5
1 Ɩlifɑsɩ sɩ: Soopu mɑ kɑpukɑ nɑ ń nɑ́ sɩ
nɔɣɔlʋ kɑ́ cɔ-ŋ?
Ɩsɔtɑɑ tillɑɑ nɑŋŋ nyǝ́mɑ tɑɑ ɑwe tɔɔ kɛ́ n kɑ́ kɛɛsǝnɑ?
2 Lǝmɑɣɑsɛɛ fɛɩ tʋ pɑ́ɑ́nɑ́ kʋɣɩ-ɩ kɛ́.
Ɩlɛnɑ ɩsǝsɛɛmlɛ nɑ́ɑ́ kʋ́ kʋmɛlɛŋ.
3 Mɑ nɑwɑ pǝ lɑkǝnɑ kʋmɛlɛŋ.
Ḿpʋ́ɣʋ́ mɑ koolɑ kʋ tǝyɑɣɑ kɛ mpusi kɛ́ kpɑkpɑɑ sɩ:
4 Nɔɣɔlʋ ɩ́ tɑɑ wɑɑsɩ kʋ piyɑ.
Sɩ tɔm ɩ́ sɩ tǝnɑŋnɑŋ kɛ tǝhʋʋlɛ.
5 Nyɔɣɔtʋnɑɑ ɩ́ tɔɣɔ kʋmɛlɛŋ kʋmtʋ.
Pɑɑ nɑ sɔwɑ kɑlɑɑ wɛɛ tɔ, pɑ́ lɛɛkɩ-tɩ.
Lɑŋlɑɑ ɩ́ kuu kʋ wɛnɑʋ.
6 Kʋtɑkɛɛsǝm ɩɩ lɩɩkǝnɑ ɑtɛ.
Pǝyele pǝ tɑɣɑ tɛtʋ tɛɛ kɛ́ wɑhɑlɑ nyɔɔkǝnɑ.
7 Amɑ pǝ tʋ́ yʋlʋ kɛ́ sɩ ɩ́ tɔɣɔ wɑhɑlɑ,
ɩsɩɩ mɑmɑcǝɣǝlɑsɩ kʋlʋɣʋʋ ɩsɔtɑɑ tɔ.
8 Ye mɑɣɑ Soopu, Ɩsɔ kɛ́ mɑɑ tʋwɑ kpʋlʋɣʋ,
nɑ mɑ́ pɛtɩ-ɩ mɑ tɔm.
9 Ɩ kʋlɑpǝm tɔɔwɑɣɑ,
yʋlʋ kɑɑ pǝsɩ pǝ cɛkǝnɑʋ,
yɑɑ ɩ́ nyɩ pǝ nyʋɣʋ.
10 Ɩsɔ yekinɑ nɑ tɛʋ nɩɩkɩ
tɛtʋ tɔɔ, nɑ tɑwɑ nyɔɔkɩ.
11 Ɩ kʋsǝɣɩ mpɑ pǝ pɑsɑɑ tɔɣɔ,
nɑ ɩ́ hɛɛsǝɣɩ lǝyɑɣɑ nyǝ́mɑ lɑŋɑ.
12 Ɩ wɑkǝlǝɣɩ mpi ɑcilɑɣɑtʋ nyǝ́mɑ sɩɩkɩ sɩ pɑ lɑkɩ tɔ.
Ɩ sǝŋsǝɣɩ pɑ kʋlɑpǝm kɛ pɑ niŋ tɑɑ.
13 Ɩ kpɑɑkɩ nyǝntɑɑ nɑ pɑ ɑcilɑɣɑtʋ.
Pɑ kpelikpekɑ lɑɣɑtʋ tɑsʋɣʋ ɩɩ wɑɑsǝɣɩ pʋlʋ.
14 Ilim nɑ pǝ ɩsǝlɛ kɛ pɑ tutiɣi ɩsɩɩ
sǝkpɛtʋɣʋ wɛɛ,
nɑ pɑ́ hɑkǝɣɩ ɩsɩɩ ɑhoo yuwɑ.
15 Amɑ Ɩsɔ nɑ́ lǝsǝɣɩ ɩcɑm kɛ sǝm tɑɑ,
nɑ ɩ́ wɑɑsǝɣɩ-ɩ toŋ tʋ niŋ tɑɑ.
16 Ɩ tʋɣɩ kʋnyɔntʋ tɑɑ kɛ́ tɛɛlʋɣʋ,
nɑ ɩ́ tǝkǝɣɩ ɩsɑɣɑlɑtɑɑ tǝnɑ nɔɔsɩ.
17 Wei ɩ ŋkpɑŋʋɣʋ Ɩsɔ hɔŋ tɔ, ɩ nɩɩ leleŋ kɛ́.
Ɩlɛ tɑɑ kisi Toŋ tǝnɑ tʋ sɛɣɛsʋɣʋ.
18 Ɩsɔ lɑkǝnɑ yʋlʋ tɔɔ kɛ́ hiŋ nɑ ɩ́ tʋ-ɩ kɔɔlɛ.
Ɩnɩ ɩ kʋɣʋnɑ nɑ ɩ́ wɑɑsǝnɑ ɩ niŋ.
19 Pɑɑ wɑɑtʋ wei kɛ́ ɩ yɑkɩ-ŋ
wɑhɑlɑnɑɑ nɑ ɑsolɑ tɑɑ,
nɑ ɩsɑɣɑtʋ nɑtǝlɩ tǝ kɑɑ mɑɣɑnɑ-ŋ.
20 Ɩ kɑ́ wɑɑsɩ-ŋ nyɔɣɔsɩ wɑɑtʋ.
Nɑ ɩ́ yɑ-ŋ sǝm nɔɣɔ tɑɑ kɛ́ yoou tɑɑ.
21 Pɑɑ pɑ cɑɣɑ nyɑ́ ɑcɑɣɑ pɩɩ kenti nyɑ́ tɔɔ kɛ́.
N kɑɑ nyɑnɑ pʋlʋɣʋ wɑhɑlɑ wɑɑtʋ.
22 Nyɔɣɔsɩ nɑ wɑhɑlɑ pǝ tɔm kɑ́ lɑ-ŋ woŋɑ.
Pǝyele n kɑɑ nyɑnɑ tɑɑlɛ wontu.
23 Pɩɩ kenti nyɑ́ tɑwɑ kɛ wɑkǝllɑɑ.
Pɑɑ pɛɛ kʋlɔlɔɣɔnɑ, yɑɑ tɑɑlɛ wontu.
24 Alɑɑfǝyɑ kɑ́ wɛɛnɑ nyɑ́ tǝyɑɣɑ tǝnɑ tɑɑ,
nɑ kpǝntɛ nɑtǝlɩ tǝ kɑɑ lɑŋ nyɑ́ kɑlɑkǝŋ tɑɑ.
25 Nyɑ́ piyɑ nɑ nyɑ́ lʋlʋɣʋ nyǝ́mɑ kɑ́ huki,
ɩsɩɩ tɑwɑ tɑɑ nyɩɩtʋ.
26 N kɑ́ kpɑtǝlɩ teu kɛ tǝkuŋkuŋku
nɑ pǝ́cɔ́ ń sʋʋ pʋ́ʋ́ɣʋ́.
Teitei ɩsɩɩ tɔɣɔnɑɣɑ pɩɩkʋɣʋ nɑ pǝ́cɔ́ pɑ́ kʋ́ tɔ.
27 Tǝ pɛɛkɑɑ nɑ tǝ́ nɑ́ mpi tɔɣɔlɛ.
Nyɑɣɑ pǝ wɛɛ sɩ ń nɩɩ-tɩ nɑ ń cɛkǝnɑ-tɩ.