3
Yolŋuny maṉḏa ŋunhi buthuru-djaw'yunmin Garraywu, bala gärrinan yätjkurrulilnydja romlil (The Disobedience of Man)
Genesis 3.1-24
1 Yo. Godthu ŋunhi djäma bukmaknha warrakan'nhany mala ŋäthil, yurr waŋganynhany ŋunhi ŋayi djäma ŋuliŋuryi malaŋur bulun gaḏamannha, mayali'-dharrwanhan, yurr yäkuny ŋayi ŋunhiyi Moḻ'ŋu.
Waŋganymirr ŋunhiyi miyalk marrtjin, bala ŋayiny ŋunhi Moḻ'ŋuny bunanan nhanŋu, ŋuriki miyalkku, bala waŋanan ŋanya, bitjarrnha dhä-birrka'yurrnydja gam': “Way! Godtja nhumalaŋ yaka'yurr muka?...dhiyakuny gay'yi borumguny malaŋuw ḻukanharaw?...ŋunhi marrtji ŋorra dhuwal retjaŋur?” bitjarr.
2 Bala ŋayiny ŋunhi miyalktja waŋan bitjarr, “Dhuwal dharrwa borumdja bawalamirriŋur dharpaŋur ḻukanharawnydja,
3 yurr dhiyakuny gay'yi, waŋganyguny dharpaw ŋayi God waŋan yaka'yurr bitjarr gam': 'Ŋuli nhe dhu ḻuka dhipuŋuryiny dharpaŋur borum, ga yan ŋayathamany dhuwal dharpany, nheny dhu dhiŋgaman,' bitjarr.” Ga bitjarr ŋayiny miyalkthuny lakaraŋal.
4 Bala ŋayiny waŋan ŋunhi Moḻ'ŋuny bitjarr, “Yaw! Dhuwaliny yaka yuwalk! Nyäḻ'yurr warray muka?” bitjarr. “Yaka nhe dhu dhiŋgam. Dhuwaṉḏja manymak borum.
5 Ŋayin ŋunhi Godnha nhumalaŋ yaka'yurrnydja bitjarryiny, bili ŋayi ga dharaŋan dhuwalatjaṉḏhin ŋunhi nhe dhu ḻukany, nheny dhu dharaŋana, bulun dhu gaḏamaṉḏhirr, bitjan nhakun God ŋayipi yan. Ŋuli nhe dhu ḻukany, nheny dhu mirithirra dharaŋan bukmaknhan romnha, ŋamakulinhan romnha, ga djarrpi'nhan.” Ga bitjarr ŋayi ŋuriŋiyi Moḻ'ŋuy lakaraŋal ŋurikal miyalkkalnydja.
6 Bala ŋayi ŋuriŋi miyalkthuny nhäŋala gan rumbi'yurra ŋunhiyi borumdja, bala nhanukal maŋutjiŋurnydja manymakthinan ŋunhiyi borumdja, bala ŋayi yan ŋoy-ŋapu'yurra, märr ŋayi dhu bulun gadamaṉḏhirr ḻiya. Bala ŋayi gulkthurra ŋunhiyi borumdja, bala ḻukanan. Ḻukanany ŋayi, bala ŋayi wiripuny gurrupar nhanukiyingalaŋuwnha ŋayi dhuway'mirriŋuwnha, bala ŋayiny muka ḻukan.
7 Yo. Ga ŋunhiyi maŋda ḻukanany, märr-yuḻkthurra manapar Godnhan ŋunhi ŋayi waŋan maṉḏaŋgal yaka'yurr ḻukanharaw ŋurikiyi borumgu. Ga dhunupan dhurrwaraŋur ḻukanhaŋurnydja maṉḏany dharaŋarnha; nhänhaminany maṉḏa warraŋulnha, bala goranan maṉḏaŋguwuy maṉḏa. Bala maṉḏa gulkmaraŋalnha marwaṯnha dharpany bala djäman girrin' dhurrthurryunminyarawnha maṉḏaŋguwuy maṉḏa.
8 Ga balanyamirriyyin munhawun maṉḏa ŋäkula Godnhan rirrakay, ŋayi gan marrtjin ŋuliwitjarryi retjakurr. Ŋäkulnydja maṉḏa, bala waṉḏinan djuḻuḻ'yurra nhanukal, retjalila gulŋiyin.
9 Yurr ŋayiny Garraynydja wäthurr nhanŋu ḏirramuwnydja bitjarr, “Way, wanha dhika nhe yulŋuny?”
10 Bala ḏirramuny waŋanan buku-roŋanmaraŋalnha bitjarr, “Dhuwal ŋarra. Ŋäkul warray nhuna ŋarra rirrakaynydja, bala ŋarra barrarinan nhuŋu, bala waṉḏinan ŋarra djuḻuḻ'yurra nhokalaŋuŋur, bili warraŋulnha ŋarra dhuwal yulŋuny,” bitjarr.
11 “Yo yoy! Yolthu nhuŋu dhuwal lakaraŋal warraŋulthinyarawnydja?” bitjarr ŋayi God waŋan ŋurikal ḏirramuwal. “Dhuwaṉḏja nhe ŋunhiyin borumnha ḻukan muka?...ŋunhi ŋarra nhuŋu yaka'yurr ŋurikiyi ḻukanharaw?” bitjarr.
12 Ga ŋayiny ḏirramuny buku-bakmaraŋal Godku bitjarr, “Ŋuruŋ dhuwal miyalkthu ŋarraku gurrupar, ŋunhi nhe djäma ŋanya ŋarraku. Ŋayi ŋarrany gurrupar, bala ŋarrany yurrnha ḻukan,” bitjarr.
13 Ga buluny ŋayi waŋan Garray ŋunhi miyalknhan, “Nhaku nhe ŋunhi goŋ-djarryurrnydja?” bitjarr. Ga ŋayiny maŋutji-gäŋal ŋanyanhan ŋunhi Moḻ'ŋunhan, “Ŋuruŋ dhuwal ŋarrany mayali'-gäŋal Moḻ'ŋuy, bala ŋarra ḻukanan,” bitjarr.
14 Bala ŋayi Godthu waŋan Moḻ'ŋunhany bitjarr gam', “Ŋarrany nhuna dhu dhuwal dhä-gir'yunna, bili nhe bitjarryi dhuwal. Nhepi dhu ga yan nhina buku-munha'ŋurnydja, wakuluŋgul'mirriŋurnydja romŋur, nhepi waŋgany yan. Dhipuŋurnydja dhurrwaraŋur nhe dhu djuryunna waṉḏirra, dhulmuynha nhokiyingal nhe. Ga ŋathany nhuŋu ḻukanharawnydja dhukun yan.
15 Ga nhumalaŋguny dhu ga nhuŋu ga yolŋuwnydja miyalkku marin yan dhärra; nhokuŋ djamarrkuḻi' ga yolŋuwuŋ djamarrkuḻi' dhu ga bunhamirra yan. Yolŋuynydja nhuna dhu muḻkurr wuṯthun, binydjitjkum, ga nheny dhu ŋanya ḻäwum ḻuku,” ga bitjarr ŋayi God waŋan Moḻ'ŋunhany.
16 Bala ŋayi bilyurra Godtja, ga waŋan miyalknhany bitjarra gam': “Dhipuŋurnydja dhurrwaraŋur nheny dhu galŋa-yätjirra yothuwalnha gänharay rerriy, ga ŋuliwitjaṉḏja ŋunhi dhu yothu dhawal-guyaŋa, bala nheny dhu mirithirra rirrikthun. Yurr bäydhi, nheny dhu ga djälthirr yan nhokalaŋaw nhe dhuway'mirriŋuwnydja. Ga ŋayin dhu ŋurruŋun nhuŋu.”
17 Ga ŋuliŋurnydja ŋayi God waŋan ŋurikalnha ḏirramuwalnha, yäkuny ŋayi ŋunhiyi Adam, ga bitjarr ŋayi God waŋanany nhanŋuny gam', “Nheny märraŋal warray nhuŋuwuy nhe miyalknha dhäruk, bala ḻukanan ŋunhiyi, ŋunhi ŋarra waŋan yaka'yurr ŋurikiyi. Bili nhe bitjarryiny buthuru-djaw'yunminan ŋarrakalaŋuwnha dhärukku, dhuwaṉḏja dhu munathany wäŋa mariynha monygum, wakuluŋgul-mirriyirra dhu. Nhe dhu ga djämany mirithirra yan, bitjanna bili nhe dhu djämany ga mirithirra, ŋuthanmaramany nhuŋuwuy nhe ŋathanhany, gänan nhuŋuwuynha nhe,
18 bili nhäŋiniŋ'nha ga ŋula nhäny mulmun dhu ga ŋuthaṉḏja munatha'ŋurnydja, mei-manapanmirra. Ga ŋunhan diltjipuynha ŋathany nhe dhu ga ḻukany.
19 Yo, djämany nhe dhu mirithirra yan, galŋa-ŋundurr'yundja, munatha'nhany buḻŋu'kum djäma, märr dhu ga ŋunhiliyi munatha'ŋur ŋatha mala ŋuthanna. Djämany nhe dhu ga-a-a, yan bili-i-i ga dhiŋgam nhe dhu, balayi munatha'yirryi. Yo. Bili ŋarra nhuna djämany beŋur munatha'ŋur, ga balayi nhe dhu munatha'yirryi.”
Ga bitjarr ŋayi God waŋanany lakaraŋalnydja dhä-gir'yunarawnydja, bili maṉḏa bitjarryiny ŋunhi buthuru-djaw'yunminany, bala gärrinan yätjkurrulila romlil.
20 Bala ŋayi ḏirramuynydja yäku nhirrpar nhanŋuwuy ŋayi miyalknha Evenha, bili ŋayiny ŋunhi ŋäŋdi'mirriŋu bukmakkun ŋilimurruŋgun yolŋu'yulŋuwnha, dhiyakun dhuwal ga nhina bukmak-ŋur wäŋaŋur ḻiw'maraman.
21 Ga ŋuliŋuryiny ŋayi Godthu bumar warrakan'nha, bala yan märraŋala barrwaŋ'tja, bala djäma girrin' maṉḏaŋ, dhurrthurryunaraw Adamgu ga nhanu-kalaŋuw miyalkku.
22 Ga ŋuliŋuryiny dhurrwaraŋur God waŋan bitjarr, “Dhiyaŋiyiny ga ḏirramuy dharaŋanna dhiyaŋuny bala, bitjanna nhakun ŋilimurrnha, marŋgin ŋayiny yätjkurruw ga ŋamakuliw romgu. Bala dhipuŋurnydja dhurrwarŋur ŋayi dhu ga yolŋu bäyŋu nhina walŋa-weyindja, gupaḏalnydja; yakan ŋayi dhu ḻuka ŋunhiyi Walŋa-gurrupanamirrinhany borumnha.”
23 Bala ŋayi Godthuny djuy'yurra dhawatmaraŋala ŋanya ŋunhiyi ḏirramunhany beŋur retjaŋurnydja, ga ŋunna gali'ŋura ŋayi gan djämany munathany ŋunhi ŋayi maḻŋ'thurr beŋuryi munatha'ŋur.
24 Yo. Godthu ŋaŋ'ŋaŋdhurra yolŋunhany maṉḏany, dhawatmaraŋala ŋuliŋur retjaŋumydja Yedanŋur. Bala ŋayi Godthu nhirrparnydja djiwarr'puynhan yolŋunhany ŋunhiwiliyiny dhurrwaralilnydja retjalil gali-dhimurruŋurnydja, gunganharaw ŋurikiyiny retjawnydja. Ŋayi gan dhärranhany ŋunhiyi djiwarr'puynydja yolŋu goŋ-yiki'mirr, yurr yikiny' ŋunhi balanyan nhakun ŋäṉarr gurtha, bitjanan bili ŋuli ganha djaḻkarr'yunan bala rälin, märr dhu yakan ŋula yol yolŋu marrtjiny ŋuliwitjaṉḏhi, ga yakan dhu ŋula yol galkithirr ŋurikalyiny dharpawal Walŋa-gurrupanamirriwalnydja.