3
Nayawmiy dhukarr-djäma Ruthgu
1 Waŋganymirrnydja waluy, ŋayi Nayami waŋan nhanŋu Ruthgu bitjarr: Bilin dhuwal waluny nhuŋu nhe dhu maḻŋ’maraman nhuŋuwuy nhe ḏirramunhan, ŋunhi dhu ŋayi gurrupan nhuŋu wäŋa ga djäga ŋayi dhu ga nhuŋu manymakkum gänan.
2 Bilin nhe gan dhuwal wapmaraŋalnydja ŋathany malany maŋutjiny, nhuma rrambaŋi ŋuriŋiwurruy miyalkkurruwurryu djämamirriy mala nhanukal Bawatjkal, ga marŋgi nhe ŋunhi ŋayi Bawatjtja limurruŋ galkipuy gurruṯumirr. Gäthurnydja munhawu ŋayi dhu ŋunhala wäŋaŋur, ŋunhi walal ŋuli ga ŋathan mala maŋutjin ganaŋ’maram beŋur yaŋaraŋura mala, wuthu-wuthunna bitjanna ŋathan mala maŋutjin burrul’maram, ga dhukun-djalkthunna.
3 Nheny dhu ḻupthun ḏarrtjalkunhamirr ga bäw’yu djurryunmirr, ga nhirrpul nhuŋuwuy nhe latju’ mirithirr girri’, bala yan marrtjin balayin ŋunhi wanhal ŋayi dhu ga djäma. Yurr gayulnha yakan ŋayi dhu nhuna nhämany, ga bäy ŋayi dhu dhawar’yun beŋur ŋathaŋur ḻukanhaŋur ga borum wiyika wayinŋur ḻukanhaŋur.
4 Ga nhäŋuny ŋanya gi dharr’ biyak wanhal ŋayi dhu ŋorra, ga ŋunhi nhanŋu dhu yakurrnydja buna, bala ŋorrany ŋayi dhu, nheny yanan marrtjin bala yan yäkthurra girrin nhanukal ḻukuŋurnydja bala ŋorrin dhurrthurryunmirra ŋunhiliyin ḻukuŋura nhanukal. Bala ŋayin dhu buluny lakaram nhaltjan nhe dhu djäma.
5 Bala ŋayiny Ruthdja buku-bakmaraŋal nhanŋu Nayawmiwnydja bitjarra, “Ŋarrany dhu djäman bala yan nhaltjan nhe dhu lakaram ŋarraku.”
6 Bala yan ŋayi Ruthdja marrtjinan balayin ŋunhi wanhal gan Bawatjthu djäma, bala yan ŋayi dhunupan djäman bala yan ŋunhi nhaltjarr gan Nayawmiy nhanukal lakaraŋal.
7 Ga bäy ŋayi Bawatj dhawar’yurr ŋathaŋur ḻukanhaŋur ga ŋänitji’ŋur ga leŋun ŋayi, bala ŋayi marrtjinan, bala yan ŋorranan galki ŋatha mala maŋutji gan yep-nhirrpanmin ŋorran, ŋunhilin ŋayi Bawatjtja ŋorranany. Ga ŋayiny bäy warray Ruthdja gayulnha marrtjin balayi nhanukal, bala yan yäkthurra girrin nhanukal ḻukuŋurnydja Bawatjkalnydja, bala yan dhurrthurryunminan ŋorranan ŋunhilin ḻukuŋura nhanukal.
8 Ga balaŋ guwaḻyu munhay, bala ŋayiny Bawatjtja yan rur’yurra, bala yan ṉirr’yurra nhäŋal ŋanya miyalknhany ŋayi gan ŋorran ḻukuŋur nhanukal.
9 Bala yan ŋayi Bawatjtja dhä-birrkayurr ŋanya bitjarra, “Yol nhe dhuwal?” “Ŋarra dhuwal Buŋgawa Ruth! Nheny muka ŋarraku dhuwal gurruṯumirr ŋunhi dhu ga djägany ŋarraku. Ma! Biyakun ŋarrany dhurrthurryurra dhiyaŋi nhokal girriynydja, ” bitjarr ŋayiny Ruthdja buku-bakmaraŋal.
10 Ga ŋayiny Bawatjtja bitjarr warray waŋan nhanŋuny Ruthguny gam’, “Garrayyu märr guŋga’yunamirr dhu nhokal! Dhiyaŋuny ga mel-lakaram nhokal gandaynydja, ŋunhi nheny dhuwal yuwalknha yan ŋayaŋu-ḏapmaranhamirra yolŋu nhokalaŋaw galkipuywuny gurruṯumirriw mala. Dhuwal balaŋ nhe ŋula yuṯaw ḏirramuw ḻarrunha ḻukunydjaw wo ŋurru-wuykku, märr balaŋ ŋayin nhuna märranha miyalkkunhany. Yurr nheny bäyŋu warray bitjanayi djäma.
11 Yurr yaka warwuyurr, ŋarrany dhu djäman bala yan, nhakun nhe ga dhuwali ŋaŋ’thun. Bili nhunanhany ga dhuwal bukmakthun warray nhäma manykum dhiyal yindiŋur wäŋaŋur.
12 Yo! Yuwalk warray yulŋuny, ŋunhi ŋarra dhuwal waŋganydja yolŋu gurruṯumirr nhumalaŋ djägamirrnydja, ŋunhi balaŋ ŋarra gi djägany nhumalaŋ. Yurr dhikayyi ga wiripu nhina yolŋu ŋunhi ŋayi mirithirra galki nhuŋu gurruṯumirr, ga djägamirr.
13 Dhiyal ŋathil ŋarrakal gi nhini, ga bäy ŋayi dhu djaḏaw’yun, bala ŋarra dhu maḻŋ’maraman, wanha balaŋ ŋayi gi yuwalk djälthi djägaw nhuŋu. Ga balaŋ ŋayi gi yakany djälthi djägaw nhuŋu, ŋarrany ga dhuwal dhawu’-nhirrpana yäkuynydja nhanukala God-Waŋarrwala ŋunhi ŋayi walŋa ga nhina, ŋunhi ŋarrany dhu ŋarrapin djäma. Gatjuy nheny balayi roŋiyi ŋorranhalil, ga bäy dhu djaḏaw’yun.
14 Bala ŋayiny Ruthdja buluyi ŋorran, yurr rur’yurrnydja ŋayi munhawumirr, ŋayiny bäyŋu yan djaḏaw’yunnany, bili ŋayiny gan Bawatjtja yaka djalthin yolŋuw ŋunhi ŋayi gan nhinan ŋunhiliyi.
15 Bala ŋayiny Bawatjtja waŋan ŋanya ŋayi dhu barrkparrkpunum nhanŋuwuy ŋayi manydjarrka. Bala yan ŋayi rarryurra dhaŋaŋguŋala maŋutji ŋathan bälin, bala ŋal’maraŋala nhanukal ḻambarrlila. Ga ŋunhi ŋayi Ruth roŋiyinany wäŋalilnydja,
16 bala ŋayiny Nayawmiynydja dhä-birrkayurra ŋanya bitjarr, “Ŋunhi Bawatjtja roŋiyinan marrtjin wäŋalilnydja. Nhaltjarra nhuŋu maḻŋ’thurrnydja?” Bala ŋayiny Ruthuny lakaraŋal nhanŋu warrpamthurra.
17 Ga bulu ŋayi bitjarr waŋan gam’, “Bawatjthu gurrupar ŋarrany dhuwal maŋutji ŋatha bäli, bili yaka ŋayi djalthin ŋarraku ŋarra dhu dhäparŋ’ roŋiyirr, ŋany ŋathamirr yan nhuŋu.
18 Nayawmiy buku-bakmaraŋal, “Bulnha ŋathil galkunmirr, ga yaka warwuyurr nhä dhu maḻŋ’thun, yaka ŋayi dhu ŋunha ŋir’yunmirr, ga yän bili ga bäy ŋayi dhu djäma warrpamthun yan dhiyaŋ bala, nhä malany rom ŋunhi ga ŋorra.