96
Wulɑʋ wei ɩ kɔŋ tɔ ɩ yontu kʋfɑtʋ
(Kʋtɔɔsʋtʋ I 16:23-33)
1 Ɩ́ yoo Tɑcɑɑ kɛ yontu kʋfɑtʋ,
ɑtɛ yəlɑɑ mɛ mə tənɑ ɩ́ yoo Tɑcɑɑ kɛ yontu.
2 Ɩ́ yoo Tɑcɑɑ kɛ yontu nɑ ɩ́ sɑ ɩ hətɛ,
nɑ ɩ́ kpɑɑləɣɩ pɑɑ kʋyɑkʋ ŋkuɣu ɩ nyʋɣʋ yɑpʋ tɔm.
3 Ɩ́ yɔɣɔtɩ piitimnɑɑ tɑɑ kɛ́ ɩ teeli tɔm
nɑ ɩ́ yɔɣɔtɩ yəlɑɑ tənɑ tɑɑ kɛ́ ɩ teu tɔm.
4 Tɑcɑɑ n kɛ́ sɔsɔ kɛ́ nɑ n mʋnɑ pɑ́ sɑ-ŋ.
Nyɑ́ tɔm wɛ sɔɣɔntʋ kɛ́ nɑ pə́ tɛɛ tɩɩŋ tənɑ.
5 Mpi tɔ, piitimnɑɑ tɩɩŋ tənɑ wɛ kpɛtɛ kɛ́.
Amɑ Tɑcɑɑ nyɑ́ lɑpənɑ ɩsɔtɔnʋɣʋ.
6 Teu sɔsɔɔm nɑɑkɩ nyɑ́ tɔɔ kɛ́,
nɑ teeli sɔsɔ nɑ́ɑ́ wɛ nyɑ́ təyɑɣɑ tɑɑ.
7 Piitimnɑɑ yəlɑɑ mɛ ɩ́ tʋ Tɑcɑɑ kɛ teeli,
ɩ́ tʋ Tɑcɑɑ kɛ teeli nɑ ɩ́ kʋsɩ ɩ nyʋɣʋ.
8 Ɩ́ sɑ Tɑcɑɑ kɛ ɩ hətɛ tɔɔ.
Ɩ́ kɔnɑ mə kʋhɑhɑm nɑ ɩ́ sʋʋnɑ ɩ tɑɑsɩ tɔɔ.
9 Ɩ́ həntɩ Tɑcɑɑ kɛ ɑtɛɣɛ sɑɑ wei
ɩ hʋləɣɩ ɩ tənɑŋŋ wɛɛtʋ tɔ.
Atɛ yəlɑɑ mɛ mə tənɑ ɩ́ sele ɩ ɩsɛntɑɑ.
10 Ɩ́ heeli piitimnɑɑ tənɑ sɩ
Tɑcɑɑ kɛlɛ wulɑʋ.
Mpʋ tɔtɔɣɔ tɛtʋ səŋɑɑ təcɑ, tɩɩ seliɣi.
Tɑcɑɑ təŋəɣɩ tɑmpɑnɑ kɛ́ nɑ ɩ́ hʋʋkənɑ yəlɑɑ.
11 Ɩsɔtɔnʋɣʋ lɑŋlɛ ɩ́ hʋləmɩ nɑ tɛtʋ yɔɔlɩ,
teŋku nɑ ɩ tɑɑ nyəm tənɑ ɩ́ sɛɛ.
12 Tɑwɑ tənɑ ɩ́ wɛɛ ɑcimɑ tɑɑ,
nɑ hɔtʋɣʋ tɑɑ tɩɩŋ tənɑ kiisinɑ lɑŋhʋlʋmlɛ,
13 kɛ Tɑcɑɑ ɩsɛntɑɑ.
Mpi tɔ, ɩ kɔŋ sɩ ɩ hʋʋnɑ tɛtʋ tənɑ.
Ɩ kɑ́ təŋ tɑmpɑnɑ nɑ ɩ́ hʋʋnɑ ɑntulinyɑ nɑ ɩ yəlɑɑ.