14
Soopu nyǝntʋ tɔtɔ
1 Yʋlʋ pǝyɑɣɑ weesuɣu wɛ kɛ́ tǝtopi,
nɑ kʋ́ nɑ cɔɔsɛɛ kɛ kʋtɑmsɑ.
2 Ɩ lɩɩkɩ kɛ́ ɩsɩɩ tʋɣʋ hɛ́tʋ́ɣʋ́ nɑ ɩ́ lontili,
nɑ ɩ́ mʋkɩ kpɑkpɑɑ ɩsɩɩ ɩsotom.
3 Ɩsɔ nn kʋsǝɣɩ ɩsǝlɛ kɛ mɑ tɔɔ.
Pǝyele ń yɑɑkɩ-m hʋʋlɛ.
4 Wulee nɔɣɔlʋ lǝsɑ kʋpɑm kɛ ɩsɑɣɑm tɑɑ?
Pʋntʋ fɛɩ.
5 Anɩ Ɩsɔ tɛmɑ yʋlʋ ɩsɔtʋnɑɑ kɛ kɑlʋɣʋ
nɑ ɩ́ sɩɩ ɩ kʋyɛɛŋ.
Ɩsɔ n tɛmɑ yʋlʋ weesuɣu tǝnɑɣɑ kɛ pɩɩʋ ɩ kɑɑ ŋmɑɑ kɑ tɔɔ.
6 Pǝ tɔɔ tɔ, kʋsɩ nyɑ́ ɩsǝlɛ kɛ yʋlʋ tɔɔ nɑ ɩ́ hɛɛsɩ,
nɑ ɩ lɑŋlɛ tɩɩ hʋlʋmɩ, ɩsɩɩ ɑpɑɑ tʋ kɛ tɑɑnɑɣɑ.
7 Tʋɣʋ wɛnɑ tɛɛlʋɣʋ kɛ́, ye pɑ sɛtɑ-kʋ,
kʋ nɛɣɛtɩ nɑ kʋ́ hɛlǝɣɩ piliŋɑsɩ kʋfɑsɩ.
8 Pɑɑ kʋ lilɑ kpɑtǝlɑ tɛtʋ tɑɑ, nɑ kʋ kite sɩ́.
9 Ye kʋ nɩɩwɑ lʋmɑɣɑ tɑŋ kʋ
tɑɣɑnǝɣɩ nɛɣɛtʋɣʋ kɛ́ nɑ
kʋ́ hɛlɩ piliŋɑsɩ kʋfɑsɩ ɩsɩɩ tiikɑ.
10 Amɑ yʋlʋ sǝkɩ kɛ́, nɑ ɩ tomɑ sɩɩ tǝnɑɣɑ.
Ye ɩ tisɑ feesuɣu, ɩ wɛ le tɔtɔ?
11 Teŋku lʋm pǝsǝɣɩ nɑ pǝ́ pɑsɑ,
nɑ pusi nyǝm nɑ́ɑ́ nyɔɔ nɑ sɩ́ wʋlɩ.
12 Mpʋ tɔtɔɣɔ yʋlʋ kɑ́ hǝntɩ, ɩ kɑɑ tɑsɑ kʋlʋɣʋ.
Ɩ kɑɑ tɑsɑ fem nɑ pǝ́cɔ́ ɩsɔtɔnʋɣʋ mʋkɩ.
Ɩ kɑɑ kʋlǝnɑ ɩ tom tɔɔ.
13 Ye Ɩsɔ kɑ tisɑɣɑ,
ɩ kɑ ŋmɛsɑ-m ɑtɛtǝlɛ tɑɑ,
nɑ ɩ́ tɑkɩ mɑ tɔɔ, hɑlǝnɑ ɩ́ kʋ́ ɩ pɑ́ɑ́nɑ́.
Ɩlɛnɑ ɩ́ sɩɩ-m sɑɑ wei ɩ kɑ́ tɑɣɑnɩ-m kʋpɑntʋ lɑpʋ tɔ.
14 Ye ɩsɩɩ yʋlʋ kɑ sǝkɑɣɑ nɑ ɩ́ tɑɣɑnɩ
fem mɑɑ wɛ tɑŋʋɣʋ tɑɑ kɛ́ mɑ tǝmlɛ kʋyɛɛŋ tǝnɑ.
Hɑlǝnɑ kʋyɑkʋ ŋku ɩ kɑ́ tɑɣɑnɩ-m kʋsʋɣʋ tɔ.
15 Ɩlɛ wɑɑtʋ wei Ɩsɔ kʋŋmɑŋmɑm mɑ́,
mɑ tɔm kɑ́ nyɩɩlɩ-ɩ nɑ ɩ́ yɑɑ-m tɔ mɑ kɑɑ cɔ.
16 Amɑ sɑŋɑ ɩlɛ,
Ɩsɔ ɩsǝlɛ kɑɑ wɛɛ mɑ́ mɑ tɔɔ,
nɑ ɩ́ kɑlǝɣɩ mɑ nɔɔhɛɛ.
17 Ɩ suuwɑ mɑ ɩsɑɣɑtʋ kɛ huluɣu nɑkʋlɩ kʋ tɑɑ kɛ́,
nɑ ɩ́ tɑɑlɩ mɑ kɑwɑlɑɣɑ tɔɔ tǝkpɑm.
18 Amɑ ɩsɩɩ pɔ́ɔ́ŋ́ yɔkʋɣʋʋ
nɑ pǝ́ lɑɣɑsǝɣɩ kʋkpɑmǝŋ kɛ lonɑ,
19 nɑ lʋm nɑ́ɑ́ niisiɣi pǝlɛ,
nɑ tɛʋ nɑ́ɑ́ kuuki tɛtʋ tɔ.
Ḿpʋ́ɣʋ́ n wɑkǝlǝɣɩ yʋlʋ tɛɛlʋɣʋ.
20 N tii yʋlʋ tɔɔ kɛ́ nɑ ń wɑkǝlɩ ɩ ɩsɛntɑɑ,
nɑ ń tɔɣɔnɩ-ɩ nɑ ɩ́ tɛɛ nɑ pǝ́ sɑɑlɩ.
21 Pɑɑ yʋlʋ piyɑ nyʋɣʋ kʋlɑɑ
yɑɑ pǝ tʋ-sǝɣɩ fɛɛlɛ yʋlʋ ɩɩ nɑɑkɩ pʋlʋ.
22 Mpi pǝ tɔm yʋlʋ nɩɩkǝnɑ tɔɣɔlɛ
ɩ mɑɣɑmɑɣɑ ɩ tɔnʋɣʋ wʋsɑsɩ nɑ ɩ lɑŋwɑkǝllɛ.