88
Wei səm kpɛɣɛtənɑɑ tɔ ɩ sələmʋɣʋ
1 Kolee nyə́mɑ kpekəle yontu nti tə wɛ
yonyoolɑɑ nyʋɣʋ tʋ yontunɑɑ tɑɑ,
nɑ tə́ kɛ́ lɑŋwɑkəllɛ nyəntʋ nti
Ɩsəlɑhi tʋ Hemɑŋ yoowɑ tɔɣɔlɔ.
2 Tɑcɑɑ Ɩsɔ, mɑ nyʋɣʋ yɑ́tʋ,
ilim nɑ ɑhoo kɛ mɑ wiikinɑ-ŋ.
3 Mʋ mɑ kʋsələmʋtʋ kɛ nyɑ́ kʋpɑntʋ tɔɔ.
Ke ŋkpɑŋʋɣʋ nɑ ń nɩɩ mɑ wiinɑʋ.
4 Mpi tɔ, wɑhɑlɑ nɩɩ-m kɛ́,
nɑ mɑ́ kpɛɣɛtənɑ səm tətɛɣɛtɛɣɛ.
5 Mɑ wɛ mpɑ pɑ tiiki pəlɑɑʋ tɑɑ tɔ pɑ looŋɑ tɑɑ kɛ́.
Mɑ wɛ ɩsɩɩ yʋlʋ wei ɩ fɛɩnɑ toŋ tɔ.
6 Sətɑɑ hɛkʋ kɛ mɑ həntɑɑ
nɑ mɑ́ nəɣəsənɑ ɩsɩɩ mpɑ pɑ kʋwɑ nɑ pɑ́ hɩɩsɩ
pəlɑɑʋ tɑɑ nɑ pə́ fɑɣɑ nyɑnɑ-wɛ,
nɑ nn tɔɔsəɣɩ pɑ tɔm tɔ.
7 Pʋʋɣʋ lumɑŋ nyəŋkʋ tɑɑ kɛ́ n pɛtɑ-m,
səkpɛtʋɣʋ tɑɑ kɛ́ pʋʋɣʋ ɑnɑɑm tɑɑ.
8 Nyɑ́ pɑ́ɑ́nɑ́ tii mɑ tɔɔ kɛ́
nɑ ɑ́ tɑ-m ɩsɩɩ lʋm holɑ.
9 N hɑtələnɑ-m mɑ cewɑɑ
nɑ ń pəsɩ-m ɩsɩɩ ɑcɑɑlətʋ
pʋlʋ kɛ pɑ ɩsɛntɑɑ.
Pə təkɑ-m pə fɛɩ lɩɩʋ.
10 Wɑhɑlɑ nyəŋsɑ mɑ ɩsɛ kɛ́.
Pɑɑ ɩfemle nteɣe mɑ yɑɑkɩ-ŋ Tɑcɑɑ,
nɑ mɑ́ tɛkəɣɩ-ŋ niŋ.
11 Sətɑɑ kɛ n lɑkɩ piti təmɑ nɑ?
Pɑɑ kʋlɩ nɑ pɑ́ sɑ-ŋ?
12 Sətɑɑ yɔɣɔtəɣɩ nyɑ́ kʋpɑntʋ tɔm kɛ pɑ tɛɣɛ?
Yɑɑ nyɑ́ teu tɔm kɛ pɑ yɔɣɔtəɣɩ ɑtɛtəlɛ tɑɑ?
13 Nɔɣɔlʋ tɑ nyɩ nyɑ́ kɔkɔlɔ
nyəmnɑɑ tɔm kɛ səkpɛtʋɣʋ tɑɑ.
Pəyele pɑ tɑ nyɩ nyɑ́ siɣisuɣu tɔm kɛ
tɛtʋ nti tə tɑɑ yəlɑɑ wɛnɑ ləsɔɔʋ tɔ.
14 Hɑɩ, Tɑcɑɑ, nyɑɣɑ mɑ yɑɑkɩ sɩ ń wɑɑsɩ-m
nɑ mɑ́ sələməɣɩ-ŋ pɑɑ tɑnɑŋ ŋku.
15 Tɑcɑɑ, pepe tɔɔ kɛ́ n lɔ-m
nɑ nn cɑɑkɩ sɩ ń nɑ-m?
16 Mɑ kɛ́ kʋnyɔntʋ kɛ hɑtoo mɑ pəcɑɑtʋ kɛ́
nɑ mɑ́ wɛ səm nɔɣɔ tɑɑ,
nɑ mɑ́ tɔkɩ sɔɣɔntʋ nti n tʋ-m tɔ tə wɑhɑlɑ.
Pə pəsɑ mɑ lɑŋlɛ kɛ́.
17 Nyɑ́ pɑ́ɑ́nɑ́ huunɑ-m kɛ́ ɩsɩɩ kɔkɔ,
nɑ nyɑ́ sɔɣɔntʋ sɔsɔɔntʋ wɑkələɣɩ-m.
18 A liki-m pɑɑ ɩfemle nteɣe ɩsɩɩ lʋm
nɑ ɑ́ wɑtəɣɩ-m nɑ pɑɑ timpi.
19 N hɑtələnɑ-m mɑ cewɑɑ nɑ mɑ tɑɑpɑlɑɑ tənɑ,
səkpɛtʋɣʋ kɛ pə yelinɑ-m.