4
Ɩlifɑsɩ kʋyɔɣɔtʋtʋ
1 Ḿpʋ́ɣʋ́ Temɑŋ tʋ Ɩlifɑsɩ tɔmɑ Soopu sɩ:
2 N kɑ́ pǝsɩ nɑ ń kɑntǝlɩ nɑ mɑ́
yɔɣɔtǝnɑ-ŋ?
Mpi tɔ, tɔm wɛ mɑ tɑɑ kɛ́,
mɑɑ pǝsǝɣɩ nɑ mɑ́ su.
3 Nyɑ́ sɛɣɛsǝnɑ yǝlɑɑ pɑɣɑlɛ.
Pǝyele n nyǝmɑ́ ɑcɑmɑɑ kɛ ɑpɑlʋtʋ sɔɔsʋɣʋ.
4 Nyɑ́ tɑsɑɣɑnɑ lɑɣɑtʋ kɛ mpɑ pɑ cɑɑ hotuɣu tɔ,
nɑ ń kʋsǝɣɩ mpɑ sǝɣǝlɑ nyǝkɑɑ tɔ.
5 Pǝ mɑɣɑnɑ nyɑ́, ɩlɛnɑ nyɑ́ ɑpɑlʋtʋ
yɔɔlǝɣɩ nɑ ń huɣutiɣi lotu nɑ?
6 Ɩsɩɩ n nyɑŋɑɣɑnɑ Ɩsɔ kɛ́ nɑ pǝ́ wɑɑsǝɣɩ-ŋ?
Nɑ nyɑ́ tɔntɛ kʋpɑntɛ nɑ́ɑ́ tʋɣʋ-ŋ nɑɑni?
7 Hʋʋ nyɑ́ tɑɑ, too tɔ,
n nɑwɑ pǝ kpiisɑ kʋpɑmɑ, yɑɑ tɑmpɑnɑ tǝŋlɑɑ nɑ?
8 N nyǝmɑ́ teu tǝsiɣisiɣi sɩ,
ye yʋlʋ hɑlɑ kʋtɑkɛɛsǝm yɑɑ ɩ tuu wɑhɑlɑ,
mpʋ ɩnǝɣɩ ɩ kɔŋ kʋm.
9 Ɩsɔ wosɑ pǝ yǝlɑɑ kɛ heelim nɑ pɑ́ɑ́nɑ́,
nɑ pǝ́ wɑkǝlɩ-wɛ nɑ pǝ́ kpiisi-wɛ.
10 Pɑ holiɣi kɛ́ ɩsɩɩ tɔɣɔlɑsɩ,
nɑ Tɑcɑɑ tǝkǝɣɩ-wɛ nɑ ɩ́ pɛlǝɣɩ pɑ kelɑ.
11 Ye tɔɣɔlɑsɩ ɩ́ lɑŋɑ tɔɣɔnɑɣɑ sɩ sǝkɩ kɛ́,
nɑ sɩ piyɑ nɑ́ɑ́ yɑ́ yem.
12 Pǝ wɛlǝtɑ mɑ ŋkpɑŋʋɣʋ tɑɑ
kɛ́ tɔm kɛ mukɑɣɑ tɛɛ
13 kɛ́ ɑhoo tɑɑ kɛ́ sɑɑ wei toosee ɑsɑɣɛɛ
kɔŋ nɑ tom pɩ́ɩ́ yǝlɑɑ tɔ.
14 Sɔɣɔntʋ wɑtʋ pǝlɑ-m tǝyʋlʋyʋlʋ,
nɑ mɑ tɔnʋɣʋ tǝnɑ seliɣi.
15 Heelim fɛtɑ mɑ ɩsɛntɑɑ nɑ mɑ
tɔnʋɣʋ tǝnɑ lʋlɩ kɑcǝncǝmpɔɣɔlɑsɩ.
16 Mɑ nɑɑkɑɣɑ nɔɣɔlʋ sǝŋɑɑ, mɑ tɑ nyǝmɩ-ɩ.
Ɩlɛnɑ mɑ nɩɩ pʋntʋ miitiɣi sɩ:
17 Yʋlʋ pǝsǝɣɩ nɑ ɩ́ tǝŋ tɑmpɑnɑ ɩsɩɩ weɣe Ɩsɔ kiŋ?
Yɑɑ ɩ pǝsǝɣɩ nɑ ɩ́ wɛɛ tǝnɑŋŋ ɩsɩɩ ɩ ŋmɑlʋ nɑ?
18 Ye Ɩsɔ tɑ́ lɑ́ nɑɑni kɛ́ ɩ tǝmlɛ nyǝ́mɑ,
nɑ ɩ́ nɑɑkɩ ɩsɔtɑɑ tillɑɑ kiŋ kɛ kɑwɑlɑɣɑ.
19 Kɑcɑŋfɑnɑ mpɑ ɩ ŋmɑnɑ cʋɣʋ nɑ pɑ tɔnǝŋ kɛ́ tɛtʋ,
nɑ ɩ yɔkʋɣʋ fɛɩ kɑtɛ ɩsɩɩ sonsompee tɔ?
20 Ɩsɔ nɑŋǝɣɩ-wɛɣɛ ɩsɩɩ mʋlʋm kɛ kʋyɑkʋ kʋlʋmʋɣʋ.
Pɑɑ sɑɑlɩ tɑm, nɔɣɔlʋ ɩɩ tɩɩ pɑɑsǝɣǝnɑ.
21 Pɑ weesuɣu ŋmɩɩsɩ cɛpɑ.
Ɩlɛnɑ pɑ́ sɩ́ pɑ fɛɩnɑ lǝmɑɣɑsɛɛ.