuemkamcu lah na onae hai, a pholen awh han.
6 Bangkongtetpawiteh, kalvan vah BAWIPA hoi
bangnue thai e apimouh kaawm.
Athakaawmnaw thung dawk
BAWIPA patet e ao han na ou.
7 Tamikathoungnaw kamkhuengnae koe Cathut teh,
lentoe poung lahoi taki hanelah ao.
A tengpam e tami pueng ni a bari awh hanelah ao.
8 Oe, kalvan ransabawi Cathut BAWIPA,
nang patetlah athakaawm ao nama,
Oe, BAWIPA, yuemkamcu lah na onae ni koung na kalup.
9 Talîpui tuicapa ka thaw e hai na uk teh,
tuicapa a thaw teh na roum sak.
10 Tami ni taran a thei e patetlah,
Rahab hah na raphoe teh, koung na kayei.
Na taran hah na kut thaonae hoi koung na pâlei.
11 Kalvannaw hah nange lah ao teh,
talai hai nange doeh.
Talaivan hoi a thung kaawm e pueng hah na kangdue sak toe.
12 Atung aka heh na sak e lah ao teh,
Tabor hoi Hermon teh na min dawk a konawm.
13 Athakaawme kutbuembue hah na tawn.
Na kut heh a tha a sai teh aranglae
kut teh hoe a rasang.
14 Lannae hoi kângingnae teh,
na bawitungkhung kamtuenae lah ao teh,
lungmanae hoi lawkkatang teh na hmalah a cei.
15 Lunghawinae kamthang ka thai e teh,
tami yawkahawi e doeh.
Oe BAWIPA, ahnimouh teh na minhmai
angnae dawk kho a sak awh.
16 Na min dawkvah hnintangkuem a lunghawi awh teh,
na lannae dawkvah tawm lah ao awh.
17 Bangkongtetpawiteh, nang teh ka sungren e
a thaonae lah na o.
18 Bangkongtetpawiteh, BAWIPA teh maimae
bahling lah ao teh, Isarelnaw e Kathoung E,
maimae siangpahrang lah ao.
19 Hottelah, na tamikathoung koe kamnuenae lahoi
lawk na dei teh, athakaawme hah kabawp teh,
tamimaya thung hoi rawi e teh ka pholen.
20 Ka san Devit hah ka hmu teh,
kathounge satui hoi ka awi toe.
21 Ka kut hoi kacaklah ka kuet vaiteh,
ka kutbuembue ni a tha ao sak han.
22 Taran ni na dum thai mahoeh,
tami ni patawnae na poe thai mahoeh.
23 Ama ka tarannaw hah a hmalah ka parawp vaiteh,
ama kahmuhmanaw hah ka hem han.
24 Ama koe yuemkamcu lah ka onae hoi,
lungmanae teh pou ao han.
Ka min kecu dawk a ki hah tawm lah ao han.
25 A kut hai talîpui dawk ka ta vaiteh,
aranglae kut hah palangpui dawk ka ta han.
26 Ama ni kai koe vah, nang teh apa ka Cathut,
ka rungngangnae lungsongpui lah
na o telah a hram han.
27 Ama teh ka camin lah ka coung sak vaiteh,
talai siangpahrang ka rasang poung lah ka coung sak han.
28 Ka lungmanae hoi pou ka ring vaiteh,
ahni koe ka lawkkam teh kacaklah a kangdue han.
29 A catoun hai yungyoe ka kangning sak vaiteh,
a bawitungkhung hai kalvan
a kangning roukrak ka kangning sak han.
30 A canaw ni ka kâlawk a kamlang takhai awh teh,
ka lawkcengnae patetlah awm laipalah,
31 ka phunglam a tapoe awh teh,
kaie kâpoelawknaw tarawi awh hoeh pawiteh,
32 Kâtapoenae dawk sumtaboung hoi ka rek vaiteh,
payonnae dawk ka hem awh han.
33 Hatei, ka lungmanae teh
ahni koehoi koung ka lat pouh mahoeh.
Yuemkamcu lah ka onae hah
ayawmyin lah ao hane ka pasoung hoeh.
34 Ka lawkkam ka raphoe mahoeh,
ka pahni dawk hoi ka tâcawt e lawk heh
ka thung mahoeh toe.
35 Vai touh kaie thoungnae hoi thoe ka bo teh,
Devit koe laithoe ka dei mahoeh.
36 A catoun hah a yungyoe a kangning vaiteh,
a bawitungkhung teh ka hmalah,
kanî patetlah a kangdue han.
37 Thapa patetlah a yungyoe hanelah caksak lah awm vaiteh,
kalvan yuemkamcu panuekkhaikung patetlah ao han. Selah.
38 Hatei, nang ni hnamthun takhai hoi na panuet teh,
satui awi e dawkvah na lungkhuek.
39 Na san hoi lawkkamnae na raphoe teh,
a bawilakhung talai dawk a bo teh
banglah na ngai pouh hoeh.
40 Kalupnae tapangpueng na raphoe teh,
na rapanim hah he na raphoe.
41 Lam dawk ka cet e pueng ni hno a la pouh awh teh,
a tengpam e naw ni a pathoe awh.
42 A tarannaw e kut tha na o sak teh,
a tarannaw pueng hah a lung na tho sak.
43 Ka hran e tahloi hah na ban sak teh,
tarantuknae koe na kabawm hoeh toe.
44 A lentoenae hah na pout sak teh,
a bawitungkhung hah talai dawk na tâkhawng pouh.
45 A nawsainae tueng na duem sak teh,
yeirai hni hah na kâkhu sak.
46 BAWIPA bangkong ngailawi na o han.
Pou na kâhro han maw.
Na lungkhueknae teh hmai patetlah
pou a kaman han maw.
47 Ka tueng a duemnae hah na pahnim pouh hanh.
Bangkongtetpawiteh, tami catounnaw hah
cungkeihoeh lah na sak.
48 Apipatet mouh duenae kâhmo laipalah ka hring thai.
Phuen thaonae dawk hoi kârungngang thai e apimouh kaawm.
49 BAWIPA, Devit koe thoe na bo e
ahmaloe e lungpatawnae teh, nâne ao toung.
50 BAWIPA, na sannaw pathoe lah a onae pahnim hanh.
Athakaawme tami moikapap ni pathoenae hah kai ni ka khang.
51 Oe BAWIPA, na taran ni na pathoe teh,
satui awi e a cei nah pueng koe a pathoe awh.
52 BAWIPA teh a yungyoe hoi a yungyoe
pholen lah awm lawiseh.
Amen hoi Amen.