32
1 Ḿpʋ́ɣʋ́ Ɩlifɑsɩ nɑ Pilitɑ nɑ Sofɑɑ, pɑ yelɑ Soopu kɛ cɔʋ kɛ timpi ɩ nyǝnǝɣɩ ɩ tǝɣɩ yʋlʋ kʋpɑŋ tɔ.
2 Ntɛnɑ pɑ́ɑ́nɑ́ hɑŋ Ɩlihu, wei ɩ kɛ́ Pusi kpekǝle tʋ Lɑm lʋlʋɣʋ tʋ Pɑlɑkɛlɩ pǝyɑlʋ tɔ. Mpi tɔ, Soopu tɔŋ sɩ Ɩsɔ nyǝnǝɣɩ ɩnǝɣɩ siɣisilu.
3 Pǝ́ kɑɑsɩ ɩ tɑɑ hɑŋnɑ ɩ tɑɑpɑlɑɑ tooso kɛ́. Mpi pǝ tɔɔ pɑ tɑ pǝsɩ nɑ pɑ́ cɔ Soopu kɛ nɑtǝlɩ tɔ. Pɑɑ nɑ mpʋ, pɑ kʋ́ ɩ tɔm.
4 Ɩlihu kɑ kɛnɑ ɩ tɑɑpɑlɑɑ tɑɑ sǝkpelu. Pǝ tɔɔ kɛ́ ɩ sumɑ nɑ pǝ́ tǝkǝnɑ-ɩ yɔɣɔtɑɣɑ.
5 Ɩ kɔmɑ nɑ ɩ́ nɑ́ sɩ ɑpɑlɑɑ tooso ɩnɩ ɩ lɑŋɑ kʋcɔcɔtʋ, ɩlɛnɑ pɑ́ɑ́nɑ́ hɑŋɩ-ɩ sɔsɔm.
Ɩlihu hʋlǝɣɩ ɩ kʋcɔcɔtʋ kʋtoluɣu
6 Ḿpʋ́ɣʋ́ Ɩlihu tɔmɑ sɩ:
Mɛɣɛ sɔsɑɑ
nɑ mɑɣɑ pǝyɑɣɑ tɔɣɔ mɑ selɑɣɑ sɩ,
mɑ́ tɑɑ hʋlɩ-mɛɣɛ mɑ nyǝmtʋ sɔsɔɔntʋ.
7 Kʋkpɑtǝlɑɑ nɑ mpɑ pɑ pɩɩsɩ tɔɔwɑ tɔ,
mpɛɣɛ pǝ wɛɛ sɩ pɑ́ sɛɣɛsɩ lǝmɑɣɑsɛɛ tɔm.
8 Tɔm tɑmpɑnɑ tɔɔ, feesuɣu ŋku kʋ kɛ́
Tomɑ tǝnɑ tʋ nyǝŋkʋ tɔ, ŋkʋ kʋ wɛnɑ yʋlʋ tɑɑ
nɑ kʋ́ hɑɑkɩ-ɩ nyǝm.
9 Pǝ tɑɣɑ pɩɩsɩ pɑɣɑlɛ tʋɣʋnɑ yʋlʋ kɛ lǝmɑɣɑsɛɛ.
Pǝyele pǝ tɑɣɑ kʋkpɑtǝlɑɑ tike nyǝmnɑ kʋsiɣisim.
10 Pǝ tɔɔ kɛ́ mɑ tɔŋ sɩ, ɩ́ ke ŋkpɑŋŋ
nɑ mɑ́ tɔtɔ, mɑ́ kilisi-mɛɣɛ mɑ nyǝm tɔm.
11 Mɑ́ kemɑ ŋkpɑŋʋɣʋ kɛ mǝ lǝmɑɣɑsɛɛ tɑɑ,
ɩlɛ mɑɑ tɑŋɑɑ kɛ́ sɩ,
mǝ kʋyɔɣɔtʋtʋ ɩ́ tɛ.
Hɑlǝnɑ ɩ́ tɛ mǝ tɔm mɑɣɑsʋɣʋ kɛ teu kɛ hɑtoo mǝ lotu tɑɑ.
12 Mɑ nɩɩ mǝ tɔm kɛ teu kɛ́.
Amɑ nɔɣɔlʋ tɑ kǝlɩ Soopu nɑ tɔm.
Pǝyele nɔɣɔlʋ tɑ pǝsɩ nɑ ɩ́ cɔ Soopu kʋyɔɣɔtʋtʋ.
13 Ɩ́ tɑɑ tɔ sɩ:
Tǝ hikɑ lǝmɑɣɑsɛɛ.
Ɩsɔ tike kɑ kǝlǝnɑ-ɩ, pǝ tɑɣɑ yʋlʋ.
14 Pǝ tɑɣɑ mɑɣɑ Soopu yɔɣɔtɑɑ,
ɩlɛ mɑ kɑɑ cɔ-ɩ mǝ kʋyɔɣɔtʋtʋ.
15 Sɔɣɔntʋ kpɑ-mɛ, ɩ́ lɑŋɑ kʋyɔɣɔtʋtʋ,
ɩɩ tɑsǝɣɩ cɔʋ.
16 Mɑɑ tɑŋɑɑ kɛ́ ɩsɩɩ ɩ́ kɑ́ yɔɣɔtɩ.
Amɑ ɩ́ sumɑ yem nɑ ɩ́ kpisi cɔʋ.
17 Ɩlɛ mɑɑ cɔ nɑ mɑ́ hʋlɩ-mɛɣɛ
nti mɑ hʋʋkɩ tɔ.
18 Tɔm su mɑ lotu kɛ́,
nɑ feesuɣu cɑɑlǝɣɩ-m sɩ mɑ́ yɔɣɔtɩ.
19 Tɔm kpɑɑkɩ mɑ tɑɑ, ɩsɩɩ pɑ suukuɣu sʋlʋm kɛ
pǝ huluŋ kʋfɑŋ tɑɑ, nɑ pǝ́ cɑɑ pǝ yɑsɩ-ɩ tɔ.
20 Mɑɑ kuli mɑ nɔɣɔ kɛ́, nɑ mɑ́ yɔɣɔtɩ,
nɑ mɑ́ cɔ, ɩlɛnɑ pǝ́cɔ́ pǝ́ hɛɛnɑ-m.
21 Mɑ kɑɑ sɛɛnɑ nɔɣɔlʋ tɔɔ,
yɑɑ mɑ́ cɛsɩ mǝ tɑɑ nɔɣɔlʋ.
22 Pǝ tɑɣɑ pʋlʋ, mɑ tɑ nyɩ cɛsʋɣʋ.
Ye mɑ tɩɩ lɑpɑ mpʋ,
mɑ ŋmɑlʋ kɑ́ kɔɔlɩ-m lɔŋ kɛ́.