118
Kɛɛsɩ mpi Tɑcɑɑ lɑpɑ tɔ
1 Ɩ́ sɛɛ Tɑcɑɑ, mpi tɔ, ɩ kɛ́ kʋpɑŋ.
2 Ɩsɛɣɛlɩ nyə́mɑ ɩ́ tɔ sɩ:
Ɩ kʋpɑntʋ wɛ tɑm tɔɔ.
3 Alɔŋ təyɑɣɑ nyə́mɑ ɩ́ tɔ sɩ:
Ɩ kʋpɑntʋ wɛ tɑm tɔɔ.
4 Mpɑ pɑ nɩɩkənɑ Tɑcɑɑ tɔ pɑ́ tɔ sɩ:
Ɩ kʋpɑntʋ wɛ tɑm tɔɔ.
5 Mɑ lɑŋwɑkəllɛ tɑɑ kɛ́ mɑ yɑ́ɑ́ Tɑcɑɑ
nɑ ɩ́ cɔ-m nɑ ɩ́ wɑɑsɩ-m.
6 Tɑcɑɑ n wɛ mɑ tɔɔ kɛ́, mɑɑ nyɑŋ pʋlʋ.
Yʋlʋ pəsəɣɩ nɑ ɩ́ lɑ-m we?
7 Nyɑ́ teŋnɑ-m
nɑ mɑ́ nɑɑkɩ mɑ kolontunɑɑ kpisuɣu.
8 Pə kəlɑ teu sɩ yʋlʋ ɩ́ tʋ Tɑcɑɑ nyɑɣɑ kpʋlʋɣʋ
nɑ mpi ɩ kɑ́ pɛtɩ nyɑ́ təɣɩ yəlɑɑ tɔ.
9 Pə kəlɑ teu sɩ yʋlʋ ɩ́ tʋ Tɑcɑɑ nyɑɣɑ kpʋlʋɣʋ
nɑ mpi ɩ kɑ́ pɛtɩ ɩ təɣɩ sɔsɑɑ tɔ.
10 Piitimnɑɑ tənɑ kɑ tɑmɑ-m kɛ́.
Ɩlɛ mɑ tɔɣɔnɑ-wɛɣɛ Tɑcɑɑ nyɑ́ toŋ tɑɑ.
11 Pɑɑ tɑmɑ-m kɛ́ nɑ pɑ́ wɑtəɣɩ-m.
Ɩlɛ mɑ tɔɣɔnɑ-wɛɣɛ Tɑcɑɑ toŋ tɑɑ.
12 Pɑɑ wɑtɑ-m kɛ́ ɩsɩɩ tɩɩŋ sɛsɛkʋ.
Amɑ pɑ toŋ tɛmɑ lɔŋ ɩsɩɩ kiisi kɔkɔ.
Ɩlɛ mɑ tɔɣɔnɑ-wɛɣɛ Tɑcɑɑ toŋ tɑɑ.
13 Mɑ kolontu nyɑ́, nyɑ́ tusɑɣɑ-m kɛ́ sɩ mɑ́ hoti.
Amɑ Tɑcɑɑ nɑ́ kɔmɑ nɑ ń wɑɑsɩ-m.
14 Tɑcɑɑ kɛlɛ mɑ toŋ nɑ mɑ sɑmtʋ nyʋɣʋ,
nyɑ́ yɑpənɑ-m.
15 Siɣisilɑɑ wilitiɣi.
Mpi tɔ, Ɩsɔ hɑ-wɛɣɛ ɑkɑɩtʋ.
Tɑmpɑnɑ təŋlɑɑ lɑŋlɛ hɛɛwɑ.
Mpi tɔ, Ɩsɔ yɑpɑ-wɛ.
Tɑcɑɑ n yɑpɑ-tʋ nɑ nyɑ́ toŋ.
16 Tɑcɑɑ n kʋsɑ ŋkpɑləŋɑ nɑ ɩsɔ.
N lɑpənɑ toŋ sɔsɔɔŋ.
17 Mɑ kɑɑ tɑsɑ səm tɔtɔ,
mɑɑ wɛɛnɑ weesuɣu kɛ́.
Mɑɑ kɛɛsɩ Tɑcɑɑ təmɑ tɔm.
18 Tɑcɑɑ n hɔmɑ mɑ ŋkpɑŋʋɣʋ yɑ́ɑ́.
Amɑ n tɑ yele nɑ mɑ́ sɩ.
19 Ɩ́ tʋlɩ-m tɑmpɑnɑ təŋlɑɑ nɔnɔɔsɩ,
nɑ mɑ́ sʋʋ nɑ mɑ́ sɑ Tɑcɑɑ.
20 Tɑcɑɑ nɔnɔɣɔ ntɔ,
ŋkɛɣɛ siɣisilɑɑ sʋʋkənɑ.
21 Mɑɑ sɛɛ-ŋ kɛ́, mpi tɔ, n cɔ-m
nɑ ń pəsɩ mɑ wɑɑsʋlʋ.
22 Pəlɛ nte ŋmɑlɑɑ kisɑɑ nɑ pɑ́ lɔ tɔ,
ntɛ́ tə pəsənɑ ntɛɣɛ pəlɛ sɔsɔɔlɛ.
23 Tɑcɑɑ nyɑ́ kiŋ kɛ pə lɩɩnɑɑ,
pə kɛ́ piti təmlɛ kɛ́.
24 Tɑcɑɑ nyɑ́ lɑpənɑ kʋyɑkʋ kʋnɛ.
Kʋ kɛ́ lɑŋhʋlʋmlɛ nɑ ɑyɔɔlɑ nyəŋkʋ kɛ́.
25 Hɑɩ, Tɑcɑɑ, yele nɑ pə́ lɑnɑ-tʋ.
Hɑɩ, Tɑcɑɑ, yɑ tɑ́ nyɔɔŋ.
26 Ɩsɔ ɩ́ kooli kʋpɑntʋ kɛ wei ɩ kɔŋnɑ Tɑcɑɑ hətɛ tɑɑ tɔ.
Hɑtoo Tɑcɑɑ təyɑɣɑ kɛ tə kooliɣinɑ-mɛɣɛ kʋpɑntʋ.
27 Tɑcɑɑ kɛlɛ Ɩsɔ, ɩnɩ ɩ kɔkɔ nɑɑkənɑ-tʋ.
Ɩ́ tɑmsɩ ɑcimɑ kpəntɛ nɑ ɩ́ ponɑ-tɛɣɛ
kɔtɑɣɑ təlɑtɛ həlʋɣʋ kiŋ*fɑ*.
28 Tɑcɑɑ, n kɛ́ mɑ Ɩsɔ kɛ́ mɑɑ sɑ-ŋ.
Mɑ Ɩsɔ, mɑɑ pʋɣʋlɩ-ŋ.
29 Ɩ́ sɛɛ Tɑcɑɑ.
Mpi tɔ, n kɛ́ kʋpɑŋ,
nɑ nyɑ́ kʋpɑntʋ wɛ tɑm tɔɔ.