41
1 ओळतेन होयो मानुस मेसे मोंदिरोन धोड़े ली गोयो, आरु हेरा दुयो ओख्येन खांबाक मापीन छोव छोव हात चोवड़ा, यो ते तोम्बुन चोवड़ाय होती।
2 झोपलान चोवड़ाय दोस हातोन होती, आरु झोपलान दुयो ओख्येन भितड़ा पांच पांच हातोन होता; आरु होतो मोंदिरोन नांबाय मापीन चाळीस हात कोर्यो, आरु हेरी चोवड़ाय वीस हातोन होतोन होती।
3 तोत्यार होयो धोड़े जायीन झोपलान खांबाक माप्यो। होरीक झोपलान खांबा दुय हात जाडा होता। ये छोव हात उचा होता। झोपला सात हात चोवड़ा होता।
4 तोत्यार होयो मानुस कोपरान नांबाय माप्यो। यो वीस हात नांबो आरु वीस हात चोवड़ो होतो। इचमा वाळा कोमराम भोरायने सी पेहेल होतो। चो मानुस कोयो, यो बेसको चुखलो जागो छे।
मोंदिरोन कोपरा
5 तोत्यार होयो मानुस मोंदिरोन भितड़ाक माप्यो। यो छोव हात चोवड़ो होतो। आड़े धोड़ेन कोपरा च्यार हात चोवड़ा मोंदिरोन च्यारु मेर होता।
6 यो खोयड़ेन कोपरा तीन मोंजील्या होता; होरीक मोंजील पोर तीस कोपरा होता। आड़े धोड़ेन कोपरा च्यारु मेर भितड़ा पोर टेकायला होता। मोंदिरोन भितड़ो आपसो आपसात कोपरा पोर टेकाड़लो नी होतो।
7 मोंदिरोन आड़े धोड़े जे कोपरा खोयड़े होता, हेनुम सी जे उपोर होता, चे जादा चोवड़ा होता: भोवोनोन आड़े धोड़े जो काहिन बोनलो होतो, चो जोसो जोसो उपोर चोहोड़तो गोयो तोस तोसो चोवड़ो होयतो गोयो; एने रीते, एना घोरोन चोवड़ाय उपोर भेनी वोदती गोयली, आरु मानसे नेचली मोंजिलोन इचमा उपेरली मोंजिल मा चोहड़ सोकतेला।
8 हांव मोंदिरोन आड़े धोड़े उचोत जागो देख्यो, आरु खोयड़ेन कोपरान उचाय जुड़ लोगुन छोव हात उची होती।
9 खोयड़ेन कोपरा जुगु जो भितड़ो होतो, चो पांच हात जाडो होतो, आरु जो जागो ठारलो रोय गोयलो होतो, चो भोवोनोन खोयड़ेन कोपरान जागा होतो।
10 खोयड़ेन कोपरान इचमा इचमा भोवोनोन आड़े धोड़े वीस हातोन गावु होतु।
11 खोयड़ेन कोपरान झोपला हेना जागान ओख्ये होता, जे ठारला होता, एक झोपलो बोखेवरे भेनी आरु दिसरो दोखेवरे भेनी होतो; आरु जो जागो रोय गोयो, तेरी चोवड़ाय च्यारु मेर पांच पांच हातोन होती।
बुडेनले भेनिन मोंदिर
12 ओळी जो भोवोन मोंदिरोन बुडेनले भेनि ओगोळ होतो, चो सोत्तोर हात चोवड़ो होतो; आरु भोवोनोन आड़े धोड़ेन भितड़ो पांच हात जाडो होतो, आरु हेरी नांबाय नोब्बे हातोन होती।
मोंदिरोन आखी मापाय
13 तोत्यार चो मानुस मोंदिर काजे माप्यो। मोंदिर सोव हात नांबो होत। भोवोन आरु ऐरो भितड़ान आंगनो वी सोव हात नांबो होतो।
14 मोंदिरोन उगेनलो मुख आरु आंगनान सोव हात चोवड़ाय होती।
15 ओळी होयो पोछला आंगनान ओगोव वावा भितड़ान नांबाय जेरे दुयुछ्ये छोज्जा होता, मापीन सोव हातोन होती; आरु माहतेला भोवनोन आरु आंगनान ओसारोक वी माप्यो
मोंदिरोन सोजावोट
16 तीनो पोरुत च्यारु मेर जाळी वाळी खिड़किया लागली होती। मोंदिरोन च्यारु मेर पोयड़ी सी लागली, फोरसी सी खिड़किया लोगुन लाकड़ान च्यार खुट्या लागली होती। खिड़किया ढाकायली होती।
17 ओळी होयो झोपला उपोरुन जागान धोड़ेन भोवोन लोगुन आरु हेरे खोयड़े वी आरु आड़े धोड़ेन आखा भितड़ान माहाय आरु खोयड़े वी माप्यो।
18 हेरेम कोरुब आरु खोलेलान झाड़ोन ओसा घोड़ला होता कि दुय दुय कोरुबोन इचमा एक एक खोलेलान झाड़को होतो; आरु कोरुबोन दुय दुय मुय होता।
19 ओस कोरीन सी एक एक खोलेलान एक ओख्ये मानुसोन मुख बोनावलो होतो, आरु दिसरे ओख्ये जुवान नाहारन मुख बोनावलो होतो। इने रिते आखा भोवोनोन च्यारु मेर बोनलो होतो।
20 भिमा गोथो लागाड़ीन झोपला उपोर लोगुन कोरुब आरु खोलेलान झाड़ गोंदला होता, मोंदिरोन भितड़ो एने रीते बोनलो होतो
लाकड़ान वेदी
21 भोवनोन झोपलान खांबा च्यार खुट्या होता, आरु चुखला जागा ओगोळोन रुप मोंदिर सारको होतो।
22 वेदी काठोन बोनली होती, आरु हेरी उचाय तीन हात, आरु चोवड़ाय दुय हातोन होती; आरु हेरा खुना आरु हेरो आखो पाट आरु ओलंगे वी काठोन होता। चो मारे सी कोयो, यो ते योहोवान ओगोळ मेज छे।
चुखला जागान झोपलो
23 मोंदिर आरु चुखला जागान झोपलान दुय दुय किवाड़ होता।
24 आरु आखा किवाड़ मा दुय दुय वोवने वाळा पोल्ला होता, होरीक किवाड़ जुगु दुय दुय पोल्ला।
25 जोसो मोंदिरोन भितड़ो कोरुब आरु खोलेलान झाड़ गोंदलो होतो, तोसोत हेरा किवाड़ मा वी होता, आरु ओसारेन खोयड़ा ओख्ये लाकुड़ धारोन जाडी जाडी होती
26 ओसारेन दुयु ओख्ये झोळो झोळो कोरे ओसी खिड़किया होती आरु खोलेलान झाड़े गोंदला होता; आरु भोवोनोन खोयड़े कोपरा आरु जाडी जाडी धारोन वी होती।