119
Yontu nti pɑ sɑŋnɑ Ɩsɔ kʋsəsɩɩtʋ tɔ
1 Leleŋ nɩɩlɑɑ ntɛ́ mpɑ pɑ tɔntɛ tewɑ
nɑ pɑ́ tɔŋ ɩsɩɩ Ɩsɔ kiiu wɛɛ tɔ.
2 Leleŋ nɩɩlɑɑ ntɛ́ Ɩsɔ kʋsəsɩɩtʋ tɔkəlɑɑ,
nɑ mpɑ pɑ pɛɛkəɣɩ-ɩ nɑ pɑ lotu tənɑ tɔ.
3 Pə yəlɑɑ tɔŋ Ɩsɔ mpɑɑŋ tɑɑ kɛ́.
Pɑɑ lɑkɩ ɩsɑɣɑtʋ nɑtəlɩ.
4 Tɑcɑɑ n hʋlɑ nyɑ́ kʋtʋtʋtʋ kɛ́ sɩ
yəlɑɑ ɩ́ pɑɑsənɑ-təɣɩ teu.
5 Hɑɩ, Ɩsɔ, yele nɑ mɑ tɔntɛ lɑ teu
ɩlɛnɑ mɑ́ pəsɩ nɑ mɑ́ tɔkɩ nyɑ́ kiiŋ.
6 Ye mɑ tɔkɑ nyɑ́ kʋsəsɩɩtʋ tənɑ,
mɑ kɑɑ wɛɛnɑ fɛɛlɛ.
7 Pəlɛɣɛ mɑɑ sɑ́-ŋ́ nɑ lotu kʋlʋmtʋ
nɑ mɑ́ kpɛləməɣɩ nyɑ́ kiiŋ kʋpɑŋ.
8 Mɑ cɑɑ mɑ lɑ nyɑ́ luɣu nyəntʋ kɛ́,
tɑɑ lɔ-m təkpɑtɑɑ.
Nyɑ kʋsəsɩɩtʋ hɛɛsəɣɩ mɑ lɑŋlɛ
9 Ɩsənɑɣɑ ɩfepu kɑ́ kpɛləmənɑ tənɑŋŋ tɔntɛ?
Nyɑ́ tɔm tɔkʋɣʋ tɑɑ kɛ́ ɩfepu kɑ́ kpɛləmənɑ tənɑŋŋ tɔntɛ.
10 Tɑcɑɑ, mɑ pɛɛkəɣɩ-ŋ kɛ́ nɑ lotu kʋlʋmtʋ.
Tɑɑ yele nɑ mɑ́ hɑtələnɑ nyɑ́ kʋsəsɩɩtʋ.
11 Mɑ tɔkɑ nyɑ́ tɔm kɛ teu kɛ hɑtoo mɑ tɑɑ kɛ́,
sɩ pə tɑɑ kɔɔ nɑ mɑ́ pəntənɑ-ŋ.
12 Tɑcɑɑ, mɑ sɛɛ-ŋ.
Sɛɣɛsɩ-m nyɑ́ luɣu nyəntʋ.
13 Mɑɑ yɔɣɔtɩ kʋlʋm kʋlʋm kɛ́
kʋsəsɩɩtʋ nti n sɩɩwɑ tɔ.
14 Nyɑ́ tɔm təŋʋɣʋ hʋləsəɣɩ mɑ lɑŋlɛ kɛ́
ɩsɩɩ mɑ́ tənnɑ wɛnɑʋ tənɑ.
15 Mɑ mɑɣɑsəɣɩ nyɑ́ kʋtʋtʋtʋ tɔm kɛ́.
Nɑ mɑ́ kpɛləməɣɩ nyɑ́ kʋsɛɣɛsətʋ kɛ teu.
16 Nyɑ́ kʋsəsɩɩtʋ kɛ mɑ lɑŋlɛ hɛɛkənɑ
mɑ kɑɑ sɔɔ nyɑ́ tɔm.
Nyɑ kiiŋ tɑsəɣɩ-m lɑɣɑtʋ
17 Lɑ nyɑ́ təmlɛ tʋ mɑɣɑ kʋpɑntʋ
ɩlɛnɑ mɑ́ wɛɛnɑ weesuɣu nɑ mɑ́ tɔkɩ nyɑ́ tɔm.
18 Kuli mɑ ɩsɛ nɑ mɑ́ nɑ́ nyɑ́ kiiu teu.
19 Mɑ kɛ́ ɩkɔm kɛ tɛtʋ tɑɑ kɛ́.
Tɑɑ ŋmɛsɩ-m nyɑ́ kʋsəsɩɩtʋ.
20 Mɑ sɔɔlɑ nyɑ́ kiiŋ kɛ́, nɑ mɑ́ səkɩ ɩ tɔɔ.
Mɑ cɑɑ mɑ kpɛləmɩ-ɩ pɑɑ kʋyɑkʋ ŋku.
21 N nyɑɑsəɣɩ mpusitʋnɑɑ ɩsəcɑʋ nyə́mɑ
mpɑ pɑ hɑtələɣənɑ nyɑ́ kiiŋ tɔɣɔ.
22 Kɛɛlɩ mɑ tɔɔ kɛ́ fɛɛlɛ nɑ footuɣu.
Mpi tɔ, mɑ tɔkɑ nyɑ́ kiiŋ kɛ́.
23 Pɑɑ ɑwulumpiyɑ cɑɣɑɑ nɑ pɑ́ yɔɣɔtəɣɩ mɑ tɔm,
nyɑ́ tɔm kɛ nyɑ́ təmlɛ tʋ mɑ́, mɑ mɑɣɑsəɣɩ.
24 Nyɑ́ kʋsəsɩɩtʋ hɛɛsəɣɩ mɑ lɑŋlɛ kɛ́.
Ntɩ tə tɑsəɣənɑ-m lɑɣɑtʋ.
Nyɑ kʋsəsɩɩtʋ hɑɑkɩ-m weesuɣu
25 Mɑ hotɑ ɑtɛɣɛ.
Nyɑ́ tɔm ɩ́ hɑ-m weesuɣu ɩsɩɩ n kɑ yɔɣɔtʋɣʋ tɔ.
26 Mɑ kɛɛsəɣɩ-ŋ mɑ kʋlɑpəlɛ tɔm.
Sɛɣɛsɩ-m nyɑ́ kʋsəsɩɩtʋ tɔm.
27 Hʋlʋ-m nyɑ́ kʋsəsɩɩtʋ təŋʋɣʋ
nɑ mɑ́ mɑɣɑsɩ nyɑ́ teu tɔm.
28 Lɑŋwɑkəllɛ nɩɩ-m nɑ mɑ́ pələɣɩ ɩsəlʋm.
Kʋsɩ-m ɩsɩɩ n kɑ yɔɣɔtʋɣʋ tɔ.
29 Hɑtələnɑ-m pɔpɔtʋ.
Hʋlɩ-m pɛɛlɛɛ nɑ mɑ́ təŋ nyɑ́ kiiu.
30 Tɑmpɑnɑ mpɑɑʋ kɛ mɑ ləsɑɑ.
Mɑɑ təŋ nyɑ́ kʋsəsɩɩtʋ.
31 Nyɑ́ kʋsəsɩɩtʋ kɛ mɑɑ mɑtənɑ.
Tɑcɑɑ tɑɑ yele nɑ pə́ liɣiti-m.
32 Nyɑ́ kʋsəsɩɩtʋ kɛ mɑ nɩɩkənɑ teu.
Mpi tɔ, n kulɑ mɑ ɩsɛ.
Mɑɑ təŋ nyɑ kiiu nɑ mɑ lotu tənɑ
33 Tɑcɑɑ hʋlɩ-m nyɑ́ kʋtʋtʋtʋ mpɑɑʋ
nɑ mɑ́ tɔkɩ-tɩ nɑ mɑ́ tɑlɑ tənɑɣɑ.
34 Tɑcɑɑ hɑ-m nyəm nɑ mɑ́ tɔkɩ nyɑ́ kiiu
nɑ mɑ́ təŋəɣɩ-kʋ nɑ mɑ lotu tənɑ.
35 Yele nɑ mɑ́ nɩɩnɑ nyɑ́ kʋsəsɩɩtʋ.
Mpi tɔ, mɑ sɔɔlɑ-təɣɩ.
36 Ponɑ mɑ hʋwɛɛ kɛ nyɑ́ kʋsəsɩɩtʋ kiŋ.
Tɑɑ ponɑ-yɛɣɛ liɣitee luluɣu cɔlɔ.
37 Ləsɩ mɑ ɩsɛ kɛ kpɑɩ nyəm tɔɔ.
Tɑɑ yele nɑ mɑ́ pɑɑsənɑ kpɑɩ nyəm.
Yele nɑ mɑ́ wɛɛ nyɑ́ luɣu nyəntʋ tɑɑ.
38 Lɑ nyɑ́ təmlɛ tʋ mɑɣɑ nti
n kɑ sɩɩwɑ mpɑ pɑ nyɑŋnɑ-ŋ tɔ.
39 Mɑ wɛnɑ fɛɛlɛ sɔɣɔntʋ kɛ́.
Tɑɑ yele nɑ tə́ mɑɣɑnɑ-m.
40 Nti mɑ nyɩɩləɣɩ sɔsɔm tɔɣɔlɛ nyɑ́ kʋtʋtʋtʋ lɑpʋ.
N kɛ́ siɣisilu kɛ́, hɑ-m weesuɣu.
Mɑɑ tɔkɩ nyɑ kiiu kɛ
41 Tɑcɑɑ nyɑ́ kʋpɑntʋ ɩ́ kɔɔ mɑ tɔɔ
nɑ ń yɑ mɑ nyʋɣʋ ɩsɩɩ n sɩɩʋ tɔ.
42 Nɑ mɑ́ wɛɛnɑ nti mɑɑ cɔ mɑ tʋʋlɑɑ tɔ.
Mpi tɔ, nyɑ́ kʋyɔɣɔtʋtʋ kɛ mɑ lɑpɑ nɑɑni.
43 Tɑɑ ləsɩ tɑmpɑnɑ tɔm kɛ mɑ nɔɣɔ tɑɑ təkpɑtɑɑ.
Nti n mɑɣɑsəɣɩ nyɑ́ tɑɑ tɔɣɔ mɑ tɑŋɑɑ.
44 Mɑɑ tɔkɩ nyɑ́ kiiu kɛ
pɑɑ kʋyɑkʋ ŋkuɣu tɑm tɔɔ kɛ́.
45 Mɑ cɑɑ mɑ́ tɔnɑ mɑ təɣɩ.
Mpi tɔ, nyɑ́ kʋsəsɩɩtʋ kɛ mɑ pɛɛkəɣɩ.
46 Mɑɑ heeli nyɑ́ kʋsəsɩɩtʋ tɔm kɛ ɑwulɑɑ,
fɛɛlɛ kɑɑ wɛɛ-m.
47 Nyɑ́ kʋsəsɩɩtʋ kɛ mɑ lɑŋlɛ hɛɛnɑɑ.
Mpi tɔ, mɑ sɔɔlɑ-təɣɩ.
48 Mɑ nɩɩkənɑ nyɑ́ kʋsəsɩɩtʋ kɛ́.
Mɑ sɔɔlɑ-təɣɩ.
Mɑ cɑɑ mɑ mɑɣɑsɩ-təɣɩ mɑ tɑɑ kɛ́.
Nyɑ́ kʋsəsɩɩtʋ tʋɣʋ-m nɑɑni
49 Tɔɔsɩ tɔm nti n kɑ heelɑ nyɑ́ təmlɛ tʋ mɑ́ tɔ tə tɔɔ.
Ntɩ tə tʋnɑ-m nɑɑni.
50 Ntɩ tə hɛɛsəɣənɑ mɑ lɑŋlɛ kɛ mɑ wɑhɑlɑ tɑɑ.
Nyɑ́ tɔm kʋpɑntʋ hɑɑkənɑ-m weesuɣu.
51 Pɑɑ ɩsəcɑʋtʋnɑɑ woŋiɣi-m
mɑ tɑ lɩɩ nyɑ́ kiiu tɑɑ.
52 Tɑcɑɑ mɑ tɔɔsəɣɩ nyɑ́ lɔŋtɑɑ hʋʋlɛ tɔm
nɑ pə́ hɛɛsəɣɩ mɑ lɑŋlɛ.
53 Mɑ́ nɑɑkɩ ɑsɑɣɑɑ mpɑ pɑ lɔɔkɩ nyɑ́ kiiŋ tɔ,
pɑ́ɑ́nɑ́ kpɑɑkɩ-m kɛ́.
54 Nyɑ́ kiiŋ tɔm kɛ mɑ yooki yontu kɛ timpi
mɑ kɛ́ ɩkɔm tɔ.
55 Mɑ tɔɔsəɣɩ nyɑ́ hətɛ kɛ ɑhoo
nɑ mɑ́ tɔkəɣɩ nyɑ́ kʋsəsɩɩtʋ.
56 Mpi pə kɛ́ mɑ nyəm tɔɣɔlɛ,
sɩ mɑ́ tɔkəɣɩ nyɑ́ kʋsəsɩɩtʋ.
Tɑcɑɑ hʋʋlɛ wɛ teu
57 Mɑ lɛləɣɩ sɩ mɑ nyəntʋ ntɛ́ sɩ
mɑ́ təŋ nyɑ́ kʋyɔɣɔtʋtʋ.
58 Mɑ wiikinɑ-ŋ nɑ mɑ lotu tənɑ,
nyənɩ mɑ pətɔɔtəlɛ ɩsɩɩ n kɑ sɩɩʋ nyɑ́ nɔɣɔ tɔ.
59 Mɑ hʋʋ mɑ mpɑɑʋ tɔm kɛ mɑ tɑɑ,
nyɑ́ kʋsəsɩɩtʋ kɛ mɑ cɑɑ təŋʋɣʋ.
60 Mɑ lɑkɩ nyɑ́ kʋsəsɩɩtʋ kɛ lɔŋ kɛ́ təcɑʋ.
Mɑ kɑɑ yele nɑ tə́ leeli.
61 Asɑɣɑɑ kɑtɔsɩ tɑmɑ-m kɛ́.
Amɑ mɑɑ sɔɔkɩ nyɑ́ kiiu tɔɔ.
62 Mɑ kʋləɣɩ ɑhoo hɛkɑ nɑ mɑ́ sɑ́-ŋ́.
Mpi tɔ, nyɑ hʋʋlɛ wɛ teu.
63 Mɑ kɛ́ mpɑ pɑ nyɑŋnɑ-ŋ nɑ pɑ́ tɔkəɣɩ
nyɑ́ kʋsəsɩɩtʋ tɔ pɑ tɑɑpɑlʋ kɛ́.
64 Hɑɩ, Tɑcɑɑ, nyɑ́ kʋpɑntʋ sunɑ tɛtʋ.
Sɛɣɛsɩ-m nyɑ́ kʋsəsɩɩtʋ.
Tɑcɑɑ mɑpɑ-m sɩ pə tɑɣɑnɩ-m
65 Tɑcɑɑ n lɑpɑ kʋpɑntʋ kɛ nyɑ́ təmlɛ tʋ mɑɣɑ,
ɩsɩɩ n kɑ yɔɣɔtʋɣʋ tɔ.
66 Sɛɣɛsɩ-m ləmɑɣɑsɛɛ kʋpɑnɑ nɑ nyəm.
Mpi tɔ, mɑ tɛmɑ mɑ tɑɑ nɑ nyɑ́ kʋsəsɩɩtʋ kɛ́.
67 Lɔŋ ɩlɛ ye n tɑ hɔ mɑ ŋkpɑŋʋɣʋ mɑɑ tɔkəɣɩ nyɑ́ tɔm.
Amɑ nɔɔnɔɔ mɑ təŋəɣɩ nyɑ́ kiiŋ.
68 N kɛ́ kʋpɑŋ kɛ́ nɑ kʋpɑntʋ lɑtʋ.
Hʋlʋ-m nyɑ́ luɣu nyəntʋ.
69 Ɩsəcɑʋtʋnɑɑ pilisiɣi-m kɛ́ nɑ pɑ kɑloolɑɣɑ.
Amɑ mɑ tɔkɑ nyɑ́ kʋsəsɩɩtʋ kɛ nɑ lotu kʋlʋmtʋ.
70 Pɑ ləmɑɣɑsɛɛ tɑɑ toowɑɣɑ ɩsɩɩ nim.
Ɩlɛnɑ mɑ́ɑ́ hʋləsəɣɩ lɑŋlɛ nɑ nyɑ́ kiiu.
71 Pə wɛ teu sɩ pə́ pɑsɑ-m kɛ́.
Ɩlɛnɑ mɑ́ cɛkənɑ nyɑ́ kʋsəsɩɩtʋ.
72 Nyɑ́ nɔɣɔ tɑɑ kʋsəsɩɩtʋ kəlɑ-m teu kɛ
wʋlɑ nɑ liɣitee wontu tuutuumɑ.
Tɑcɑɑ, nyɑ́ hʋʋlɛ siɣisɑɑ
73 Nyɑ́ niŋ ŋmɑnɑ-m.
Hɑ-m lɑɣɑtʋ nɑ mɑ́ kpɛləmənɑ nyɑ́ kʋsəsɩɩtʋ.
74 Mpɑ pɑ nyɑŋnɑ-ŋ tɔ pɑ nɑɑ-m nɑ pɑ lɑŋlɛ hʋləməɣɩ.
Mpi tɔ, nyɑ́ nɔɔsɩ sɩɩʋ kɛ mɑ tɛɛləɣɩ.
75 Tɑcɑɑ, mɑ nyəmɑ́ sɩ nyɑ́ hʋʋlɛ siɣisɑɑ kɛ́.
Nyɑ́ tɑmpɑnɑ təŋʋɣʋ tɔɔ kɛ́ n pɑsɑ-m.
76 Nyɑ́ kʋpɑntʋ ɩ́ hɛɛsɩ mɑ lɑŋlɛ
ɩsɩɩ n kɑ sɩɩʋ nyɑ́ təmlɛ tʋ mɑɣɑ nɔɣɔ tɔ.
77 Hʋlʋ-m sɩ n sɔɔlɑ-m nɑ pə́ hɑ-m weesuɣu.
Mpi tɔ, nyɑ́ kiiu kɛ mɑ lɑŋlɛ hɛɛkənɑ.
78 Pə́ liɣiti ɩsəcɑʋ nyə́mɑ mpɑ pɑ muɣuluɣu-m mʋsʋŋ tɔ.
Mpi tɔ, nyɑ́ kʋsəsɩɩtʋ tɔm kɛ mɑ mɑɣɑsəɣɩ mɑ tɑɑ.
79 Mpɑ pɑ nyɑŋnɑ-ŋ tɔ pɑ́ kɔɔ mɑ kiŋ
nɑ pɑ́ cɛkənɑ nyɑ́ kʋsəsɩɩtʋ.
80 Mɑɑ lɑ nyɑ́ luɣu nyəntʋ nɑ lotu kʋlʋmtʋ.
Ɩlɛ fɛɛlɛ kɑɑ tɔɣɔ-m nyɑ́ kiŋ.
Tɑcɑɑ fitiɣi-m kolontunɑɑ kɑtɔsɩ
81 Mɑ tɑŋɑ nyɑ́ nyʋɣʋ yɑpʋ kɛ tətɛɣɛtɛɣɛ.
Nyɑ́ tɔm kɛ mɑ tɛɛləɣɩ.
82 Mɑ ɩsɛ tɛŋnɑ nyɑ́ nɔɣɔ sɩɩʋ kiŋ kɛ́,
nɑ mɑ́ pɔɔsəɣɩ sɩ pəlee kɛ́ n kɑ hɛɛsɩ mɑ lɑŋlɛ?
83 Mɑ tɔnʋɣʋ cukɑ kpɑsɩ kɛ́ ɩsɩɩ kɔŋlɛ kɛ nyɔɔsɩ tɑɑ.
Mɑ kɑɑ sɔɔ nyɑ́ kʋsəsɩɩtʋ tɔɔ.
84 Kʋyɛɛŋ ɩsənɑɣɑ pə kɑɑsɑ nyɑ́ təmlɛ tʋ mɑ?
Wɑɑtʋ wei kɛ́ n kɑ́ hʋʋnɑ mpɑ pɑ tʋɣʋ-m wɑhɑlɑ tɔ?
85 Ɩsəcɑʋtʋnɑɑ huliɣinɑ mɑ nɔɣɔ tɔɔ kɛ́ pɔɔŋ,
pɑɑ təŋəɣɩ nyɑ́ kiiu kɛ pɑɑ pəcɔ.
86 Nyɑ́ kʋsəsɩɩtʋ tənɑ kɛ́ kʋsiɣisitʋ kɛ́.
Pɑ tʋɣʋ-m wɑhɑlɑ kɛ mʋsʋŋ kɛ́, wɑɑsɩ-m.
87 Pɑ kɑɣɑ pɑ hu-m nɑ pɑ́ kʋ-m
ɩlɛ mɑɑ lɔɔkɩ nyɑ́ kʋsəsɩɩtʋ.
88 Hɑ-m weesuɣu kɛ nyɑ́ kʋpɑntʋ tɔɔ,
ɩlɛnɑ mɑ təŋ nyɑ́ kʋsəsɩɩtʋ.
Tɑcɑɑ, pə tənɑ pə lɑkɩ-ŋ təmlɛ
89 Hɑɩ, Tɑcɑɑ, n wɛ tɑm tɔɔ kɛ́.
Nyɑ́ tɔm cɑɣɑ teu kɛ ɩsɔtɑɑ kɛ́.
90 Kʋpɑntʋ nti n lɑkɩ tɔ tɩɩ tɛŋ.
Nyɑ́ sɩɩnɑ tɛtʋ nɑ tə nyɔɔwɑ teu.
91 Nyɑ́ kʋsəsɩɩtʋ tɔɔ kɛ́ pə tənɑ pə cɑɣɑ teu kɛ sɑŋɑ.
Mpi tɔ, pə tənɑ pə lɑkɩ-ŋ təmlɛ.
92 Ye mɑ lɑŋlɛ tɑɑ hɛɛnɑ nyɑ́ kiiŋ,
mɑɑ lepɑ mɑ wɑhɑlɑ tɑɑ kɛ́.
93 Mɑ kɑɑ sɔɔ nyɑ́ kʋsəsɩɩtʋ.
Ntəɣɩ n hɑɑkənɑ-m weesuɣu.
94 Mɑ kɛ́ nyɑ́ nyəŋ kɛ́, wɑɑsɩ-m.
Mpi tɔ, nyɑ́ kʋsəsɩɩtʋ kɛ mɑ pɛɛkəɣɩ.
95 Asɑɣɑɑ cɛŋəɣɩ-m kɛ́ sɩ pɑ kʋɣʋ-m.
Pɑɑ nɑ mpʋ nyɑ́ kʋsəsɩɩtʋ kɛ mɑ keŋnɑ ŋkpɑŋŋ.
96 Mɑ nɑwɑ təmɑ kʋpɑnɑ tənɑ tənɑsɩ.
Amɑ nyɑ́ kʋsəsɩɩtʋ fɛɩ tənɑɣɑ.
Nyɑ́ kiiŋ kəlɑ tɩɩŋ kɛ leleŋ
97 Mɑ sɔɔlɑ nyɑ́ kiiu kɛ sɔsɔm kɛ́.
Kʋ tɔm kɛ mɑ mɑɣɑsəɣɩ kʋyɛɛŋ tənɑ.
98 Nyɑ́ kʋsəsɩɩtʋ hɑɑkɩ-m ləmɑɣɑsɛɛ
nɑ pə́ kəlɩ mɑ kolontunɑɑ.
Mpi tɔ, tə wɛ mɑ kiŋ kɛ tɑm tɔɔ kɛ́.
99 Mɑ tɛɛ mɑ sɛɣɛsəlɑɑ tənɑɣɑ nyəm.
Mpi tɔ, nyɑ́ kʋsəsɩɩtʋ kɛ mɑ mɑɣɑsəɣɩ.
100 Mɑ tɛɛ kʋkpɑtəlɑɑ kɛ ləmɑɣɑsɛɛ.
Mpi tɔ, mɑ tɔkɑ nyɑ́ kʋtʋtʋtʋ.
101 Mɑ kisɑ mpɑɑŋ ɩsɑɣɑŋ tɑɑ tɔntɛ
sɩ mɑ́ pəsɩ nɑ mɑ́ tɔkɩ nyɑ́ tɔm.
102 Mɑɑ hɑtələɣənɑ nyɑ́ kʋsəsɩɩtʋ.
Mpi tɔ, nyɑ́ sɛɣɛsəɣənɑ-m.
103 Nyɑ́ tɔm wɛ leleŋ kɛ mɑ tɑntɑhɑɑʋ tɑɑ kɛ́.
Tə kəlɑ tɩɩŋ kɛ leleŋ kɛ mɑ nɔɣɔ tɑɑ.
104 Nyɑ́ kʋsəsɩɩtʋ pəsəɣənɑ-m nyəntʋ
nɑ mɑ́ kisiɣi pɔpɔtʋ tənɑ.
Tɑcɑɑ tɔm kɛ́ fətəlɑ
105 Nyɑ́ tɔm wɛnnɑ ɩsɩɩ fətəlɑ kɛ mɑ nɔɔhɛɛ tɛɛ
nɑ pə́ nɑɑkɩ mɑ mpɑɑʋ tɑɑ.
106 Mɑ tuuki sɩ mɑɑ tɔkɩ nyɑ́ kʋsəsɩɩtʋ.
Mɑɑ lɑ ɩsɩɩ mɑ tuuwɑ tɔ.
107 Tɑcɑɑ, pə pɑsɑ-m teu kɛ́.
Yele nɑ mɑ́ wɛɛnɑ weesuɣu ɩsɩɩ n yɔɣɔtʋɣʋ tɔ.
108 Hɑɩ, Tɑcɑɑ, mʋ mɑ sələmʋɣʋ ɩsɩɩ kʋcɔɔʋ.
Sɛɣɛsɩ-m nyɑ́ kʋsəsɩɩtʋ.
109 Mɑ weesuɣu wɛ ɑsolɑ tɑɑ kɛ́ tɑm kɛ́.
Amɑ mɑ kɑɑ sɔɔ nyɑ́ kiiu tɔm.
110 Asɑɣɑɑ nyəkɩ-m kɑtɔsɩ kɛ́.
Amɑ mɑɑ hɑtələɣənɑ nyɑ́ kʋsəsɩɩtʋ.
111 Nyɑ́ kʋtʋtʋtʋ kɛ-m kʋpɑntʋ sɔsɔɔntʋ kɛ tɑm tɔɔ kɛ́,
tə hɛɛsəɣɩ mɑ lɑŋlɛ.
112 Mɑ tʋ mɑ tɑɑ sɩ mɑ́ təŋ nyɑ́ kʋsəsɩɩtʋ*fɑ*
hɑlənɑ mɑ səm.
Tɑcɑɑ kɛ́ mɑ tentu
113 Mɑ tɑɑ kpɑɑnɑ ɑtɑɑ nɑ ɑ wɑɑlɩ yəlɑɑ kɛ́.
Amɑ mɑ sɔɔlɑ nyɑ́ kiiu.
114 Nyɑɣɑlɛ mɑ kpʋlʋɣʋ tətʋlɛ nɑ mɑ kentulu.
Nyɑ́ kʋyɔɣɔtʋtʋ kɛ mɑ tɛɛləɣɩ.
115 Asɑɣɑɑ mɛ ɩ́ hɑtələnɑ-m.
Ɩlɛnɑ mɑ́ tɔkɩ mɑ Ɩsɔ kiiŋ.
116 Te-m ɩsɩɩ n kɑ sɩɩʋ nyɑ́ nɔɣɔ tɔ nɑ mɑ́ hiki weesuɣu.
Nyɑɣɑ mɑ tɛɛləɣɩ, tɑɑ tʋ-m fɛɛlɛ.
117 Wɛɛ mɑ tentu nɑ pə́ yɑ mɑ nyʋɣʋ.
Ɩlɛnɑ mɑ pɑɑsənɑ nyɑ́ kʋsəsɩɩtʋ kɛ tɑm tɔɔ mɑ́ tɑɑ hɛɛsɩ.
118 N tɔɣɔnəɣɩ mpɑ pɑɑ təŋəɣɩ nyɑ́ kʋsəsɩɩtʋ tɔɣɔ.
Mpi tɔ, pɑ tʋsʋɣʋ ɩɩ wɑɑsəɣɩ pʋlʋ.
119 N lɔɔkɩ ɑtɛ ɑsɑɣɑɑ tənɑɣɑ ɩsɩɩ hute.
Pə tɔɔ kɛ́ mɑ sɔɔlɑ nyɑ́ kʋsəsɩɩtʋ.
120 N tʋ nyɑ́ sɔɣɔntʋ kɛ mɑ tɑɑ nɑ mɑ tɔnʋɣʋ seliɣi,
nɑ mɑ́ nyɑŋnɑ nyɑ́ hʋʋlɛ.
Tɑcɑɑ kɛlɛ mɑ tentu
121 Mɑ tɔkɑ nyɑ́ kiiu nɑ nyɑ́ siɣisuɣu kɛ́.
Tɑɑ pɛtɩ-m mɑ ŋmɑkəllɑɑ.
122 Sɩɩ nyɑ́ təmlɛ tʋ mɑɣɑ nɔɣɔ sɩ n kɑ́ sənɑ-m.
Tɑɑ yele nɑ kɑlɑmpɑɑnɩ nyə́mɑ muɣulu-m.
123 Mɑ tɑŋɑ nyɑ́ nyʋɣʋ yɑpʋ.
Mɑ tɑŋɑ ɑkɑɩtʋ nti tə tɔm n sɩɩwɑ nɔɣɔ tɔ
nɑ mɑ ɩsɛ tɛŋ.
124 Lɑ nyɑ́ təmlɛ tʋ mɑɣɑ kʋpɑntʋ,
nɑ ń sɛɣɛsɩ-m nyɑ́ kʋsəsɩɩtʋ.
125 Mɑ kɛ́ nyɑ́ təmlɛ tʋ kɛ́, hɑ-m lɑɣɑtʋ
nɑ mɑ́ nyɩ́ nyɑ́ kʋsəsɩɩtʋ.
126 Tɑcɑɑ pə tɑlɑɑ sɩ ń lɑ pʋlʋ.
Pɑ yɔkəɣɩ nyɑ́ kiiu kɛ́.
127 Pə tɔɔ kɛ́ mɑ sɔɔlɑ nyɑ́ kʋsəsɩɩtʋ
nɑ pə́ kəlɩ wʋlɑ kʋpɑmpɑŋ.
128 Pə tɔɔ kɛ́ mɑ nyənəɣɩ nyɑ́ kʋtʋtʋtʋ tənɑɣɑ kʋsiɣisitʋ
nɑ mɑ tɑɑ kpɑɑkənɑ pɔpɔtʋ.
Mɑ cɑɑ mɑ təŋ nyɑ kiiu
129 Nyɑ́ kʋsəsɩɩtʋ kɛ kʋpɑmpɑntʋ kɛ́
pə tɔɔ kɛ́ mɑ təŋəɣɩ-tɩ.
130 Nyɑ́ tɔm cɛkənɑʋ kɔŋnɑ nyɑɑləm kɛ́
tə hɑɑkɩ lɑɣɑtʋ kɛ mpɑ pɑ lɑŋɑ-tɩ tɔ.
131 Mɑ liki nyɑ́ tɔm kɛ́ nɑ hiluɣu.
Mpi tɔ, mɑ wɛnɑ nyɑ́ kʋsəsɩɩtʋ nyɔɣɔsɩ kɛ́.
132 Kɛɛsɩ nyɑ́ ɩsɛ nɑ mɑ tɔɔ nɑ ń nyənɩ mɑ pətɔɔtəlɛ,
ɩsɩɩ n lɑkʋɣʋ mpɑ pɑ sɔɔlɑ nyɑ́ hətɛ tɔ.
133 Nyɑ́ tɔm ɩ́ tʋ-m nɑɑni.
Tɑɑ yele nɑ ɩsɑɣɑtʋ nɑtəlɩ tə́ pəsɩ-m.
134 Wɑɑsɩ-m, yəlɑɑ cɑɑkɩ pɑ ŋmɑkələɣɩ-m.
Ɩlɛnɑ mɑ tɔkɩ nyɑ́ kʋsəsɩɩtʋ.
135 Nyɑ́ ɩsɛntɑɑ ɩ́ hɛtənɑ nyɑ́ təmlɛ tʋ mɑɣɑ teu.
Sɛɣɛsɩ-m nyɑ́ kʋsəsɩɩtʋ.
136 Wɑɑtʋ wei mɑ nɑɑkɩ sɩ pɑɑ tɔkəɣɩ nyɑ́ kiiu tɔ
mɑ lukiɣi ɩsəlʋm kɛ́.
Tɑcɑɑ kiiu siɣisɑɑ
137 Hɑɩ, Tɑcɑɑ, n kɛ́ siɣisilu kɛ́,
nɑ ń təŋəɣɩ tɑmpɑnɑ kɛ nyɑ́ hʋʋlɛ tɑɑ.
138 Nyɑ́ kʋsəsɩɩtʋ siɣisɑɑ kɛ nɑ tə kɛ́ tɑmpɑnɑ.
139 Wɑɑtʋ wei mɑ nɑɑkɩ mɑ kolontunɑɑ sɔɔkɩ nyɑ́ tɔm tɔ,
pɑ́ɑ́nɑ́ sɔsɔɔnɑ kpɑɑkɩ-m kɛ́.
140 Nyɑ́ tɔm lɑpɑ tə təmlɛ.
Nɑ nyɑ́ təmlɛ tʋ mɑ́, mɑ sɔɔlɑ-tɩ.
141 Mɑɣɑ səkpelu kɛ́,
nɑ nɔɣɔlʋ ɩɩ cɑɑkɩ-m.
Amɑ mɑ tɑ sɔɔ nyɑ́ kʋsəsɩɩtʋ tɔɔ.
142 Nyɑ́ siɣisuɣu kɛ́ tɑm nyəŋkʋ kɛ́,
nɑ nyɑ́ kiiu kɛ tɑmpɑnɑ.
143 Lɑŋwɑkəllɛ nɑ nəɣəsɛɛ pə hikɑ-m.
Amɑ mɑ lɑŋlɛ hɛɛkənɑ nyɑ́ kiiŋ.
144 Nyɑ́ kʋsəsɩɩtʋ siɣisinɑ tɑm tɔɔ.
Hɑ-m lɑɣɑtʋ nɑ mɑ́ wɛɛnɑ weesuɣu.
Mɑ mɑɣɑsəɣɩ nyɑ́ kʋsəsɩɩtʋ tɔm kɛ ɑhoo tənɑ
145 Mɑ yɑɑkɩ-ŋ nɑ mɑ lotu tənɑɣɑ.
Tɑcɑɑ cɔ-m ɩlɛnɑ mɑ́ tɔkɩ nyɑ́ kʋsəsɩɩtʋ.
146 Mɑ yɑɑkɩ-ŋ, wɑɑsɩ-m.
Ɩlɛnɑ mɑ tɔkɩ nyɑ́ kʋsəsɩɩtʋ.
147 Mɑ kʋləɣɩ nɑ pə́cɔ pə́ nyɑɑlɩ
nɑ mɑ́ sələmɩ sɩ ń wɑɑsɩ-m.
Mɑ tɑŋnɑ tɛɛlʋɣʋ kɛ nti n kɑ́ yɔɣɔtɩ tɔ.
148 Mɑɑ kpəkɩ ɩsəlɛ, hɑlənɑ pə́ nyɑɑlɩ
nɑ mɑ́ mɑɣɑsɩ nyɑ́ tɔm.
149 Tɑcɑɑ n kɛ kʋpɑŋ kɛ́, ɩlɛ nɩɩ mɑ nɔɣɔ,
nɑ ń hɑ-m weesuɣu ɩsɩɩ n sɩɩwɑ tɔ.
150 Mpɑ pɑ huliɣi ɩsɑɣɑtʋ wɑɑlɩ tɔ pɑ kpɛɣɛtɑɑ,
nɑ pɑ́ hɑtələɣənɑ kiiu.
151 Hɑɩ, Tɑcɑɑ, n kpətənɑ-m kɛ́
nɑ nyɑ́ kʋsəsɩɩtʋ tənɑ kɛ́ tɑmpɑnɑ.
152 Hɑtoo lɔŋ kɛ mɑ nyəmɑ́ sɩ
n sɩɩ nyɑ́ kʋsəsɩɩtʋ kɛ tɑm tɔɔ.
Tɑcɑɑ yɑ-m nyɑ́ kʋpɑntʋ tɔɔ
153 Nyənɩ mɑ wɑhɑlɑ nɑ ń wɑɑsɩ-m.
Mpi tɔ, mɑɑ sɔɔkɩ nyɑ́ kiiu.
154 Yoonɑ mɑ nɔɣɔ nɑ ń yɑ-m,
nɑ ń hɑ-m weesuɣu ɩsɩɩ n yɔɣɔtʋɣʋ tɔ.
155 Asɑɣɑɑ kɑɑ nɑ nyʋɣʋ yɑpʋ.
Mpi tɔ, pɑɑ pɛɛkəɣɩ nyɑ́ kʋsəsɩɩtʋ.
156 Hɑɩ, Tɑcɑɑ, nyɑ́ sɔɔlʋɣʋ tɔɔwɑɣɑ.
Hɑ-m weesuɣu ɩsɩɩ n mɑɣɑsɑɑ tɔ.
157 Mɑ kolontunɑɑ nɑ mɑ kʋnyɔntʋlɑɑ tɔɔwɑɣɑ.
Mɑɑ hɑtələɣənɑ nyɑ́ kiiŋ.
158 Mɑ tɑɑ kpɑɑkənɑ wɑɑlɩ lɩɩlɑɑ
mpɑ pɑɑ tɔkəɣɩ nyɑ́ tɔm tɔɣɔ.
159 Tɑcɑɑ nyənɩ mɑ sɔɔlɑ nyɑ́ kʋsəsɩɩtʋ kɛ́.
Ɩlɛ hɑ-m weesuɣu kɛ nyɑ́ kʋpɑntʋ tɔɔ.
160 Nyɑ́ tɔm kite ntɛ́ tɑmpɑnɑ,
nɑ nyɑ́ siɣisuɣu kiiŋ tənɑ wɛ tɑm tɔɔ.
Tɑcɑɑ kiiu sɔɔllɑɑ hɛɛsɑɑ kɛ́
161 Awulumpiyɑ tʋɣʋ-m wɑhɑlɑ kɛ mʋsʋŋ.
Amɑ nyɑ́ kʋyɔɣɔtʋtʋ tike kɛ mɑ seliɣinɑ.
162 Mɑ lɑŋlɛ hɛɛkənɑ nyɑ́ nɔɔsɩ sɩɩʋ kɛ́.
Ɩsɩɩ wei ɩ hikɑ wɛnɑʋ sɔsɔɔm tɔ.
163 Mɑ tɑɑ kpɑɑkənɑ pɔpɔtʋ kɛ́,
nɑ mɑ nyənəɣɩ-təɣɩ ɑcɑɑlətʋ.
Amɑ nyɑ́ kiiu kɛ mɑ sɔɔlɑɑ.
164 Pɑɑ kʋyɑkʋ ŋku tɔm nɑɑtosompɔɣɔlɑɣɑ kɛ mɑ sɛɛkɩ-ŋ.
Mpi tɔ nyɑ kiiŋ siɣisɑɑ kɛ́.
165 Mpɑ pɑ cɑɑkɩ nyɑ́ kiiu tɔ pɑ hɛɛsɑɑ kɛ́.
Wɑhɑlɑ nɔɣɔlʋ ɩɩ mɑkənɑ-wɛ.
166 Hɑɩ, Tɑcɑɑ, mɑ tɛɛlʋɣʋ ntɛ́ sɩ n kɑ́ yɑ-m,
nɑ mɑ tɔkɑ nyɑ́ kʋsəsɩɩtʋ.
167 Mɑ təŋəɣɩ nyɑ́ kʋtʋtʋtʋ kɛ́,
nɑ mɑ sɔɔlɑ-təɣɩ teu.
168 Mɑ tɔkɑ nyɑ́ kʋtʋtʋtʋ kɛ́ nɑ nyɑ́ kʋsəsɩɩtʋ.
Mpi tɔ, n nɑɑkɩ mɑ mpɑɑŋ tənɑɣɑ.
Tɑcɑɑ nɩɩ mɑ wulɑ
169 Hɑɩ, Tɑcɑɑ, nɩɩ mɑ wulɑ
nɑ ń hɑ-m lɑɣɑtʋ ɩsɩɩ n sɩɩʋ tɔ.
170 Nɩɩ mɑ wiinɑʋ nɑ ń wɑɑsɩ-m
ɩsɩɩ n sɩɩʋ nɔɣɔ tɔ.
171 Mɑ nɔɣɔ ɩ́ kpɑɑlɩ nyɑ́ sɑmtʋ.
Mpi tɔ, n sɛɣɛsəɣɩ-m nyɑ́ kʋsəsɩɩtʋ.
172 Mɑ nsəmlɛ ɩ́ yoo nyɑ́ nɔɣɔ sɩɩʋ tɔm.
Mpi tɔ, nyɑ́ kʋsəsɩɩtʋ kɛ kʋsiɣisitu kɛ́.
173 Kʋsɩ nyɑ́ niŋ nɑ ń wɑɑsɩ-m.
Mpi tɔ, nyɑ́ kʋtʋtʋtʋ kɛ mɑ ləsɑɑ.
174 Hɑɩ, Tɑcɑɑ, nyɑ́ yɑpʋ tɔɔ kɛ́ mɑ səkɩ
nyɑ́ kiiu hɛɛsəɣənɑ mɑ lɑŋlɛ.
175 Yele mɑ́ wɛɛnɑ weesuɣu nɑ mɑ́ sɑ́-ŋ́,
nɑ nyɑ́ hʋʋlɛ wɑɑsɩ-m.
176 Mɑ kɛ́ cɔɔlʋ kɛ́ ɩsɩɩ heu kʋlepu,
pɛɛkɩ nyɑ́ təmlɛ tʋ mɑ́.
Mpi tɔ, mɑɑ sɔɔkɩ nyɑ́ kʋsəsɩɩtʋ.