13
Soopu nyǝntʋ tɔtɔ
1 Mpʋɣʋlɛ Soopu tɑsɑɑ sɩ: Mɑ tɛmɑ nti
mɑ yɔɣɔtǝɣɩ tɔɣɔ nɩɩʋ
nɑ mɑ ŋkpɑŋʋɣʋ, nɑ mɑ́ nɑ-tɩ nɑ mɑ ɩsǝpǝle,
nɑ mɑ́ cɛkǝnɑ-tɩ.
2 Mɑ mɑɣɑmɑɣɑ mɑ nyǝmɑ́ nti
mǝ nyǝmɑ́ mpʋ tɔɣɔ, mǝ tɑ́ tɛɛ-m.
3 Amɑ Tomɑ tǝnɑ tʋ Ɩsɔ kɛ́ mɑ yɔɣɔtǝɣǝnɑ
nɑ mɑ́ hʋlǝɣɩ-ɩ mɑ kʋnyɔŋ.
4 Mǝ kɛ́ ɑcɛsɑɑcɛsɑɑ fɛtɑɑ kɛ́,
pɔpɔtʋ tike kɛ ɩ́ mɑɣɑsǝɣɩ.
5 Ye ɩ́ kɑ sumɑ, ɩ́ kɑ nǝɣǝsǝnɑ
lǝmɑɣɑsɛɛ nyǝ́mɑ ntɛ́.
6 Ɩ́ ke ŋkpɑŋŋ nɑ ɩ́ nɩɩ
mɑ́ kʋnyɔwiinɑ nɑ mɑ kʋyɔɣɔtʋtʋ.
7 Kɑloolɑɣɑ nɑ tɔm kʋkɛkɛɛtʋ
kɛ ɩ́ kɑ́ sɛɛnɑ Ɩsɔ tɔɔ?
8 Ɩsɔ tɔɔ kɛ́ mǝ cɑɑkɩ sɩ ɩ́ sɛɛnɑ?
9 Nɑ ye ɩ feŋɑ-mɛ ɩ kɑ́ sɑ-mɛ?
Ɩsɔ tɑ́ kɛ́ yʋlʋ sɩ pɑ puɣusiɣi-ɩ.
10 Ye mukɑɣɑ tɛɛ kɛ́ ɩ́
sɛɛkǝnɑ ɩ tɔɔ, ɩsɩɩ ɩ kɑlǝnɑ-mɛ.
11 Ɩ sɔsɔɔntʋ ɩɩ tilisiɣi mǝ pʋntʋ nɑ
ɩ tɔm kpɑ-mɛɣɛ sɔɣɔntʋ sɔsɔɔntʋ?
12 Mǝ kʋyɔɣɔtʋtʋ wɛ kɛ́ ɩsɩɩ tɔlʋmɑ.
Nɑ mǝ kʋmɑɣɑsǝtʋ nɑ́ɑ́ wɛɛ ɩsɩɩ cʋɣʋ.
13 Ɩ́ su, ɩ yele nɑ mɑ yɔɣɔtɩ,
ye mɑ tɩɩ tɛmnɑ nti ntǝɣǝlɛ.
14 Mɑ sɔɔlʋ pɩɩwɑɣɑ sɩ ye mpi mpi.
Pɑɑ mɑ weesuɣu lɩɩwɑ.
15 Ɩsɔ ɩ́ nɔkɑɑ ɩ kʋ-m, mɑ tɑ tɑŋ pʋlʋ.
Amɑ mɑ tɔntɛ teu nyɩɩlʋɣʋ kɛ mɑɑ lǝsɩ.
16 Ye pǝ tɩɩ lɑpɑ mpʋ pǝ wɑɑsɑ-m kɛ́.
Mpi tɔ, ɩsɑɣɑʋ ɩɩ kpǝtǝɣǝnɑ Ɩsɔ.
17 Tɔʋ, ɩ́ ke ŋkpɑŋŋ kɛ teu
nɑ ɩ́ nɩɩ mɑ kʋyɔɣɔtʋtʋ.
18 Mɑ sɔɔlʋ pɩɩwɑ sɩ mɑ lǝsǝɣɩ mɑ tɩ nyɩɩlʋɣʋ.
Mɑ nyǝmɑ́ sɩ mɑ tɔm tenɑ.
19 Ye nɔɣɔlʋ cɑɑ sɩ ɩ hʋʋnɑ-m,
ɩlɛ mɑ su nɑ mɑ́ sɩ́.
20 Hɑɩ, mɑ Ɩsɔ,
yɑɑsinɑɑ nɑɑlɛ tike kɛ mɑ cɑɑ ń lɑ-m,
nɑ nyɑ́ kiŋ sǝŋʋɣʋ ɩ́ tɑɑ lɑ-m kɑtɛ.
21 Kʋsɩ nyɑ́ niŋ kɛ mɑ tɔɔ,
nyɑ́ sɔɣɔntʋ ɩ́ tɑɑ lɑ-m kɑtɑtǝlɑɣɑ.
22 Ɩlɛnɑ ń pɔɔsɩ-m nɑ mɑ́ cɔ-ŋ,
yɑɑ mɑ́ yɔɣɔtɩ nɑ nyɑɑ cɔ-m.
23 Ɩsɑɣɑtʋnɑɑ ɩsǝnɑɣɑ mɑ lɑpɑ?
Hʋlɩ-m mɑ tǝpǝntǝlɛ.
24 Pepe tɔɔ kɛ́ nyɑ́ ɩsɛntɑɑ tɑ́ hɛtǝnɑ-m,
nɑ ń nyǝnǝɣɩ-m ɩsɩɩ nyɑ́ kolontu?
25 Anɩ mɑ wɛ kɛ́ ɩsɩɩ kɑɑwʋlɑɣɑ,
yɑɑ nyɩɩliyɑ ŋkɑ heelim kpɑkǝɣɩ tɔ,
nɑ ń tɔɣɔnǝɣɩ-m?
26 Pǝ tɑɣɑ pʋlʋ, n ŋmɑɑkɩ mɑ tɔm ɩsɑɣɑtʋ
nɑ ń fɛlǝɣɩ-m mɑ pǝcɑɑtʋ kʋpǝntǝŋ suwe?
27 N tʋ-m nkeɣelee suwe,
nɑ ń feŋiɣi mɑ kʋlɑpǝlɛ?
Nɑ ń ŋmɑɑkɩ mɑ nɔntɑɑlǝŋ wei
mɑ fɛlɑ kɑnyǝŋɑ tɑɑ tɔɣɔ tɑkǝlɑɣɑ tɑɑ.
28 Nɑ mɑ tɔnʋɣʋ nɑ́ɑ́ tɑsǝɣɩ ɩsɩɩ tɑɑʋ,
yɑɑ ɩsɩɩ ŋkpɑm mʋʋkʋɣʋ wontu kʋsusuutu tɔ.