84
Mpɑ pɑ puki Yosɑlɛm kɛ ɩsɔsɛɛʋ tɔ pɑ yontu
1 Kolee nyə́mɑ kpekəle yontu nti pɑ yookinɑ Kɑtɩ tʋ cəmʋɣʋ
nɑ tə́ wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Hɑɩ, Tɑcɑɑ, pə tənɑ pə tʋ,
nyɑ́ təcɑɣɑlɛ tewɑɣɑ hɑlɩ.
3 Pɩɩ lɑkɩ-m lɔŋ sɩ mɑ́ sʋʋ Tɑcɑɑ təyɑɣɑ tɑɣɑ tɔɔ
nɑ mɑ́ sɑ́ Ɩsɔ weesuɣu tʋ nɑ lɑŋhʋlʋmlɛ kɑwilitɑsɩ.
4 Sumpɩʋpɩʋ wɛnɑ ɩ təcɑɣɑlɛ,
nɑ keŋkehilɑɣɑ kɛ tɑntɛ nte
tə tɑɑ kɑ tʋɣɩ kɑ piiŋ tɔɣɔ
nyɑ́ kɔtɑsɩ təlɑtɛ kiŋ.
Hɑɩ, mɑ wulɑʋ nɑ mɑ Ɩsɔ.
Tɑcɑɑ, pə tənɑ pə tʋ.
5 Leleŋ nɩɩlɑɑ ntɛ́ mpɑ pɑ wɛ nyɑ́ təyɑɣɑ tɑɑ tɔ,
pɑɑ sɑŋɩ-ŋ tɑm tɔɔ kɛ́.
6 Mpɑ pɑ tekiɣi-ŋ tɔɣɔlɛ lɑŋhʋlʋmlɛ nyə́mɑ,
nyɑ́ hɑsəɣənɑ pɑ nɔɔhɛɛ tɛɛ.
7 Wɑɑtʋ wei pɑɑ tɛsəɣɩ Pɑkɑ*fɑ* tɛtɛkəlɛ tɔ,
Ɩsɔ kɑ́ pəsɩ-tɛɣɛ hilɑ nyəntɛ,
nɑ sɑlɑŋ tɛʋ kooli-tɛɣɛ kʋpɑntʋ.
8 Pɑ toŋ sɔɔsəɣɩ pɑ tɔntɛ tɑɑ kɛ́,
nɑ pɑ́ kpətəɣənɑ timpi pɑɑ səŋ Ɩsɔ
ɩsɛntɑɑ kɛ́ Siyɔŋ tɔ.
9 Hɑɩ, Tɑcɑɑ, ɑtɛ nɑ ɩsɔtɑɑ pə tʋ nɩɩ mɑ kʋsələmʋtʋ.
Yɑkɔpʋ Ɩsɔ ke ŋkpɑŋʋɣʋ.
10 Hɑɩ, Ɩsɔ, nyɑɣɑlɛ tɑ́ kpɑntɛ,
nyənɩ wei n ləsɑɑ tɔ ɩ ɩsɛntɑɑ.
11 Kʋyɑkʋ kʋlʋmʋɣʋ cɑɣɑʋ kɛ nyɑ́ təyɑɣɑ tɑɑ
lɑpɑ sɑnɑ nɑ kʋyɛɛŋ iyɑɣɑ (1000) cɑɣɑʋ kɛ kpɑɩ tɑɑ.
Mɑ sɔɔlɑɑ sɩ mɑ́ səŋ mɑ Ɩsɔ təyɑɣɑ nɔnɔɣɔ
nɑ mpi mɑɑ cɑɣɑ ɩsɑɣɑtʋ nyəŋkɑ tɑɑ tɔ.
12 Tɑcɑɑ nyɑ́ həlɑ ntɛ́ ilim nɑ kpɑntɛ.
Nyɑ́ hɑɑnɑ pɛɛlɛɛ nɑ teeli.
Nn pɛŋ kʋpɑntʋ nɑtələɣɩ mpɑ
pɑ tɔŋ siɣisuɣu tɑɑ tɔ.
13 Atɛ nɑ ɩsɔtɑɑ pə tʋ Tɑcɑɑ,
wei ɩ tekiɣi-ŋ tɔɣɔlɛ lɑŋhʋlʋmlɛ tʋ.