11
ኢያሱ ሁጲሳ ባጋ ጋድያ ካተቱዋ ጾኔዳ
1 ሀጾራ ካታማ ካትያ ያብን እስራኤልያ አሳይ ጾኔዳዋ ስሴዳ ዎደ፥ ማዶና ካታማ ካትያ ዮባባዉ፥ ሽምሮና ካታማ ካትያዉ፥ አክሻፋ ካታማ ካትያዉ፥
2 ሁጲሳ ባጋና ገዝያን ደእያ ካተቶ፥ ጋሊላ አባፐ ገድሳ ዮርዳኖሳ ዎምባን ደእያ ካተቶ፥ አዋይ ዉልያ ባጋና ጋꬋን ደእያ ካተቶነ አዋይ ዉልያ ባጋና ደእያ ዶራ ካትያዉ አሳ ኪቴዳ።
3 ቃይ አዋይ ዶልያ ባጋናነ አዋይ ዉልያ ባጋና ደእያ ካናነቶ፥ አሞረቶ፥ ሂተቶ፥ ፓርዘቶ፥ ገዝያን ደእያ ያቡሳቶነ ምጽጳ ቢታን ሄርሞነ ደርያፐ ጋርሳና ደእያ ሂዌቶ ኪቴዳ።
4 ኡንቱንቱ ኡባይ ባረንቱ ኦላንቻቱዋ ደንꬂደ፥ እስራኤልያ ኦላናዉ እትፐ ጋከቴድኖ። ሄ ኦላንቻቱ ፓራቱዋናነ ፓራ ጋረቱዋና ጋከቲደ፥ ፓይድና ዉረና አባ ዶና ሻፍያዳን ጮራቴድኖ።
5 ሄ ካተቱ ኡባይ ባረንቱ ዎልቃ እትፐ ጋꬂደ፥ እስራኤልያ አሳ ኦላናዉ መሮማ ግያ ሃꬃ ማታን ዱንካኔድኖ።
6 መꬍና ጎዳይ ኢያሳ፥ “ኔን ኡንቱንቶ ያዮፓ! ታን ዎንት ሀኖደ ኡንቱንታ ኡባቱዋካ ዎꬋደ፥ እስራኤልያ አሳዉ አꬃደ እማና። ኔን ኡንቱንቱ ፓራቱዋ ኡባ ግልዳያና፤ ኡንቱንቱ ፓራቱዋ ጋረቱዋካ ታማን ጹጋና” ያጌዳ።
7 ኢያሱነ አ ኦላንቻቱ ኡባይ ኡንቱንቱ አኬከናን ደእሽን መሮማ ሃꬃ ማታን ኡንቱንቱ ቦላ ፑቱ ጊደ፥ ኡንቱንታ ኦሌድኖ።
8 መꬍና ጎዳይ ኡንቱንታ እስራኤላቱ ኩሽያን አꬂደ እሜዳ። ኡንቱንታ ጾኒደ፥ ዎልቃማ ሲዶና ግያ ጋድያ፥ ምስራፎታ-ማይማነ አዋይ ዶልያ ባጋና ደእያ ምጽጳ ዎምባ ጋካናዉ የደርሴድኖ። ኡንቱንቱፐ እት አሳነ አሸናን ዎꬌድኖ።
9 ኢያሱ መꬍና ጎዳይ አ አዛዜዳዋ ኡባ ኡንቱንቱ ቦላን ፖሌዳ፤ ኡንቱንቱ ፓራቱዋካ ግልዳዬዳ፤ ፓራ ጋረቱዋካ ታማን ጹጌዳ።
10 ሄዋፐ ጉይያን ኢያሱ ጉየ ስሚደ፥ ሀጾራ ግያ ካታማ ጾኒደ ኦይቂደ ሄ ካታማ ካትያ ማሻን ዎꬌዳ። ሄ ዎደ ሀጾራ ካታማይ ሄ ካዉተꬃ ኡባዉ ሁጰ ካታማ።
11 እስራኤልያ አሳይ ሄ ካታማን ደእያ አሳ ኡባ ቃራ ማሻን ዎꬌዳ። ሸምፑ ፓጻ ደእያዋ ኡባ እቱዋነ አሸናን ዉርስ ዎꬌድኖ። ኢያሱ ሀጾራ ካታማካ ታማን ጹጌዳ።
12 መꬍና ጎዳ ቆማይ ሙሴ አዛዜዳዋዳን፥ ኢያሱ ሄ ካተቱዋ ካታማቱዋነ ኡንቱንቱ ካተቱዋ ኡባ ኦሞዲደ አሳ ኡባ ቃራ ማሻን ዉርስ ዎꬌዳ።
13 ግዶፐነ፥ ኢያሱ ጹጌዳ ሀጾራ ካታማፐ አትና፥ እስራኤልያ አሳይ ዞዝያ ቦላን ኬጸቴዳ ካታማቱዋ ኡባ ጹግበይክኖ።
14 እስራኤልያ አሳይ ሄ ካታማቱዋፐ ቦንቄዳ ሚሻ ኡባነ መህያ ኡባ ባረንቶ አኬድኖ። ሽን አሳ ኡባ ꬋይሳና ጋካናዉ ቃራ ማሻን ዎꬌድኖ፤ ፓጻ ደእያዋ አያካ አሽበይክኖ።
15 መꬍና ጎዳይ ባረ ቆማ ሙሳ አዛዜዳዋዳን፥ ሙሴካ ኢያሳ አዛዜዳ። ኢያሱካ አዛዙዋ ፖሌዳ፤ መꬍና ጎዳይ ሙሴዉ አዛዜዳዋ ኡባፐ እ ኦናን አጌዳባይ አያይነ ባዋ።
ኢያሱ ኦይቄዳ ጋድያ
16 ሄዋዳን ኦꬂደ ኢያሱ ሄ ጋድያ ኡባ፥ እስራኤልያ ዞዛቱዋ፥ ኔጌባ ባዙዋ ኡባ፥ ጎሸና ግያ ጋድያ ኡባ፥ አዋይ ዉልያ ባጋና ደእያ ዛንጋራነ አራብያ ጋꬋ አኬዳ።
17 ሄ ቢታይ ኤዶም ደእያ ሀላቃ ግያ ደርያፐ ዶም ቢደ፥ ሄርሞነ ደርያፐ ጋርሳ ባጋና ደእያ ሊባኖሳ ዎምባን ደእያ ባኣል-ጋዳ ጋካናዉ ደእያ ሳኣ ጋኬ። ኡንቱንቱ ካተቱዋ ኡባ ኢያሱ ኦሞዲደ ዎꬌዳ።
18 ኢያሱ ዳሮ ዎድያ ሄ ካተቱዋ ኡባና ኦለቲደ ጋምኤዳ።
19 ጋባኦናን ደእያ ሂዌቱዋፐ አትና፥ ሀራ ካታማይ እቱነ እስራኤላቱዋና ሳሮ ደአና ጫቁዋ ጫቀትቤና፤ እስራኤላቱ ሄ ካታማቱዋ ኡባ ኦላን ጾኒደ ኦይቄድኖ።
20 መꬍና ጎዳይ ሙሳ አዛዜዳዋዳን፥ ኢያሱ ኡንቱንታ ቃረት ባይናን እቱዋነ አሸናን ዉርስ ዎꬌዳ። አያዉ ጎፐ፥ ኡንቱንቱ እስራኤላቱዋና ኦለታናዳን መꬍና ጎዳይ ባረ ሁጲያዉ ኡንቱንቱ ዎዛና ሙምሴዳ።
21 ሄ ዎደ ኢያሱ ቢደ ገዝያን፥ ከብሮና ካታማን፥ ዳቢራ ካታማን፥ አናባ ካታማን፥ ይሁዳ ገዝያን ኡባንነ እስራኤልያ ገዝያን ኡባን ደእያ አናቀ ዘረꬃ አዱሳቱዋ ዎꬍ ዉርሴዳ። ኢያሱ ኡንቱንታነ ኡንቱንቱ ካታማ ኡባና ꬋይሴዳ።
22 አናቀ ዛራቱዋፐ እስራኤልያ ጋድያን ኦንነ አትቤና፤ ሽን አማሬዳዋንቱ ጋዛ፥ ጋተነ አሽዶዳ ካታማቱዋ ጻላላን አቴድኖ።
23 መꬍና ጎዳይ ሙሳ አዛዜዳዋዳን፥ ኢያሱ ጋድያ ኡባ ኦይቂደ እስራኤልያ አሳዉ ኡንቱንቱ ዛርያን ዛርያን ሻክ እሜዳ። ሄዋፐ ጉይያን ቢታይ ኦላፐ ሸምፔዳ።