95
Ɩsɔ cɔlɔ pote wɑɑtʋ
1 Ɩ́ kɔɔ nɑ tə́ yoo Tɑcɑɑ kɛ lɑŋhʋlʋmlɛ yontu,
tə́ sɑ tɑ́ wɑɑsʋlʋ wei tə tʋɣɩ kpʋlʋɣʋ tɔ.
2 Tə́ polo ɩ ɩsɛntɑɑ nɑ tə́ sɛɛ-ɩ,
nɑ tə́ wiliti-ɩ nɑ lɑŋhʋlʋmlɛ yontu.
3 Mpi tɔ, Tɑcɑɑ nyɑɣɑlɛ Ɩsɔ sɔsɔ.
Nyɑɣɑlɛ wulɑʋ sɔsɔ wei ɩ ŋmɑkələɣɩ tɩɩŋ tənɑ tɔ.
4 Nyɑ́ niŋ tɑɑ kɛ́ ɑtɛ lumɑŋ tənɑ wɛɛ
nɑ pɔɔŋ sɔsɔɔŋ tənɑ kɛ nyɑ́ nyəm.
5 Nyɑ́ tənnɑ teŋku,
hɑlɩ nyɑ́ tɩɩ lɑpənɑ-ɩ.
Kʋlʋm nyɑ́ n lɑpənɑ tɛtʋ nɑ nyɑ́ niŋ.
6 Ɩ́ kɔɔ nɑ tə́ luŋ tɑ́ ŋmɑlʋ Tɑcɑɑ kɛ ɑkulɑ,
nɑ tə́ həntɩ-ɩ ɑtɛ.
7 Pə tɑɣɑ pʋlʋ, nyɑɣɑlɛ tɑ́ Ɩsɔ.
Tɑɣɑlɛ nyɑ́ yəlɑɑ, nyɑɣɑlɛ tiikilu.
Tə wɛ kɛ́ ɩsɩɩ nyɑ́ niŋ kɑləkʋ.
Ye ɩ́ nɩɩ Ɩsɔ mɑ́ mɑ kʋyɔɣɔtʋtʋ kɛ sɑŋɑ,
8 ɩ́ tɑɑ lɑ lɑŋkpɩɩsəŋ ɩsɩɩ mə cɑɑnɑɑ kɑ lɑpʋ
Melipɑ nɑ Mɑsɑ kɛ wʋlɑɣɑ tɛtʋ tɑɑ tɔ.
9 Tənɑɣɑ mə cɑɑnɑɑ mɑɣɑsɑ-m sɩ pɑ nɑɑkɩ mɑ wɑɑlɩ,
pɑɑ nɑ pɑ nɑnɑ pɑ ɩsəpəle kɛ mpi mɑ lɑpɑ tɔ.
10 Pɩɩsɩ nɩɩlɛ təcu kɛ́ mɑ luɣu lɩɩ piitim pənɛ,
hɑlənɑ mɑ tʋ mɑ tɑɑ sɩ yəlɑɑ mpɛ pɑ lepɑɣɑ,
pɑɑ nyəŋ mɑ mpɑɑŋ.
11 Ḿpʋɣʋ pɑ́ɑ́nɑ́ kpɑ-m nɑ mɑ́ tuu sɩ:
Pɑ kɑɑ sʋʋ mɑ hɛɛsʋɣʋ tɑɑ.