140
Yʋlʋ wei pɑ suuki tɔm tɔ ɩ sələmʋɣʋ
1 Tɑfiiti yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
2 Tɑcɑɑ wɑɑsɩ-m yəlɑɑ ɑsɑɣɑɑ niŋ tɑɑ,
nɑ ń kenti-m mʋsʋŋtʋnɑɑ.
3 Ɩsɑɣɑtʋ kɛ pɑ mɑɣɑsəɣɩ pɑ tɑɑ,
nɑ pɑ́ pɛɛkəɣɩ yoou kɛ pɑɑ kʋyɑkʋ ŋku.
4 Pɑ niisiɣi pɑ nɔɔsɩ ɩsɩɩ tʋmɑɑ.
Akɑlɑ sɔtʋ wɛnnɑ pɑ ntompee tɔɔ.
5 Pɑɑsənɑ-m nɑ mɑ́ tɑɑ hoti ɑsɑɣɑɑ niŋ tɑɑ.
Tɑcɑɑ kenti mɑ tɔɔ kɛ́ mʋsʋŋtʋnɑɑ mpɑ pɑ
cɑɑ-m pɛtʋɣʋ tɔ pɑ tɔɔ.
6 Kɑlɑmpɑɑnɩ nyə́mɑ nyəpɑ-m kɑtɔkɑ.
Pɑ nyəpɑ-m ŋmɩɩsɩ nɑ puluŋ kɛ mɑ mpɑɑʋ tɑɑ sɩ pɑ kpɑɑkɩ-m.
Ɩlɛnɑ pɑ́ sɩɩ kʋhuhum kɛ mpɑɑʋ nɔɣɔ.
7 Tɑcɑɑ, nyɑɣɑlɛ mɑ Ɩsɔ,
ke ŋkpɑŋŋ nɑ ń nɩɩ mɑ wiinɑʋ.
8 Tɑcɑɑ Ɩsɔ, nyɑɣɑlɛ mɑ nyʋɣʋ təyɑtɛ toŋ nyəntɛ.
N kentiɣi mɑ nyʋɣʋ tɔɔ kɛ́ yoou wɑɑtʋ.
9 Tɑɑ lɑ ɑsɑɣɑɑ luɣu nyəntʋ,
pə́cɔ tɑɑ yele nɑ pɑ kʋmɑɣɑsəm lɑ́
nɑ pə́ kɔɔ nɑ pɑ́ hɔ pɑ tɩ.
10 Mpɑ pɑ tɑmɑ-m tɔ,
pɑ ɩsɑɣɑtʋ ɩ́ hoti pɑ nyɔɔŋ tɑɑ.
11 Pə́ pəlɩ-wɛɣɛ kɔkɔ mɑmɑlɑ.
Pə́ tusi-wɛɣɛ kɔkɔ tɑɑ.
Pə́ pɛtɩ-wɛɣɛ pʋʋɣʋ sɔsɔɔʋ tɑɑ.
Pɑ́ tɑɑ tɑsɑ kʋlʋɣʋ.
12 Nɔɔleleŋ nyə́mɑ ɩ́ tɑɑ cɑɣɑ tɛtʋ tɑɑ.
Pɑɑ tɔɣɔnɩ ɑsɑɣɑɑ nɑ mʋsʋŋtʋnɑɑ kɛ́, hɛɛsʋɣʋ fɛɩ.
13 Mɑ nyəmɑ́ teu sɩ Tɑcɑɑ hʋʋkənɑ wɑhɑlɑ nyə́mɑ tɔm kɛ teu
nɑ ɩ́ hɑɑkɩ kʋnyɔntʋnɑɑ kɛ siɣisuɣu.
14 Tɑcɑɑ, tɑmpɑnɑ təŋlɑɑ kɑ́ sɑnɑ nyɑ́ hətɛ
nɑ siɣisilɑɑ cɑɣɑ nyɑ́ ɩsɛntɑɑ.