7
आकान क पाप
1 पुन इसराएलीया नाश करनेन चीज न वाराम धुको कर्या; यहुदा गोत्र क आकान, जो जेरह ओवलियादी जब्दी क पुतन्यो आरु कर्म्मी क पोर्यो हता, उका ने अर्पण क चीज मा सी काहय ली लेदा; एका कारण योहोवा भगवान क रीश इसराएलीया पर भड़क उठ्या।
2 योहोसु योरीहो सी ऐ नावन नगर क पास, जो बेतावेन सी लागलु बेतेल उगवनी वोगे छे, काहय मानसक यो कईन मोकल्या, “जाईन देश क बेद ले आरु।” आरु उना मानसक जाईन ऐ का भेद देदा।
3 आरु हेको योहोसु क साथे वापस फिरीन आवीन कया, “सब लोग चा नी जाय, कुई दुय तीन हजार मानसे जाईन ऐ गाव क जीत सकता छे; सब मानसक चा जानेन कष्ट मा आपु, काहकी चा मानसे थुड़ाज छे।”
4 एरकरता कुई तीन हजार मानसे चा गया; पुन ऐ गाव मा रयने वाळा क सामने सी डासीन आया,
5 तव ऐ गाव क रहने वाळा उनामा सी कुई छत्तीस मानसे मार नाख्या, आरु आपना फाटक सी शबीराम तक उनाक पछव करिन उतराई मा उनाक मारता गया। तव लोगहन क मन पिघवाळीन पाणी जोसो बन गयो।
6 तव योहोसु आपना छिंदरा फाड़े, आरु चा आरु इसराएली डाहला लोगहन योहोवा क सन्दुक क सामने मुहयन बुरसे पड़ीन धरती पर सांजु तक पवड़ा रवे; आरु हेको आपना आपना मुनका पर धुवु नाखी।
7 आरु योहोसु कयु, “हाय, पोरबु योहोवा, तु आपनी ओका प्रजा क यरदन नदी पार काय ली आयु? काय आमुक एमोरिया क वश मा करिन नष्ट करने क करता ली आया छे? वारलो हतो कि आमु संतोष करिन यरदन नदी क तीन पार रय जाता!
8 हाय, पोरबु हाव काय कयो, जव इसराएलीया आपना दुश्मन क वाहँ दिखाड़े छे!
9 काहकी कनानी वरन् ओका देश क सब निवासी यो सोमवीन आमुक घेर लेसे, आरु आमरो नाव धरती पर सी मिटाळ नाखसे; पछु तु आपना मोटा नावन करता काय करसे?”
10 योहोवा योहोसु सी कया, उठ, उबो रय जा, तु काह ओका भाति मुयक बल धरती पर पड़े छे?
11 इसराएलीया पाप कर्या छे; आरु जी वाचा हाव उका सी आपने साथ बंधाई हती उकाह हेको तुड़ देदा छे; हेको अर्पण करी चीज मा सी ली लेदा, वरन् चुरी भी करी कि आरु छल करिन उकाह आपने समान मा मेक देदा छे।
12 ओका कारण इसराएलीया आपना दुश्मन क सामने उबा नी रय सकता; चा आपना दुश्मन क वाहँ देखाड़ता छे, एरकरता कि चा खुद अर्पण करी चीज बन गया छे। आरु कदाम तु आपने वीच मा सी अर्पण करी चीज क सत्यनाश नी कर नाखसे, ते हाव ओगव क तुमरे साथे नी रवो।
13 उठ, लोगहन क चुखलो कर, ओकाह कय, सोंदारे रक आपने आपसु क चुखलो कर मेक; काहकी इस्राएल क परमेश्वर योहोवा यो कयतो छे, “हे इस्राएल, तार वीच मा अर्पण करली चीज छे; एरकरता जव तक तु अर्पण करली चीज क आपने वीच मा सी सेठी मा करे तव तक तु आपना दुश्मन क सामने उभु नी रय सकतु।”
14 एरकरता सोंदारे क तु गोत्र गोत्र क अनसारे सामने उबा कर्या जासे; आरु जा गोत्र क योहोवा धरे चु एक एक कुल करिन नाट आवे; आरु जा कुल क योहोवा धरे चो घराना घराना करिन नाट आया; पछा जा घराना क योहोवा भगवान धरे चु एक एक मानुस करिन नाट आया।
15 तव जु मानुस अर्पण करी चीज मेकली सापड़ी जाय, चा आरु जो काहय उकान होय सब आग्ठा मेकीन धोपाड़ देदलो जाय; काहकी उको योहोवा क वाचा क तुवड़ो छे, आरु इस्राएल मा अनुचित काम कर्या छे।
16 योहोसु सोंदारे उठीन इसराएलीया क गोत्र गोत्र करिन सामने ली गया, आरु यहुदा क गोत्र धोराय गयो;
17 तव उको यहुदा क परिवार क सामने कर्या, आरु जेरह ओवलियादिया क कुल धोराय गयो; जेरह ओवलियादिया क घराना क एक एक मानस क सामने लाया, आरु जब्दी धराय गयो;
18 तव उको उकाह घराना क एक एक मानस क सामने उबा कर्या, आरु यहुदा गोत्र क आकान, जु जेरह ओवलियादी जब्दी क नातन्यो आरु कर्म्मी क पोर्यु हतु, धराय गयो।
19 तव योहोसु आकान सी कयने लाग्यो, “हे मार पोर्या, इस्राएल क परमेश्वर योहोवान मोहिमा कर, आरु ओकान ओगव अंगीकार कर; आरु जो काहय तु करलु छे चो मखे कय दे, आरु मखे सी काहय मा धोपाड़े।”
20 आकान योहोसु क उत्तर देदु, “सचमा हाव इस्राएल क परमेश्वर योहोवा क विरुध्द पाप कर्यु छे, आरु ओका प्रकार हाव कर्यु छे,
21 कि जब मखे लुट मा शिनार देश क एक सुन्दर ओढ़ना, आरु दुय सोव शेकेल चाँदी, आरु पचास शेकेल हुनान एक इटळो देखाय पड़्यो, तव हाव ओकान लालच करिन हेको मेक देदा; चा मार पड़ावन माहयता धरती मा गावड़ा छे, आरु सब क नेड़ी चाँदी छे।”
22 तव योहोसु थुड़ाक लोगहन क मकल्यो, आरु त्या उना पड़ाव मा दौड़ी पड़्या; आरु काय देख्या कि चा चीजे उकान पड़ाव मा गावड़ा छे, आरु सब नेड़ी चाँदी छे।
23 उकाह हेका पड़ाव मा सी निकाळीन योहोसु आरु सब इसराएलीया क साथ लावीन योहोवा क सामने मेक देदा।
24 तव सब इसराएलीया समेत योहोसु जेरह ओवलियादी आकान क, आरु उका चाँदी आरु ओढ़ने आरु हुनान इटळो क, आरु ओकान पोर्या-पोराय क, आरु उकान बयलीय, गदड़ा आरु गाडरा-बुकड़ा क, आरु उकान पड़ाव क, मतलब जा काहय ओकान हतो उना सब क आकोर नावन तराई मा ली गया।
25 तव योहोसु ओकाह कयो, “तु आमुक काह कष्ट आप्यु छे? आजुन दाहड़े योहोवा भगवान तुखे कष्ट आपसे।” तव सब इसराएलीया उका पर पथराव कर्या; आरु उका आग्ठा मा नाखीन धोपाड़्या, आरु उकान उपर दगड़ा नाख देदा।
26 आरु हेको उकान उपर दगड़ा क ढिग लागाड़ देदा जो आज तक बवनो छे; तव योहोवा क भड़कलो रीस शांत होय गयो। ओका कारण उका जागा क नाव आज तव आकोर तराई पड़ गयो।