22
Wei pɑ lɔwɑ tɔ ɩ wɑɑsʋɣʋ
1 Tɑfiiti yontu nti pɑ yookinɑ tefemle nɑm luɣu,
nɑ tə́ wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Hɑɩ, mɑ Ɩsɔ yoou,
pepe tɔɔ kɛ́ n lɔ-m?
N hɑtələnɑ-m suwe,
nɑ nn nɩɩkɩ mɑ wulɑ sɩ ń wɑɑsɩ-m?
3 Hɑɩ, Ɩsɔ, mɑ wiikinɑ-ŋ ilim ilim nn cɔɔkɩ,
nɑ ɑhoo ɑhoo mɑɑ hikiɣi tom.
4 Pɑɑ nɑ mpʋ nyɑɣɑlɛ Ɩsɔ Nɑŋŋtʋ
wei Ɩsɛɣɛlɩ nyə́mɑ sɑŋ tɔ.
5 Nyɑɣɑ tɑ́ cɔsɔnɑɑ tʋwɑ nɑɑni
ɩlɛnɑ ń yɑ-wɛ.
6 Pɑ wiinɑ-ŋ nɑ ń yɑ-wɛ,
pɑ pɛtɑ-ŋ pɑ tɩ tɔ fɛɛlɛ tɑ tɔɣɔ-wɛ.
7 Amɑ mɑ pəsɑ kɛ́ ɩsɩɩ ɑtɑntɑɑlʋ pə tɑɣɑ yʋlʋ,
nɑ yəlɑɑ tənɑ tʋʋkɩ-m nɑ pɑ footiɣi-m.
8 Pɑ tənɑ mpɑ pɑ nɑɑkɩ-m tɔ pɑ tuluɣu-m ntompee
nɑ pɑ́ hooki-m ɩsɛ nɑ pɑ́ footiɣi-m sɩ:
9 Ntɔŋ Tɑcɑɑ kɛ n pɛtɑ nyɑ́ tɩ yɑɑ,
Tɑcɑɑ ɩ́ ləsɩ-ŋ pə tɑɑ.
Ntɔŋ Tɑcɑɑ sɔɔlɑ-ŋ yɑɑ,
Tɑcɑɑ ɩ́ wɑɑsɩ-ŋ.
10 Tɑcɑɑ, nyɑ́ ləsənɑ-m mɑ too tɑɑ,
nɑ ń pɑpəsɩ-m ɩ həlɑ tɔɔ nɑ nɑɑni.
11 Hɑtoo mɑ hɔɔʋ tɛɛ nyɑ́ tɔɔ kɛ́ mɑ wɛɛ,
nɑ n kɛ́ mɑ Ɩsɔ.
12 Tɑɑ hɑtələnɑ-m mɑ wɑhɑlɑnɑɑ wɑɑtʋ,
nyɑɣɑlɛ mɑ sənlʋ nɔɣɔlʋ fɛɩ.
13 Mɑ kolontunɑɑ tɑmɑ-m kɛ́ ɩsɩɩ lɑtəcɛnɑɑ,
pɑ tʋ-m hɛkʋ kɛ́ ɩsɩɩ tɑɑlɛ nɑɑŋ keesɑsɩ.
14 Pɑ hɑɑkɩ nɔɔsɩ nɑ mɑ tɔɔ kɛ́ ɩsɩɩ tɔɣɔlɑɣɑ
cəlʋɣʋ kɑ tɔɣɔnɑɣɑ nɑ kɑ́ nyɩɩsəɣɩ tɔ.
15 Mɑ tomɑ tɛmɑɣɑ ɩsɩɩ lʋm kpeŋuɣu ɑtɛ tɔ,
nɑ mɑ tətɑntɛnɑɑ tɑɑ cɛ́.
Ɩlɛnɑ mɑ ɑpɑlʋtʋ hoo mɑ tɑɑ ɩsɩɩ keetu.
16 Mɑ luɣu tɛɛ wʋlɑɑ kɛ́ təpuɣupuɣu,
nɑ mɑ nsəmlɛ mɑtənɑ mɑ tɑntɑhɑɑʋ.
N sɩɩ-m mʋsʋɣʋ tɑɑ kɛ́ ɩsɩɩ mɑ tɛmɑ səpʋ.
17 Asɑɣɑɑ kpekəle tɑmɑ-m kɛ́.
Hɑsɩ nsɩ sɩ tʋ-m hɛkʋ.
Pɑ tʋlɑ mɑ niŋ nɑ mɑ nɔntɑɑləŋ kɛ pɔɔŋ.
18 Mɑ wʋlɑɑ kɛ́ nɑ mɑ́ yele mʋwɑ tike
nɑ mɑ kolontunɑɑ nyənəɣɩ-m təcooo.
19 Pɑ tɑlɑ mɑ wontu.
Ɩlɛnɑ pɑ́ tɔ tɛtɛ kɛ́ mɑ kpɑɩ tɔɔ.
20 Hɑɩ, Tɑcɑɑ, tɑɑ hɑtələnɑ-m.
Nyɑɣɑlɛ mɑ toŋ.
Kɔɔ mɑ wɑɑsʋɣʋ kɛ lɔŋ.
21 Yɑ-m lɑɣɑtɛ nɔɣɔ tɑɑ.
Ləsɩ-m hɑsɩ nsɩ sɩ kelɑ tɑɑ.
22 Wɑɑsɩ-m tɔɣɔlɑsɩ nsɩ sɩ nɔɣɔ tɑɑ,
nɑ tɑɑlɛ nɑɑŋ ɩnɩ ɩ həŋ tɑɑ.
Hɑɩ, nɩɩ mɑ kʋsələmətʋ.
23 Mɑɑ heeli nyɑ́ tɔm kɛ mɑ cɑmnɑnɑɑ,
nɑ mɑ́ sɑ-ŋ sɑmɑɑ tɑɑ.
24 Tɑcɑɑ yəlɑɑ mɛ ɩ́ sɑmɩ-ɩ
Yɑkɔpʋ lʋlʋɣʋ nyə́mɑ mɛ ɩ́ tʋ-ɩ teeli.
Ɩsɛɣɛlɩ nyə́mɑ mɛ ɩ́ sɛɛ-ɩ.
25 Mpi tɔ, Tɑcɑɑ nn footiɣi wɑhɑlɑ tʋ nɔɣɔlʋ
yɑɑ ń nyənɩ-ɩ səkpelu
pə́cɔ nn hɑɑkɩ-ɩ siɣile.
Amɑ ye wɑhɑlɑ tʋ wiinɑ-ŋ, n nɩɩkɩ kɛ́.
26 Tɑcɑɑ nyɑ́ kʋlɑpʋtʋ tike kɛ mɑ sɑŋ sɑmɑɑ tɑɑ.
Ɩlɛnɑ mɑ lɑ-ŋ kɔtɑsɩ nsi
mɑɑ sɩɩ nɔɣɔ tɔɣɔ nyɑ́ sɛɛlɑɑ ɩsɛntɑɑ.
27 Kʋnyɔntʋnɑɑ kɑ tɔɣɔ nɑ pɑ́ hɑɣɑ.
Tɑcɑɑ nyɑ́ pɛɛkəlɑɑ ɩ́ sɑ-ŋ.
Nɑ pə́ cɑɣɑnɑ-wɛɣɛ tɑm.
28 Tɛtʋ tənɑsɩ tənɑ yəlɑɑ kɑ hʋʋ
Tɑcɑɑ nyɑ́ tɔm nɑ pɑɑ kɛɛsənɑ nyɑ́ tɔɔ.
Nɑ ɑtɛ yəlɑɑ tənɑ luŋ nyɑ́ tɛɛ.
29 Mpi tɔ, Tɑcɑɑ nyɑɣɑlɛ wulɑʋ sɔsɔ.
Nɑ ń tɔkɩ kɑwulɑɣɑ kɛ piitimnɑɑ tənɑ tɔɔ.
30 Tɛtʋ tɑɑ toŋtunɑɑ tənɑ kɑ́ tɔɣɔ nɑ pɑ́ həntɩ-ŋ ɑtɛ.
Nɑ yəlɑɑ tənɑ mpɑ pɑɑ tɛ nɑ pɑ́ sɩ tɔ pɑɑ luŋɩ-ŋ ɑkulɑ.
31 Pɑ lʋlʋŋ nyə́mɑ kɑ́ lɑ-ŋ təmlɛ
nɑ pɑ́ heeli nyɑ́ tɔm kɛ pɑ wɑɑlɩ piyɑ.
32 Nɑ pɛlɛ pɑ kɛɛsɩ pɛlɛ pɑ piyɑ kɛ
ɩsənɑ n wɑɑsɑ nyɑ́ yəlɑɑ tɔ.