27
Tɑcɑɑ kiŋ cɔɔsʋɣʋ
1 Tɑfiiti yontu.
Tɑcɑɑ nyɑɣɑlɛ mɑ fətəlɑ nɑ mɑ nyʋɣʋ yɑ́tʋ.
Mɑ kɑɑ nyɑnɑ nɔɣɔlʋ.
Nyɑ́ kentiɣinɑ mɑ weesuɣu tɔɔ,
pʋlʋpʋ kɑɑ sʋsʋ-m wɑtʋ.
2 Ye ɑsɑɣɑɑ kɔŋ mɑ cəlʋɣʋ ɩsɩɩ tɑɑlɛ wontu,
mpɛ pɑɑ hotinɑ ɑtɛ nɑ pə wɑkəlɩ-wɛ.
3 Pɑɑ yoolɑɑ tɑmɑ-m kotɑɣɑ sɔɣɔntʋ fɛɩ-m.
Pɑɑ pɑ sʋʋ-m yoonɑʋ mɑ wɛnɑ Ɩsɔ kɛ́ nɑɑni.
4 Kʋlʋmtʋ kɛ mɑ sələməɣɩ Tɑcɑɑ nɑ mɑ́ səkɩ tə tɔɔ.
Pə wɛɛ sɩ mɑ́ cɑɣɑ nyɑ́ təyɑɣɑ tɑɑ kɛ́ hɑlənɑ mɑ səm,
nɑ mɑ́ sɑ kɑ teu nɑ mɑ́ yɔɔlənɑ Ɩsɔ wɛɛʋ.
5 Nɑ ń ŋmɛsɩ-m nyɑ́ təyɑɣɑ tɑɑ,
nɑ ń kenti mɑ tɔɔ kɛ́ wɑhɑlɑ wɑɑtʋ.
Nɑ ń sɩɩ-m kʋkpɑmʋɣʋ tɔɔ sɩ pʋlʋ ɩ́ tɑɑ hiki-m.
6 Wɑɑtʋ ɩnəɣɩ mɑɑ kəlɩ mɑ kolontunɑɑ mpɑ pɑ cɔɔnɑ-m tɔ,
nɑ mɑ́ sɑ-ŋ nyɑ́ təyɑɣɑ tɑɑ nɑ mɑ́ lɑ-ŋ kɔtɑsɩ,
nɑ mɑ́ yoo-ŋ yontu nɑ mɑ́ tɑlɑ-ŋ.
7 Tɑcɑɑ nyənɩ mɑ pətɔɔtəlɛ,
nɑ ń nɩɩ sɑɑ wei mɑ yɑɑkɩ-ŋ tɔ.
8 Mɑ tɔɔsɑ nti n sɩɩwɑ sɩ mɑ́ kɛɛsənɑ nyɑ́ tɔɔ tɔ.
Tɑcɑɑ pə tɔɔ kɛ́ mɑ kɛɛsəɣənɑ nyɑ́ tɔɔ.
9 Ɩsɔ nyɑ́ wɑɑsəɣənɑ-m.
Tɑɑ hɑ nyɑ́ sɛɛlʋ mɑɣɑ siɣile yɑɑ ń lɔ-m nɑ pɑ́ɑ́nɑ́.
10 Pɑɑ mɑ too nɑ mɑ cɑɑ pɑ lɔ-m,
Tɑcɑɑ, nyɑ́ mʋɣʋnɑ-m.
11 Tɑcɑɑ, hʋlʋ-m mpɑɑʋ ŋku n cɑɑ mɑ́ təŋ tɔ.
Mpi tɔ, mɑ kolontunɑɑ yookinɑ-m.
Tiiki-m kʋsiɣisuɣu tɑɑ.
12 Tɑɑ yele nɑ mɑ kolontunɑɑ
lɑnɑ-m ɩsənɑ pɑ cɑɑkɩ tɔ.
Mpi tɔ, pɔpɔtʋ ɑseetɑ nyə́mɑ mpɛ,
pɑ nyɑɑsəɣɩ-m kɛ́.
13 Ye mɑ tɑɑ wɛɛnɑ nɑɑni kɛ́
Tɑcɑɑ kʋpɑntʋ tɔɔ kɛ́ ɑtɛ cənɛ,
ɩsənɑɣɑ mɑɑ lɑpɑ?
14 Tɑŋ Tɑcɑɑ,
kɑɑsɩ nyɑ́ tɩ
nɑ ń tɔɣɔ ɑpɑlʋtʋ.
Tɑŋ Tɑcɑɑ.