42
मोंदिरोन धोड़े बोनला दुय कोपरा
1 ओळी होयो मेसे खोयड़े आंगनाम बोखेवरे भेनी ली गोयो, आरु मेसे हेनु दुय कोपरान चां लायो जे भोवोनोन आंगना ओगोळ आरु हेरा बोखेवरे भेनी होतो।
2 सोव हातोन छेटोस बोखेवरे झोपलो होतो, आरु चोवड़ाय पोचास हातोन होती।
3 माहातेला आंगनान वीस हात ओगोळ आरु बाहरता आंगनान फोरसीया ओगोळ तीन मोंजीलो छोज्जा होता।
4 कोपरान ओगोळ माहेयतेले ओख्ये जानेवाळा दोस हात चोवड़ी एक वाट होती; आरु एक हात भोरीन एक आरु वाट होती; आरु कोपरान झोपला बोखेवरे भेनी होता।
5 उपेरला कोपरा नाना होता, छोज्जान कारण होये नेचला आरु इचमा वाळा कोपरा नानास होता।
6 काहाकी होये तीन मोंजिलो होतो, आरु आंगनान सारको हेंदरा खांबा नी होता; इने रीते उपरेला कोपरा नेचला आरु इचमा वाळा कोपरा सी नानास होता।
7 जे भीतड़ा कोपरान खोयड़े हेंदरे धोड़े होता कोपरान ओगोळ खोयड़ेन आंगना भेनी होता, हेरी नांबाय पोचाय हातोन होता।
8 काहाकी बाहरला आंगनान कोपरा पोचास हात नांबो होतो, आरु मोंदिरोन ओगोळ अलंग सोव हातोन होतो।
9 ऐनु कोपरान नेचो उगेनले ओख्ये वाट होती, जां मानसे खोयड़े आंगनाम सी एनाम जाता होता।
10 आंगनान भीतड़ान चोवड़ाय मा उगेनले ओख्ये ओलोग जागु आरु भोवोनोन दुयोन ओगोळ कोपरा होता।
11 हेंदरे ओगोळ वी एक वाट होती। चे बोखेवरे भेनीन कोपरान तोसा होता। हेंदरे बोराबोरुत हेंदरी नांबाय चोवड़ाय होती। हेनुम वी तोसोत निकोळनेन वाट होती। हेंदरा झोपला वी तोसात होता। हेंदरो ढोंग वी बोखेवरेन कोपरान सारकोत् होतो।
12 दोखेवरेन कोपरान नेचो, उगेनले भेनी वी भोरायनेन वाट होती, जां सी मानसे कोपरान ओगोळ वाळी वाट पोर चोहोड़ता होता। ओगोळ एक ओलोग भीतड़ो होतो।
13 ओळी होयो मारे सी कोयो, यो बोखेवरे आरु दोखेवरेन कोपरान आंगनान ओगोळ छे, होयेत चुखला कोपरा छे, जेरेम योहोवान धोड़े जानेवाळा पुजारान बेस चुखलो सोमान खाया कोरसे, होये बेसको चुखलो, आरु ओननबादा, आरु पापनबादा, आरु गुनानबादा, होयेत राखसे; काहाकी होयो जागो चुखलो छे।
14 जोत्यार जोत्यार पुजारा मानसे माहाय जासे, तोत्यार तोत्यार निकोळनेन टेमे होये चुखला जागाम सी खोयड़े आंगनाम ओसात नी निकोळसे, चे पेहेल आपसी सेवा चाखरीन छिंदरा चुखला जागाम मेक देसे; काहाकी ये कोपरा चुखला छे। तोत्यार होये दिसरा छिंदरा पेहरीन दिसरा मानसोन जागाम जासे।
मोंदिरोन खोयड़ेन जागान मापती
15 मोंदिरोन माहायतेला जागाक मापतीन वाद मा मेसेक उगेनला झोपला सी खोयड़े ली गोयो। होयो होंया च्यारु मेर मोंदिरोन बाहरला जागाक मापने लाग्यो।
16 होयो मापनाय वासुन सी उगेनली काकोड़ काजे माप्यो। तेनी वासुनोन ओनसारे हेरी नांबाय पांच सोव हात नांबी निकळी।
17 होयो बोखेवरे छिवन्याक माप्यो। यो पां सोव हात नांबो होतो।
18 होयो दोखेवरे छिवन्याक माप्यो। यो पांच सोव हात नांबो होतो।
19 होयो बुडेनले ओख्ये च्यारु मेर गोयो आरु इनाक माप्यो। यो पांच सोव हात नांबो होतो।
20 होयो मोंदिरोन च्यारु मेर गोथो माप्यो। भितड़ो मोंदिरोन च्यारु मेर गोयलो होतो। भितड़ो पांच सोव हात नांबो आरु पांच सोव हात चोवड़ो होतो। यो चुखला जागाक विटोळ जागा सी आंगे कोरतेलो।