85
Tɑcɑɑ yɔɣɔtəɣɩ hɛɛsʋɣʋ tɔm
1 Kolee nyə́mɑ kpekəle yontu nti tə wɛ
yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Hɑɩ, Ɩsɔ, n hʋlɑ nyɑ́ tɛtʋ kɛ pɛɛlɛɛ kɛ́,
nɑ ń məŋnɑ Yɑkɔpʋ nyə́mɑ mpɑ kolontunɑɑ kɑ kuuwɑ tɔ.
3 N kpiisɑ nyɑ́ yəlɑɑ ɩsɑɣɑtʋ
nɑ ń tɑɣɑnɩ pɑ təwɑkəllɛnɑɑ.
4 N kʋ nyɑ́ pɑ́ɑ́nɑ́ sɔsɔɔnɑ tənɑ
nɑ ń hɛɛsɩ-yɛɣɛ tɑ́ tɔɔ.
5 Hɑɩ, tɑ́ wɑɑsʋlʋ Ɩsɔ məŋnɑ-tʋ ɩsɩɩ tɩɩ wɛʋ tɔ,
nɑ ń kʋ nyɑ́ pɑ́ɑ́nɑ́ kɛ tɑ́ tɔɔ.
6 Nyɑ́ tɑɑ kɑ́ kpɑnɑ-tʋɣʋ tɑm tɔɔ
nɑ ń tɔkɩ-tʋ nɑ nyɑ́ tɑɑ nɑ pə́ polo
lʋlʋŋ loosi loosi nɑ?
7 N kɑɑ hɑ-tʋɣʋ weesuɣu
nɑ tə́ yɔɔlənɑ-ŋ?
8 Tɑcɑɑ yele nɑ tə́ nɑ́ nyɑ́ kʋpɑntʋ
nɑ ń yɑ́ tɑ́ nyʋɣʋ.
9 Ɩsɔ Tɑcɑɑ kʋyɔɣɔtʋtʋ kɛ mɑ nɩɩkɩ.
Mpi tɔ, hɛɛsʋɣʋ tɔm kɛ n yɔɣɔtəɣənɑ nyɑ́ yəlɑɑ
nɑ mpɑ pɑ nɩɩkənɑ-ŋ tɔ sɩ pɑ tɑɑ məlɩ kʋmɛlɛntʋ tɑɑ.
10 Nyɑ́ nyʋɣʋ yɑpʋ kpətənɑ mpɑ pɑ nyɑŋnɑ-ŋ tɔɣɔ
ɩlɛnɑ pə kɔnɑ nyɑ́ teeli kɛ tɑ́ tɛtʋ tɑɑ.
11 Kʋpɑntʋ nɑ tɑmpɑnɑ təŋʋɣʋ pə sulɑɑ,
nɑ hɛɛsʋɣʋ nɑ siɣisuɣu pə́ wɑɣɑlɩ təmɑ.
12 Tɑmpɑnɑ təŋʋɣʋ lɩɩkənɑ tɛtʋ tɛɛ kɛ́,
ɩlɛnɑ siɣisuɣu nɑ́ɑ́ lɩɩnɑ ɩsɔtɑɑ.
13 Tɑcɑɑ mɑɣɑmɑɣɑ kɑ́ kɔnɑ kʋpɑntʋ
nɑ tɑ́ tɛtʋ nɑ́ɑ́ lʋlɩ tə kʋlʋlʋm.
14 Tɑmpɑnɑ təŋʋɣʋ wɛ nyɑ́ nɔɣɔ tɔɔ kɛ́
nɑ ɑ́ hɛɛkɩ-ŋ ɩkpɑtɛ kɛ mpɑɑʋ tɑɑ.