Rii-yo he m-ko̱r n-co yo Ye̱so kute̱ Yohana à
U̱t-Hyangan
Rem-se ro̱ n-me̱ à:
M-zante̱ 1:1-8
Tiks u̱t-hyangan u̱n taku̱rda-to̱ u̱n yan-dor u̱n bo̱-u̱t ta'yoor 1:9—3:22
Taku̱rda-o pu'usse̱ a rekesse̱ o̱ so̱-o ta'yoor 4:1—8:1
Kar-u̱t ta'yoor 8:2—11:19
Caari-yo o-hwo̱ u̱n nem yoor ne̱ 12:1—13:18
U̱t-hyangan u̱n ho̱n u̱n ho̱n 14:1—15:8
Ko̱k-u̱t ta'yoor-to̱ u̱n ryaab-se Shir 16:1-21
Sabu̱rse̱ u̱n dak-o̱ o-Babira, u̱n re̱ u̱r-ho̱ ne̱ be-de u̱n ka yan-rwo̱r u̱n ma-to̱ Shir ye̱ u̱t-bo̱ ye̱ u̱n ko-gwo̱mo-wu̱ u̱n ya-u̱t-ko̱t ne̱ 17:1—20:10
Piish u̱t-ma to̱ u̱r-bu̱ste̱ 20:11-15
To̱n-o̱ Shir pu̱-o̱, ho̱no o-dak pu̱-o̱, Urusharima-o pu̱-o̱ 21:1—22:5
U̱r-bu̱ste̱ 22:6-21
Ramba to̱ ro̱ na m-kute̱ u̱n rii-yo Shir ge̱ne̱ yo à kor à:
3 Ne̱n tet n-me̱ u̱n wan-gaan o̱ ro̱ ramba o̱ Shir — Tet o̱ ro̱ ramba o̱ Shir, ne̱n tet n-me̱ wan-gaan ye̱ ro̱ o-Tato, Wà, u̱n Ku̱kt-o̱ Shir ne̱
3 ½ Pu̱ru̱g-de m-shiishe̱ de ro̱ hak-u̱s tet u̱r-pu̱ru̱g = U̱t-ho̱ o-dugu u̱n zungu-u̱s yoor u̱n kwo̱o̱z-u̱t tet [1,260], re̱ng-u̱s kwo̱o̱z-u̱t yoor u̱n yoor [42] = Hak-u̱s tet u̱n u̱r-pu̱ru̱g — Tet u̱n u̱r-pu̱ru̱g ro̱ pu̱ru̱g-de u̱n ta'yoor o̱ ro̱ ramba-de shiishe̱.
4 Ma-to̱ u̱n rem-se Shir hwo̱o̱ne̱ à
6 Ko̱o̱b-de m-warag shiishe̱, ko̱o̱b-de u̱n re̱ u̱r-ho̱, Ko̱o̱b-de u̱n rii so̱-yo
7 Shiishe̱ (3 + 4)
10 Shi-mo̱ u̱n ka ho̱no dak-o̱
12 Yan-dor Ye̱so
24 O̱p u̱n yoor mo̱sse̱ u̱n o̱p u̱n yoor ne̱ sha-mo̱ u̱n yakar Yakubu ne̱n o̱p u̱n yoor yan-campo̱-ne̱ u̱n yan-To̱m Ye̱so ne̱ o̱p u̱n yoor
666 Ko̱o̱b-de m-warag shiishe̱ u̱r-bir, Ko̱o̱b-de u̱n re̱ u̱r-ho̱ + Ko̱o̱b-de u̱n re̱ u̱r-ho̱ + Ko̱o̱b-de u̱n re̱ u̱r-ho̱ ne̱
1000 Caari-mo̱ m-ho̱o̱b, Kashi m-ho̱o̱b (10 × 10 × 10)
144,000 Yan-dor shiishe̱ (12 × 12) + (10 × 10 × 10)
Bo̱r-o gaan
1 Ka hyangan-to̱ u̱n rwu̱u̱n be-u̱r Ye̱so Kiristi, to̱ Shir kute̱ wu̱ mo̱sse̱ u̱n rem-se he m-ko̱r ne̱ ba m-jime̱ à. Wu̱ u̱n to̱mo̱n wan-to̱m-wu̱ Shir be-de u̱n ko-gu̱w-wu̱ u̱n Shir Yohana remen wu̱ ru̱ru̱té̱ ye̱ ken yan-gu̱w-mo̱ Shir ye̱ ka hyangan-to̱.
2 Yohana no̱mo̱g swo̱-se u̱n kap o̱ u̱n rem-se wu̱ hyane̱ mo̱sse̱ u̱n ma-to̱ Shir ne̱ à, u̱n swo̱-u̱s Ye̱so Kiristi ne̱ komo.
3 Shir ya'ag wu̱ u̱r-ho̱ ko̱ wu̱ ke wu̱ karante̱ ka hyangan-to̱ à, komo Shir a 'ye u̱r-ho̱ u̱n ye̱ ro̱ to̱ m-ho̱ge̱ à komo ye̱ e̱ss u̱r-hur u̱n rii-yo a ge̱ne̱ n-me̱ u̱n ka taku̱rda-o̱ à, remen da-o nomsu̱nte̱ yow yow.
U̱r-gas a woote̱ hun-ne̱ yan-dor
bu̱u̱g-u̱t ta'yoor
4 Ka taku̱rda-o̱ u̱n rwu̱be̱ be u̱n de Yohana, ha-mo̱ u̱n yan-dor Ye̱so be-u̱t ta'yoor-ye̱ ro̱ u̱n dak-o̱ o-Asiya à:
Me̱ u̱s-ko̱n m-yar u̱n she'et-de ba u̱t-ween ne̱ nom mo̱sse̱ u̱n no̱ ne̱ mo̱ rwu̱u̱ne̱ be-de Shir à, wu̱ ro̱ m-mo̱ka à, wu̱ ro cin n-ga à, komo wu̱ ro̱o̱ne̱ à, komo rwu̱u̱n-mo̱ u̱n be-de u̱n ka wu̱ ro̱ u̱n to̱mo̱n u̱n Ku̱kt-o̱ Shir o̱ n-co o̱ u̱n kwu̱u̱r-o̱ u̱t-gwo̱mo à,
5 tomso ne̱ rwu̱u̱n-mo̱ u̱n be-u̱r Ye̱so Kiristi wu̱ ro̱ ko-yan-e̱ss u̱t-ma wan-su̱'e̱ u̱n ka rem-se. Wu̱ ro̱ mat-de co, be-de u̱n ye̱ ine̱ u̱t-marimar à. Wu̱ ro̱ ko-Gwo̱mo-wu̱ u̱n kap Gwo̱mo-ne̱ ye̱ u̱n ho̱no o-dak.
M-se̱ps kap be-de u̱n wu̱, wu̱ ro̱ na m-was à. Wu̱ sokse̱ na ba'as-u̱t na u̱n bu̱-yo u̱n wu̱u̱s u̱n hyó-mo̱ u̱n wu̱ rem na.
6 Wu̱ u̱n daag na remen a waragté̱ hun-ne̱ ye̱ u̱n gwo̱mo-to̱ u̱n wu̱, komo yan-Co̱w u̱n ko̱n-se Shir. Wu̱ u̱n no̱m kaane̱ remen a nomoté̱ Shir, Tato-o̱ u̱n wu̱ m-gu̱w. Yage̱ a ya'aste̱ m-se̱ps kap u̱r-be̱e̱b ne̱ be-de u̱n wu̱ ba m-ta! Amin.
7 Gwo̱t! Wu̱ ro̱o̱n u̱t-ke'ente̱ to̱ n-To̱n shir.
Ko̱ wu̱ ke ne̱t-wu̱ a hyen wu̱,
myet u̱n ka ye̱ ho̱ wu̱ ne̱ à.
Komo myet-mo̱ u̱n baag-to̱ u̱n ho̱no o-dak
a nom tu̱k-mo̱ u̱t-me̱n remen wu̱.
E̱e̱ kaane̱ to̱ ro̱, amin.
8 Wan-Ko̱yan Shir wu̱ ze̱e̱, “Me̱ ro̱ u̱r-Takan, u̱r-Bu̱ste̱ ne̱. Me̱ ro̱ m-mo̱ka, me̱ ro cin n-ga, komo wu̱ ro̱o̱ne̱ à, Wa-u̱t-Gwo̱mo kap.”
Hyangan-to̱ u̱n Wà-wu̱ u̱n ne̱t
9 Me̱ ro̱ Yohana, komo o̱r no̱ be-de u̱n swo̱ u̱r-ko̱o̱b, u̱t-gwo̱mo ne̱ m-du̱ngu̱ne̱ ne̱ mo̱ ro̱ mo̱ ma na à u̱n Ye̱so. A yanag me̱ yan-se m-gakte̱ ha-mo̱ u̱n dak-o̱ u̱n te̱te̱-de m-sa re̱e̱no̱ o̱ a m-ze̱e̱ o-Patmo̱s à remen u̱m ko̱'o̱te̱ Ma-to̱ Shir to̱ o-nip u̱n rwo̱r u̱n ma-u̱t Ye̱so ne̱.
10 U̱n ho̱-de o-Rahadi,Ku̱kt-o̱ Shir garamse̱ me̱, u̱m ho̱gu̱ru̱ u̱n jim u̱n de o̱ ken co̱r-o̱ kayaya u̱ntu̱n 'wo̱n-se o-kar.
11 O̱ ze̱e̱ru̱, “Ge̱n o-taku̱rda bo̱ u̱n yo o hyane̱ à. Komo o tome̱ ye̱ ká yan-dor Ye̱so ye̱ be-u̱t ta'yoor u̱n bo̱-to̱ o-Apisu, o-Se̱miru̱na ne̱, o-Pergamu ne̱, o-Tiyatira ne̱, o-Saradis ne̱, o-Pirapiya ne̱, o-Rawudikiya ne̱ komo.”
12 Da-o̱ u̱m byande̱ u̱m hyenet wu̱ ro̱ u̱t-ma u̱n me̱ ne̱ à, U̱m hyanu̱ pitirra-u̱t ta'yoor-to̱ u̱n zinariya to̱ a she̱re̱ à.
13 U̱n te̱te̱-o̱ u̱n ká pitirra-to̱ komo u̱m hyanu̱ru̱ wu̱ ken wu̱ “u̱ntu̱n Wà-wu̱ u̱n ne̱t.” Wu̱ ro̱ cu̱pu̱ u̱n co̱p-o pus-o̱ ne̱ o̱ m-se̱e̱b, wu̱ ro̱ u̱n hap-yo o-zinariya ne̱ u̱n be̱-de u̱n wu̱.
14 Hi-de u̱n wu̱ u̱n hi-se u̱n wu̱ ne̱ nomoste̱ puu u̱ntu̱n gwe̱re̱-u̱t pus-to̱, komo puu u̱ntu̱n ta'ar-ye̱ u̱n kem. Komo yish-ye̱ u̱n wu̱ u̱ntu̱n rem-de o-ra.
15 Na-se u̱n wu̱ ro̱ o-mo̱k ne̱ u̱ntu̱n o-tagurra yo a po̱ro̱gse̱, be-de u̱n zwo̱-o̱ u̱n ya-o-pyap à. Komo co̱r-o̱ u̱n wu̱ ro̱ u̱t-dwu̱m u̱ntu̱n zaaz-o̱ u̱n caari-mo̱ m-ho̱ mo̱ ro̱ m-ja à.
16 Wu̱ ro̱ bu̱pu̱ u̱n re̱ge̱n-ne̱ ta'yoor u̱n kom-o̱ u̱n wu̱ o̱ u̱r-re̱. Komo magay-o̱ m-rye jit-u̱t-jit rwu̱u̱nu̱ru̱ u̱n nu-o̱ u̱n wu̱. Komo co-o̱ u̱n wu̱ ro̱ u̱s-myakt u̱ntu̱n e̱s-mo̱ u̱r-ho̱ u̱r-hi.
17 Da-o̱ u̱m hyane̱ wu̱ à, u̱m he̱e̱ru̱ u̱n na-se u̱n wu̱ u̱ntu̱n ne̱t margan. Amba wu̱ seku̱ru̱ me̱ kom-o̱ u̱n wu̱ o̱ u̱r-re̱. Wu̱ zee, “Wo̱ ho̱ge̱ o-gye̱r á! Me̱ wu̱ ro̱ u̱r-Takan u̱r-Bu̱ste̱ ne̱.
18 Me̱ u̱n ho̱o̱g ne̱! U̱m ro marag, gwo̱t me̱ u̱n ho̱o̱g ne̱ o̱ ba m-ta! Komo me̱ bu̱pu̱ u̱n rii-se u̱n ups m-mar ne̱ u̱n be-de margan-ne̱ ro̱ m-she'et à.
19 “Se̱ o gen bo̱ u̱n rii-yo wo̱ m-hyan m-mo̱ka à, u̱n rii-yo he m-ko̱r ne̱ n-jim de u̱n yo ka à.
20 Myot-se u̱n ka pitirra-to̱ ne̱ u̱t-ta'yoor komo u̱n ka re̱ge̱n ta'yoor-ye̱, ka ye̱ o hyane̱ u̱n kom-o̱ u̱n re̱ u̱n de à. Ka myot-se se ka: Ka re̱ge̱n ta'yoor-ye̱ ro̱ hek-o̱ u̱n ka yan-to̱m-ye̱ Shir ye̱ ha-mo̱ u̱n hun-ne̱ yan-dor kur-u̱t ta'yoor. Komo ká pitirra-to̱ u̱n zinariya-u̱t ta'yoor-to̱, to̱ ro̱ hek-o̱ u̱n ká kur-u̱t ta'yoor-to̱ to̱ u̱n yan-dor Ye̱so.