91
Cathut hmalah pou o e doeh roumnae
Kasakkung: Panuekhoeh
1 Lathueng Poung ni nguenae hmuen koe kaawm e teh,
Athakasaipounge a tâhlip dawk ao han.
2 Ama teh ka kânguenae hoi ka rapanim,
ka Cathut, ka kâuep e lah ao,
telah BAWIPA hah ka dei han.
3 Ama ni karap dawk hoi thoseh,
lacik kathout dawk hoi thoseh na rungngang han.
4 A rathei hoi na ramuk vaiteh,
a rathei rahim na lung a mawng han.
A lawkkatang teh na lungmawngnae bahling lah ao han.
5 Karum lae runae hoi khodai lae
pala hai na taket mahoeh.
6 Khohmo nah ka tho e lacik na taket mahoeh,
kanîthun ka tho e rawkphainae hai na taket mahoeh.
7 Na teng vah thong touh kamlet niteh,
aranglah thong hra touh kamlet nakunghai,
nang koe hnai mahoeh.
8 Na mit hoi khen nateh,
tamikathoutnaw ni a kâhmo awh e teh,
na hmu han doeh.
9 BAWIPA teh kânguenae lah ao telah na dei teh,
Lathueng Poung dawk na o nahanelah na sak dawkvah,
10 thoenae banghai nang koe phat mahoeh.
Na onae koe lacik kathout tho mahoeh.
11 Na lamthung pueng khenyawnkung lah,
kalvan taminaw hah kâ a poe han.
12 A kut hoi na tawm vaiteh,
na khok hoi talung na kamthui mahoeh.
13 Sendek hoi hrunthoe van na luen vaiteh,
Sendek hoi khorui hah na khok hoi na coungroe han.
14 Ahni ni na lungpataw dawkvah,
kai ni ka rungngang han.
Ka min a panue dawkvah ka tawm han.
15 Na kaw toteh ka pato han.
Runae a kâhmo toteh, ahni koe ka o vaiteh,
ka rungngang vaiteh, ka bari han.
16 Hringsawnae hoi a lung ka kuep sak vaiteh,
ka rungngangnae hah ka pâtue han.