89
Nɔɔsɩ nsi pɑ sɩɩ Tɑfiiti tɔ sɩ wɛ le?
1 Ɩsəlɑhi tʋ Ɩtɑŋ yontu.
2 Tɑcɑɑ nyɑ́ kʋpɑntʋ tɔm kɛ mɑɑ yooki yontu kɛ tɑm,
nɑ mɑ heeliɣi nyɑ́ tɑmpɑnɑ təŋʋɣʋ tɔm kɛ pɑɑ pəlee.
3 Mpi tɔ, mɑ yɔɣɔtɑɑ sɩ:
Nyɑ́ kʋpɑntʋ wɛ tɑm tɔɔ kɛ́ nɑ tə sikɑ ɩsɔtɔnʋɣʋ tɑɑ.
4 Mɑ nɑ mɑ təmlɛ tʋ Tɑfiiti wei mɑ ləsɑɑ tɔ tə pɛɛlɑ nɔɣɔ
hɑlənɑ mɑ́ yɔɣɔtɩ nɑ mɑ́ tuu sɩ:
5 Mɑɑ yele nɑ nyɑ́ kɑwulɑɣɑ wɛɛ tɑm,
nɑ mɑ́ lɛɛtəɣɩ kɑ tɑɑ kɛ́ nyɑ́ lʋlʋɣʋ nyə́mɑ.
6 Hɑɩ, Tɑcɑɑ, ɩsɔtɔnʋɣʋ hʋləɣənɑ nyɑ́ teu
nɑ nyɑ́ kʋpɑntʋ kɛ sɑmɑɑ tɑɑ.
7 Awe pəsəɣɩ nɑ ɩ́ kɛɛsənɑ Tɑcɑɑ nyɑɣɑ ɩsɔtɑɑ?
Nyɑ́ pəyɑlɑɑ tɑɑ ɑwe nəɣəsənɑ-ŋ?
8 Ɩsɔ n kɛ́ sɔsɔ kɛ ɩsɔtɑɑ sɑmɑɑ tɑɑ kɛ́,
nɑ pɑ tənɑ mpɑ pɑ cɔɔnɑ-ŋ tɔ pɑ nyɑŋnɑ-ŋ.
9 Hɑɩ, Tɑcɑɑ, ɑtɛ nɑ ɩsɔtɑɑ pə tʋ,
ɑwe wɛ ɩsɩɩ nyɑ́?
Tomɑ nɑ teu pə tʋ-ŋ hɛkʋ.
10 Nyɑ́ ŋmɑkələnɑ teŋku nɑ ɩ kɑlɑmpɑɑnɩ,
n hɛɛsəɣɩ ɩ lʋm kɛ wɑɑtʋ wei pə kʋləɣənɑ pɑ́ɑ́nɑ́ tɔ.
11 Nyɑ́ nɑŋtənɑ Icipiti ɩsɩɩ sətʋ,
nɑ ń yɑsɩ nyɑ́ kolontunɑɑ nɑ nyɑ́ niŋ toŋ.
12 Nyɑ́ tənnɑ ɩsɔtɔnʋɣʋ nɑ tɛtʋ.
Nyɑ́ sɩɩnɑ ɑntulinyɑ nɑ ɩ tɑɑ nyəm tənɑ.
13 Nyɑ́ lɑpənɑ ilim ntɔɣɔŋ nɑ pə mpətəŋ
nɑ Tɑpɔɔ nɑ Hɛɛmɔŋ pʋʋŋ sɑŋ nyɑ́ hətɛ.
14 Nyɑɣɑlɛ toŋ sɔsɔɔŋ tʋ,
nyɑɣɑlɛ pəsʋɣʋ sɔsɔɔŋkʋ tʋ.
15 Nyɑ́ kɑwulɑɣɑ kite ntɛ́ tɑmpɑnɑ təŋʋɣʋ nɑ siɣisuɣu
nɑ kʋpɑntʋ nɑ teu kɛ nyɑ́ nɔɣɔ tɔɔ.
16 Yəlɑɑ mpɑ pɑ nyəmɑ́ nyɑ́
ɑkɑntəlɛ wulɑ tɔɣɔlɛ leleŋ nɩɩlɑɑ,
nyɑ́ ɩsɛntɑɑ kɛ́ pɑ wɛ tɑm.
17 Pɑ lɑŋlɛ hɛɛnɑ nyɑ́ hətɛ kɛ kʋtɑmsɑ,
nɑ pɑ́ sɑŋ pɑ tɩ nɑ nyɑ́ siɣisuɣu.
18 Pɑ toŋ teeli kɛlɛ nyɑ́,
nyɑ́ kʋpɑntʋ kpɑɑsəɣənɑ tɑ́ toŋ.
19 Tɑcɑɑ kɛlɛ tɑ́ kʋkentuɣu,
Ɩsɛɣɛlɩ nɑŋŋ tʋ ntɛ́ tɑ́ wulɑʋ.
20 Kʋyɑkʋ nɑkʋlɩ n yɔɣɔtənɑ
nyɑ́ kʋsɔɔlʋ kɛ toosee tɑkɑ tɑɑ sɩ
n hɑ nyɑ́ toŋ kɛ ɑkɑ,
nɑ ń tɔɔ ɩfepu kɛ yəlɑɑ tɑɑ.
21 N hikɑ nyɑ́ təmlɛ tʋ Tɑfiiti,
nɑ ń ləsɩ-ɩ nɑ ń pəlɩ-ɩ kɔtɑɣɑ nim.
22 N kɑ́ sənɑ-ɩ nɑ toŋ,
nɑ ń pəsɩ-ɩ yʋlʋ toŋ tʋ.
23 Kolontu kɑɑ tuti-ɩ,
yʋlʋ ɩsɑɣɑʋ nɑ́ kɑɑ pəsɩ-ɩ.
24 Nkɑ nɑŋtɩ ɩ kolontunɑɑ kɛ ɩ nɔɣɔ tɔɔ,
nɑ ń mɑ́ mpɑ pɑɑ cɑɑkɩ-ɩ tɔ.
25 N kɑ́ lɑpɩ-ɩ nyɑ́ kʋpɑntʋ,
nɑ ɩ toŋ kpɑɑkənɑ nyɑ́ hətɛ.
26 N kɑ́ tʋ ɩ niŋ tɑɑ kɛ́ teŋku,
nɑ ń yele nɑ ɩ́ pəsɩ pusi.
27 Hɑlɩ n kɑ́ yɑɑ-ɩ nɑ ɩ́ tɔ sɩ:
Nyɑɣɑlɛ mɑ cɑɑ Ɩsɔ nɑ mɑ nyʋɣʋ yɑpʋ kʋkpɑmʋɣʋ.
28 Ɩlɛnɑ nyɑɑ pəsɩ-ɩ nyɑ́ pəyɑlʋ kɑncɑɑlɑɣɑ nyəŋ
wei ɩ kɛ́ ɑtɛ ɑwulɑɑ sɔsɑɑ tənɑ tɑɑ sɔsɔ tɔ.
29 N kɑ́ sɩɩ-ɩ kʋpɑntʋ kɛ tɑm tɔɔ,
pəyele nɔɣɔ ŋkɑ nyɑ́ nɑ-ɩ
ɩ́ pɛɛlɑɑ tɔ kɑ kɑɑ lɑɣɑsɩ.
30 N kɑ́ yele nɑ ɩ lʋlʋɣʋ nyə́mɑ wɛɛ tɑm tɔɔ,
nɑ ɩ kɑwulɑɣɑ nɑ́ɑ́ leeli ɩsɩɩ ɩsɔtɔnʋɣʋ.
31 Ye ɩ lʋlʋɣʋ nyə́mɑ lɔwɑ nyɑ́ kiiŋ
nɑ pɑ́ kisi nyɑ́ kʋsəsɩɩtʋ kɛ təŋʋɣʋ,
32 ye pɑ kisiɣi nyɑ́ kʋtʋtʋtʋ
nɑ pɑɑ tɔkəɣɩ nyɑ́ kʋsəsɩɩtʋ,
33 ɩlɛ n kɑ́ cɑɑ kpɑ́tʋɣʋ nɑ ń hɔnɑ pɑ ŋkpɑŋʋɣʋ
nɑ ń mɑ́-wɛɣɛ pɑ ɩsɑɣɑtʋ tɔɔ.
34 Amɑ n kɑɑ pɛ-wɛɣɛ nyɑ́ kʋpɑntʋ,
pəyele n kɑɑ pɛ-wɛɣɛ nyɑ́ teu.
35 N kɑɑ yɔkɩ nyɑ́ nɔɣɔ pɛɛlʋɣʋ.
Pəyele n kɑɑ lɑɣɑsɩ nti n yɔɣɔtɑɑ tɔ.
36 N tɛmɑ tuunɑʋ nɑ nyɑ́ tənɑŋŋ wɛɛtʋ,
n kɑɑ pəsɩ ń looli Tɑfiiti.
37 Tɑfiiti lʋlʋɣʋ kɑ wɛɛ tɑm tɔɔ kɛ́,
nɑ ɩ kɑwulɑɣɑ kumte wɛɛ nyɑ́ ɩsɛntɑɑ ɩsɩɩ ilim.
38 Nɑ ɩ́ leeli ɩsɩɩ ɩsɔtʋ,
ɩnɩ ɩ kɛnɑ ɑseetɑ tʋ kʋpɑŋ wei ɩ wɛ ɩsɔtɔnʋɣʋ tɑɑ tɔ.
39 Pɑɑ nɑ mpʋ pɑ́ɑ́nɑ́ kpɑ-ŋ nɑ ń lɔ wulɑʋ wei n kɑ ləsɑɑ
nɑ ń pəlɩ nim tɔ nɑ ń yele-ɩ nɑ ɩ́ hoti.
40 N yɔkɑ nɔɣɔ ŋkɑ nyɑ nɑ nyɑ́ təmlɛ tʋ ɩ pɛɛlɑɑ tɔ
nɑ ń wɑkəlɩ ɩ ntenuɣu nɑ ń lɔ-kʋɣʋ ɑtɛ.
41 N yɔkɑ ɩ koloosi toŋ nyənsɩ tənɑ,
nɑ ń pəsɩ ɩ koloosi ɑcɑlɛɛ kɛ ncɑɑ.
42 Mpɑtɔntɑɑ tənɑ kuuki ɩ wontu kɛ́,
nɑ ɩ cɔlɔ nyə́mɑ pɑɑkənɑ-ɩ.
43 N kpɑɑsɑ ɩ kolontunɑɑ ɑpɑlʋtʋ,
nɑ ń lɑ nɑ mpɑ pɑɑ cɑɑkɩ-ɩ tɔ pɑ lɑŋɑ hɛɛ.
44 N kʋwɑ ɩ yoou wontu lɔŋ.
Pəyele n tɑ sənɑ-ɩ yoou tɑɑ.
45 N lɛɛkɑ ɩ kɑwulɑɣɑ toŋ,
nɑ ń pəsɩ ɩ kumte kɛ kpɛntəlɑsɩ kɛ ɑtɛ.
46 N pɑsɑ ɩ ɩfepile pɩɩsɩ,
nɑ ń tʋ-ɩ fɛɛlɛ.
47 Hɑɩ, Tɑcɑɑ, pəlee kɛ́ n kɑ́ hɛɛsɩ nyɑ́ təɣɩ ŋmɛsʋɣʋ?
Nɑ nyɑ́ pɑ́ɑ́nɑ́ kpɑɑsʋɣʋ ɩsɩɩ kɔkɔ?
48 Tɔɔsɩ mɑ tɔm, yʋlʋ weesuɣu kəlɑ topi kɛ́,
pə nəɣəsənɑ kɛ́ ɩsɩɩ n ŋmɑ yʋlʋ kɛ sɩ n pəsəɣɩ-ɩ yem.
49 Yʋlʋ nɔɣɔlʋ ɩ fɛɩ sɩ ɩ kɑɑ sɩ.
Awe pəsəɣənɑ nɑ ɩ́ yɑ́ ɩ təɣɩ ɑtɛtəlɛ tɑɑ?
50 Tɑcɑɑ, leɣe nyɑ́ lɔŋtɑɑ kʋpɑntʋ
nti n kɑ sɩɩ Tɑfiiti kɛ nɔɣɔ tɔ tə sɑɑlɑɑ?
51 Tɑcɑɑ tɔɔsɩ mpusi wei nyɑ́ təmlɛ nyə́mɑ tʋɣʋ-m tɔ,
tɔɔsɩ sɩ mɑ nʋkɑ yəlɑɑ sɑmɑɑ.
52 Hɑɩ, Tɑcɑɑ tɔɔsɩ kʋtʋɣʋ ŋku nyɑ́ kolontunɑɑ
tʋʋkɩ nyɑ́ ləsəlʋ tɔntɛ tɔɔ tɔ.
53 Tɑcɑɑ hətɛ sɔsɔɔlɛ ntɛ́ teeli nyəntɛ kɛ tɑm tɔɔ.
Ɩsɔ ɩ́ kɔnɑ mpʋ, Ɩsɔ ɩ́ kɔnɑ mpʋ.