Bo̱r-u̱s tet
Yohana Wa-m-Yo'os u̱n hun-ne̱ m-ho̱
rwo̱ro̱g Ma-to̱ Shir
(Mati 3:1-12; Mark 1:1-8; Yoha 1:19-28)
1 Hak-u̱s o̱p u̱s-taan [15] u̱n gwo̱mo-u̱t ko-Gwo̱mo Sisar Tiberiyos, Panti Biratus ro ko-Gwamna to̱ u̱n dak-o̱ o-Judiya, Here̱ [Atipas] ro ko-Gwamna to̱ o-Gariri, komo heno u̱n wu̱ Pirip ro ko-Gwamna dak-to̱ o-Ituriya u̱n o-Tu̱rakonitis ne̱, Bisaniyas ro ko-Gwamna to̱ Abirene̱.
2 Komo Annas, u̱n Ke̱pas ne̱, ye̱ ro Gwo̱mo-ne̱ ye̱ u̱n ko̱n-se Shir. U̱n ka da-o̱, Yohana wà Zakaraya ho̱gu̱te̱ Ma-to̱ Shir be-de wu̱ ro'e̱ o-dákár à.
3 Ka da-de Yohana pa'u̱ru̱ riib-o̱ o-ro̱o̱g o-Joda kap, wu̱ ro m-ru̱re̱ u̱n hun-ne̱ Ma-to̱ Shir, “Yagu̱ no̱ u̱r-ba'as, no̱ waktu̱ne̱ be-de Shir, no̱ haan, a yo'os no̱ m-ho̱, Shir a soks ba'as-u̱r no̱.”
4 Gense̱ to̱ ro̱ u̱n taku̱rda-o Ishayawan-Rwo̱r u̱n Ma-to̱ Shir:
“Wu̱ ken wu̱ ro̱ u̱s-eeg o-dákár.
‘Ja'ase̱ Yawe o-co̱w,
ke'egse̱ yo u̱r-bon ne̱ hond hond bo̱ wu̱ he m-do̱re̱ à!
5 Bish ko̱ o̱ ke bu̱ng-o̱,
o ke'egse̱ ko̱ de ke dor-de o-haag ne̱.
Co̱w-se nange̱ à, o ke'egse̱ se,
se ro̱ hak hak à, o ja'as se po̱r po̱r.
6 Bo̱ u̱n mat-o̱ u̱n hun-ne̱ kap ye̱a hyen gwu̱-o Shir!’ ”
7 Bu̱u̱g-de u̱n hun-ne̱ rwu̱u̱nu̱ru̱ be-u̱r Yohana wu̱ yo'os ye̱ m-ho̱. Bo̱ wu̱ ze̱e̱ ye̱ à, “No̱ ye̱ge̱-herhyat! ¿Wa ru̱ru̱ no̱, no̱ som swo̱ u̱r-ko̱o̱b de Shir ro̱ no̱ u̱n ma-to̱ m-hante̱ à?
8 No̱m no̱ rii-yo u̱r-bon, yo a hette̱ m-hyan no̱ yagu̱te̱ ka ba'as-de no̱ ro̱ m-no̱m à, no̱ waktu̱ne̱ be-de u̱n Shir u̱ntu̱n 'yo-yo mate̱ yakar-ye̱ u̱r-bon à. No̱ ze̱e̱ hi u̱n no̱ Ibrahi wu̱ ro̱ ko-yan-ga-ye̱ no̱. Me̱ no̱ m-ru̱re̱, Shir a hoks ka ta'ar-to̱ m-muut u̱n hun-ne̱ ye̱ rwu̱u̱ne̱ so̱ u̱n baag-o̱ Ibrahi à!
9 Yar-u̱r ro̱ u̱t-kom a kupste̱ ka 'yo-se n-dak, kap 'yo-yo mate̱ yakar-ye̱ u̱r-bon á, a kups yo n-dak a jorbe̱ yo o-ra.”
10 Ka hun-ne̱ ye̱ citu̱ru̱ wu̱, “¿Ya ne̱ te̱ he o̱ ka m-no̱m?”
11 Wu̱ shasu̱ru̱ ye̱, “Wu̱ ro̱ u̱t-matuku ne̱ u̱t-yoor à, wu̱ 'ye wu̱ ro̱tte̱ á u̱r-gaan, wu̱ ro̱ u̱n rii-yo m-re̱ ne̱ à, wu̱ wong yo.”
12 Yan-go̱ks u̱n tar haanu̱ru̱ a yo'oste̱ ye̱ m-ho̱, ye̱ citu̱ru̱ wu̱, “Wa-u̱r-Yoos, ¿ya ne̱ te̱ he m-no̱m?”
13 Wu̱ ze̱e̱ru̱ ye̱, “Bo̱ a ze̱e̱ no̱ go̱ks à, kaane̱ no̱ he m-go̱ks no̱ do̱ rii á.”
14 Karma-ne̱ citu̱ru̱ wu̱, “Te̱ ne̱ komo, ¿ya ne̱ te̱ he m-no̱m?”
Wu̱ ze̱e̱ru̱ ye̱, “No̱ rumus hun-ne̱ hwo̱r m-'wo̱ns á, no̱ ce'e̱ ne̱t u̱t-ma á. E̱s no̱ be-de u̱n hwo̱r-ye̱ o-re̱ng ye̱ a no̱ m-to̱p à.”
15 Hun-ne̱ no̱mu̱ru̱ o-dish, ye̱ taknu̱ru̱ u̱s-barag ko̱ Yohana wu̱ ro̱ Kiristi.
16 Yohana ze̱e̱ru̱ ye̱ kap, “U̱m yo'ostu̱ no̱ m-ho̱, amba wu̱ ken wu̱ ro̱o̱n wu̱ jiishe̱ me̱ à. Me̱ bo'os ma u̱m usse̱ wu̱ u̱t-ka'ante̱ á. Wu̱a yo'os no̱ u̱n Ku̱kt-o̱ Shir o-ra ne̱.
17 Wu̱ ro̱ u̱n ko̱k-de u̱n wu̱ ne̱ de m-jer, wu̱ bu'ut hyo-ye̱ u̱n wu̱ kap, wu̱ ru̱'u̱t ye̱ u̱n byo-de u̱n wu̱, amba wu̱a tu̱ks ka gwo̱p-mo̱ u̱t-nu ne̱ o-ra, o̱ ba m-ryomse̱.”
18 U̱s-co̱w de̱e̱n, se Yohana ru̱rte̱ ka Ma-to̱ m-Re̱re̱m to̱ be-de u̱n hun-ne̱ à, wu̱ ro̱ ye̱ m-ze̱e̱ ye̱ yage̱ co̱w-se u̱n ba u̱r-bon.
19 Amba Yohana ru̱ru̱te̱ Here̱ [Atipas] ko-Gwamna u̱t-ma m-'wo̱ns ne̱ remen wu̱ gaag Herodiya, ne'a heno u̱n wu̱, komo wu̱ no̱mo̱g rii-yo ba u̱r-bon de̱e̱n.
20 Ka da-o̱ komo Here̱ dooru̱ m-no̱m u̱n rii-yo ba u̱r-bon yo jiishe̱ à, remen wu̱ ka'ag Yohana.
A yo'oste̱ Ye̱so m-ho̱
(Mati 3:13-17; Mark 1:9-11)
21 Bo̱ a komte̱ yo'os u̱n hun-ne̱ m-ho̱ à, wu̱ ma Ye̱so a yo'osu̱ru̱ wu̱. Da-o̱ wu̱ ro u̱n ko̱n-se Shir à, To̱n-o shir upsu̱ru̱.
22 Ku̱kt-o̱ Shir haanu̱ru̱ be-u̱r Ye̱so u̱ntu̱n o-tantabara. A ho̱gu̱ru̱ o-co̱r n-To̱n shir, “Wo̱ ro̱ wà re. Me̱ gwu̱gwu̱ u̱n wo̱ ne̱ u̱m co̱no̱g wo̱.”
Ya-n-ga-ye̱ Ye̱so
(Mati 1:1-17)
23 Da-o̱ Ye̱so takne̱ se̱nge̱-mo̱ u̱n wu̱ à, wu̱ ro̱ u̱ntu̱n hak-u̱r kwo̱o̱z u̱s-o̱p [30]. Wu̱ wà-wu̱, remen kaane̱ hun-ne̱ cekru̱ru̱ ye̱ ze̱e̱ru̱ wà Yusuhu, wà Heri.
24 Wà Matta wu̱ ma Rewi,
wà Meru̱ci,
wu̱ ma Jannay,
wà Yusuhu.
25 Wà Mattayas,
wu̱ ma E̱mos,
wà Nahum,
wu̱ ma Esu̱ri,
wà Naggay.
26 Wà Maat,
wu̱ ma Mattayas,
wà Semen,
wu̱ ma Jose̱ci,
wà Joda.
27 Wà Jo'anan,
wu̱ ma Resa,
wà Ze̱rubabe̱r,
wu̱ ma Shetiyer,
wà Neri.
28 Wà Meru̱ci,
wu̱ ma Addi,
wà Kosam,
wu̱ ma Ermadam,
wà Er.
29 Wà Josuwa,
wu̱ ma Eriyazer,
wà Jorim,
wu̱ ma Matta,
wà Rewi.
30 Wà Simo̱n,
wu̱ ma Yahuda,
wà Yusuhu,
wu̱ ma Jonan,
wà E̱riyakim.
31 Wà Mereya,
wu̱ ma Menna,
wà Mattaha,
wu̱ ma Natan,
wà Dawuda.
32 Wà Je̱sse̱,
wu̱ ma Obe̱d,
wà Bo'az,
wu̱ ma Saru̱mon,
wà Nashon.
33 Wà Aminadab,
wu̱ ma Adu̱min,
wà Aru̱ni,
wu̱ ma He̱zu̱ron,
wà Perez,
wu̱ ma Yahuda.
34 Wà Yakubu,
wu̱ ma Ishaku,
wà Ibrahi,
wu̱ ma Tera,
wà Naho̱r.
35 Wà Se̱rug,
wu̱ ma Riw,
wà Pu̱re̱,
wu̱ ma E̱ber,
wà Shera.
36 Wà Kayinan,
wu̱ ma Aru̱pazad,
wà Shem,
wu̱ ma Nuhu,
wà Ramek.
37 Wà Me̱tuse̱ra,
wu̱ ma Enok,
wà Jaret,
wu̱ ma Mahararer,
wà Kenan.
38 Wà E̱no̱sh,
wu̱ ma Shitu,
wà Adamu,
Adamu wà-wu̱ Shir.