90
Cathut e tami Mosi ratoumnae
Kasakkung: Mosi
1 BAWIPA nang teh se pueng dawk
ka onae doeh.
2 Montamnaw na sak hoehnahlan,
talai hoi talai hnonaw na sak hoehnahlan hoi,
nang teh a yungyoe hoi a yungyoe e Cathut lah na o.
3 Tami teh rawkphainae koe na ban sak teh,
tami canaw ban awh leih na ti.
4 Bangkongtetpawiteh, na mithmu vah
kum 1,000 touh heh kaloum
tangcoung e paduem patetlah ao teh,
tangmin buet touh patetlah ao.
5 Ahnimouh teh tuikalen patetlah na loum sak teh,
vai touh muet ka ip e patetlah na o sak.
Amom e phokahring ka nâw e patetlah doeh ao.
6 Amom vah dikhring lah a nâw teh,
tangmin lah tâtueng lah ao teh a kamyai awh.
7 Bangkongtetpawiteh, na lungkhueknae lahoi
rawkphainae koe pha awh toe.
Na lungkhueknae lahoi na pakhi awh toe.
8 Ka payonnae teh na hmalah thoseh,
ka hro awh e yonnae teh,
na minhmai angnae koe thoseh, pheng dan lah ao.
9 Bangkongtetpawiteh, ahninnaw teh
na lungkhueknae dawk a loum awh teh,
ka kumnaw teh cingounae dawk ka baw sak awh.
10 Hringyung teh kum 70 touh doeh.
Thao dawkvah, kum 80 touh hai a pha thai.
Hatei, kum sawnae teh,
thatawnnae hoi lungmathoenae lah doeh ao.
Bangkongtetpawiteh, tang a loum teh
maimouh hai tang due awh.
11 Na lungkhuek thaonae heh apinimouh a panue.
Na lungkhueknae heh taki han totouh apinimaw a taki.
12 Hottelah lungangnae lungthin
tawn thai awh nahanelah,
ahnintha pareinae na cangkhai haw.
13 Oe BAWIPA, bout ban haw.
Nâtotouh maw na o han.
Na sannaw heh pahren haw.
14 Ka hringyung thung ka lunghawi awh teh,
kanawm thai awh nahanelah,
na lungmanae hoi karanglah lung na kuep sak haw.
15 Hno kathout hmonae kum pueng hoi,
na rektapnae hninthapa pueng hah
ka lunghawinae lah coung sak haw.
16 Na sak e hah na sannaw koe kamnue sak nateh,
na bawilennae teh a canaw koe kamnuek naseh.
17 BAWIPA Cathut na lunghawinae teh,
kai koe awm naseh.
Ka kut ni a tawk e naw teh, maimouh hanlah cak seh.
Ka kut ni a tawk e naw teh, caksak lah awm lawiseh.