33
Ɩlihu kʋyɔɣɔtʋtʋ tɔtɔ
1 Ḿpʋ́ɣʋ́ Ɩlihu tɑsɑɑ sɩ:
Pǝnɛntɛ Soopu ke ŋkpɑŋŋ, nɑ ń nɩɩ mɑ kʋyɔɣɔtʋtʋ.
2 Nɔɔnɔɔ mɑ kuliɣi mɑ nɔɣɔ,
nɑ mɑ nsǝmlɛ yɔɣɔtɩ.
3 Hɑtoo mɑ lotu tɑɑ siɣisuɣu tɔm kɛ mɑɑ yɔɣɔtɩ.
Tɑmpɑnɑ siɣisiɣi tike kɛ mɑ nɔɣɔ kɑ́ yɔɣɔtɩ.
4 Ɩsɔ Tomɑ tǝnɑ tʋ feesuɣu ŋmɑnɑ-m,
nɑ kʋ́ hɑɑkɩ-m weesuɣu.
5 Ye n pǝsǝɣɩ n cɔ-m,
tɑɣɑnɩ nyɑ́ tɩ nɑ mɑ́ nɑ-ŋ tǝ́ suli.
6 Ɩsɔ nyǝnǝɣɩ mɑ nɑ-ŋ kɛ́ kʋlʋm kɛ́,
cʋɣʋ tɔtɔɣɔ pɑ ŋmɑnɑ mɑ́.
7 Mpʋ tɔ, tɑɑ nɩɩ mɑ sɔɣɔntʋ nɑ pǝ́ liɣiti-ŋ
nɑ mɑ sɔsɔɔntʋ kǝlɩ-ŋ.
8 Soopu yɔɣɔtɑ mɑ ŋkpɑŋŋ tɑɑ,
nɑ mɑ́ nɩɩ ɩ nɔɣɔ sɩ:
9 Mɑ wɛ tǝnɑŋŋ kɛ́, mɑ tɑ lɑ kɑwɑlɑɣɑ,
yɑɑ ɩsɑɣɑtʋ nɑtǝlɩ kɛ pɑɑ pǝcɔ.
10 Pɑɑ nɑ mpʋ, Ɩsɔ hikiɣi timpi ɩ kɑ́ kɑlǝnɑ-m
nɑ ɩ́ nyǝnɩ-m ɩ kolontu tɔ.
11 Ɩ kɑɣɑtǝɣɩ-m nɑ ɩ́ feŋiɣi
mɑ tɔntɛ tǝnɑ tɑɑ.
12 Soopu, ń fɛɩnɑ tɑmpɑnɑ.
Mpi tɔ, Ɩsɔ kǝlɑ yʋlʋ tǝcɑɣɑcɑɣɑ kɛ́.
13 Pepe tɔɔ kɛ́ n cɑɑ n yoonɑ Ɩsɔ?
Mpi tɔ, yʋlʋ ɩɩ pǝsǝɣɩ nɑ ɩ́ cɔ ɩ kʋyɔɣɔtʋtʋ tǝnɑ.
14 Wulee Ɩsɔ yɔɣɔtǝɣǝnɑ yɑɑsi lɛlʋ kɛ́.
Ɩlɛnɑ wulee ɩ́ yɔɣɔtǝnɑ lɛlʋ.
Pɑɑ nɑ mpʋ yǝlɑɑ ɩɩ lɑkɩ lɑɑkɑlɩ.
15 Wɑɑtʋ wei yǝlɑɑ hǝntǝɣɩ ɑhoo,
nɑ pɑ́ too ɩsɩɩ pɑ sǝpɑ tɔɣɔ
Ɩsɔ yɔɣɔtǝɣǝnɑ-wɛɣɛ pɑ tooseenɑɑ tɑɑ.
16 Ɩ lɩɩkɩ pɑ tɔɔ nɑ sɔɣɔntʋ kpɑ-wɛ,
nɑ ɩ́ yɔɣɔtǝɣǝnɑ-wɛɣɛ pɑ ŋkpɑŋŋ tɑɑ.
17 Ɩlɛnɑ ɩ́ kɛɛ yʋlʋ kɛ ɩ kʋlɑpʋtʋ tɑɑ,
nɑ ɩ́ sɩɩ tǝnɑɣɑ kɛ yʋlʋ kɑlɑmpɑɑnɩ.
18 Ḿpʋ́ɣʋ́ ɩ wɑɑsǝɣɩ yǝlɑɑ kɛ sǝm tɑɑ,
nɑ ɩ́ yɑkɩ-wɛɣɛ nyǝmɑ́ nɔɣɔ tɑɑ.
19 Ɩsɔ kpɑɑlǝɣɩ yʋlʋ nɑ wʋsɑsɩ nsi
sɩ hɩɩsɑ-ɩ nɑ ɩ́ lʋkɩ ɩ tɔnʋɣʋ tɑɑ kɛ́ kʋtɑmsɑ tɔɣɔ.
20 Ɩlɛnɑ mʋtʋ lɩɩ-ɩ luɣu,
nɑ pǝ́ kpɛŋnɑ tɔɣɔnɑɣɑ ŋkɑ ɩ sɔɔlɑ teu tɔ.
21 Ɩlɛnɑ ɩ́ tɛ́ tɑɑsɩ kɛ kɑtɑtǝlɑɣɑ,
nɑ ɩ́ yele nyʋɣʋ tike.
22 Wɑɑtʋ ɩnɩ ɩ wɛ pǝlɑɑʋ nɔɣɔ tɔɔ kɛ́ tǝcomlɑɑ,
nɑ ɩ weesuɣu kɛ sǝm niŋ tɑɑ.
23 Amɑ ye ɩsɔtɑɑ tillɑɑ iyɑɣɑ tɑɑ kʋlʋm
wei ɩ sǝŋnɑ yǝlɑɑ, nɑ ɩ́ hʋlǝɣɩ yʋlʋ kɛ
ɩ kʋlɑpǝlɛ tɔ, ɩ wɛ ɩ kiŋ,
24 ɩsɔtɑɑ tillu ɩnɩ ɩ́ wii yʋlʋ ɩnɩ ɩ pǝtɔɔtǝlɛ,
nɑ ɩ́ sǝlǝmɩ Ɩsɔ sɩ:
Yɑpɩ-ɩ. Tɑɑ yele nɑ ɩ́ tii pǝlɑɑʋ tɑɑ.
Mɑ hikɑ mpi mɑɑ lɑɣɑsǝnɑ ɩ weesuɣu tɔ.
25 Ɩlɛnɑ yʋlʋ ɩnɩ ɩ tɔnʋɣʋ mǝlɩ kʋ wule tɑɑ,
nɑ ɩ́ pǝsɩ ɩsɩɩ ɩ ɩfepile wɑɑtʋ.
26 Ɩlɛnɑ ɩ́ sǝlǝmɩ Ɩsɔ, nɑ Ɩsɔ nɩɩ nɑ ɩ́ nɑ́ ɩ teu
nɑ lɑŋhʋlʋmlɛ, ɩlɛnɑ Ɩsɔ nɑ́ɑ́ hɑ-ɩ ɩ tɑmpɑnɑ.
27 Ɩlɛnɑ ɩ́ yooki yontu kɛ yǝlɑɑ kiŋ sɩ:
Mɑɑ pǝntɑɑ kɛ́ nɑ mɑ́ wɑkǝlɩ tɑmpɑnɑ.
Ɩlɛ pɑ tɑ lɑnɑ-m ɩsɩɩ pǝ mʋnɑɑ tɔ.
28 Ɩsɔ yɑpɑ mɑ lǝsɑɣɑ sɩ kɑ́ tɑɑ sʋʋ
pǝlɑɑʋ tɑɑ. Mɑɑ tɑsɑ nyɑɑlǝm kɛ nɑʋ tɔtɔ.
29 Pǝ tǝnɑɣɑ ḿpʋ́ɣʋ́ Ɩsɔ lɑkɩ yʋlʋ
kɛ tɔm nɑɑlɛ, hɑlɩ pǝ́ polo tɔm tooso.
30 Ɩlɛnɑ ɩ́ lǝsɩ-ɩ pǝlɑɑʋ tɑɑ, nɑ ɩ́ yele nɑ weesuɣu nyǝ́mɑ nyɑɑlǝm nɑ ɩ tɔɔ.
31 Soopu, pǝ wɛɛ sɩ ń nɩɩnɑ-m kɛ́.
Ke ŋkpɑŋŋ nɑ mɑ́ yɔɣɔtɩ.
32 Ye n wɛnɑ nɔɣɔ ŋkɑ n kɑ́ cɔnɑ tɔ,
n yɔɣɔtɩ, mɑɑ hɑ-ŋ tɑmpɑnɑ.
33 Ye n fɛɩnɑ nɑtǝlɩ ɩlɛ n su,
nɑ ń nɩɩ nɑ mɑ́ hʋlɩ-ŋ lǝmɑɣɑsɛɛ tɔm.