10
አዋይ ኤቄዳ
1 ኢያሱ ካሰ ያርኮ ካታማ ኦለቲደ ባይዜዳዋዳንነ ኡንቱንቱ ካትያ ዎꬌዳዋዳን፥ አይ ካታማ ኦለቲደ ኡባ ባይዜዳዋነ ኡንቱንቱ ካትያካ ዎꬌዳዋ የሩሳላመ ካትያ አዶንጸደቅ ስሴዳ። ቃይ ጋባኦና አሳይ እስራኤልያ አሳና ሳሮ ደአናዉ ጫቀቴዳዋነ ሀእ ኡንቱንቱና እትፐ ደእያዋ ስሴዳ።
2 አ አሳይካ ሎይꬅ ያዬዳ። አያዉ ጎፐ፥ ጋባኦና ካታማይ ካተቱዋ ካታማቱዋፐ እቱዋ ማላ ዎልቃማ ካታማ፤ ቃይ ሄ ካታማይ አይ ካታማፐ ዳሬ፤ አን ደእያ አቱማ አሳይካ ምና።
3 ያትና፥ የሩሳላመ ካትያ አዶንጸደቅ፥ ከብሮነ ካትያ ሆሃማዉ፥ ያርሙታ ካትያ ፒራማዉ፥ ላክሻ ካትያ ያፍአዉነ፥ ኤግሎና ካትያ ዳቢራዉ ሀዋዳን ያጊደ ኪቴዳ፤
4 “ጋባኦና ካታማ አሳይ ኢያሱናነ እስራኤልያ አሳና ሳሮ ደአናዉ ጫቀቴዳ ድራዉ፥ ኡንቱንቱና ኦለታናዉ ዪደ ታና ማዴርክቴ” ያጌዳ።
5 ሄዋፐ ጉይያን አሞራዋናቱዋ ካተቱ እቼሻቱ የሩሳላመ ካቲ፥ ከብሮነ ካቲ፥ ያርሙታ ካቲ፥ ላክሻ ካቲነ ኤግሎና ካቲ ባረንቱ ኦላንቻቱዋ እትፐ ጋꬄድኖ። ባረንቱ ኦላንቻቱዋ ኡባ አኪደ ፑደ ቢደ፥ ጋባኦና ካታማ ዶዲደ ኦሌድኖ።
6 ጋባኦና አሳይ ገልጋላን ዱንካኒደ ኢያሱኮ ኪቲደ፥ “ኑና ነ ቆማቱዋ አጎፓ፤ ኤለካ ኑኮ ያደ ኑና አሻ። ገዝያን ደእያ አሞራዋናቱዋ ካተቱ ኡባይ ኑና ኦላናዉ ባረንቱ ኦላንቻቱዋ እቱዋ ኦꬄዳ ድራዉ፥ ኔን ኑና ማዳ” ያጌድኖ።
7 ሄዋፐ ጉየ ኢያሱ፥ አናና ደእያ ኦላንቻቱ ኡባይነ ምኖ አሳቱ ኡባይ ገልጋላፐ ደንዲደ ቤድኖ።
8 መꬍና ጎዳይ ኢያሳ፥ “ኡንቱንቶ ያዮፓ! ታን ኡንቱንታ ነ ኩሽያን አꬃደ እማድ። ኡንቱንቱፐ እቱነ ኔናና ኤቀታናዉ ዳንዳየና” ያጌዳ።
9 ሄዋፐ ጉይያን ኢያሱ ገልጋላፐ ቃማ ኡባን ሀመቲደ አቂደ፥ ኡንቱንቱ አኬከናን ደእሽን ኡንቱንቱ ቦላ ዎራጄዳ።
10 መꬍና ጎዳይ እስራኤልያ አሳ ስንꬃን ህንቱቶ ዎዛና ካሃ ባይዜዳ፤ ያትና፥ እስራኤልያ አሳይ ኡንቱንቱፐ ዳሮ አሳ ጋባኦናን ዎꬌዳ። እስራኤላቱ ኡንቱንታ ቤት-ሆሮና አፍያ ኦግያ ኦይꬂደ ጎዲደ፥ አዜቃነ ማቄዳ ጋካናዉ ቡꬄድኖ።
11 ቤት-ሆሮናፐ ዱገ አዜቃ አፍያ ኦግያ ኦይቂደ ኡንቱንቱ እስራኤልያ አሳ ስንꬃፐ ባቃትሽን፥ መꬍና ጎዳይ ዎልቃማ ሻቻ ሳሉዋፐ ኡንቱንቱ ቦላን ቡክሴዳ። እስራኤልያ አሳይ ማሻን ዎꬌዳ አሳፐ፥ ሻቻይ ዎꬌዳ አሳይ ፓይዱዋን ዳሬዳ።
12 መꬍና ጎዳይ አሞረቱዋ፥ እስራኤልያ አሳዉ አꬅ እሜዳ ጋላስ፥ እስራኤልያ አሳ ስንꬃን ኢያሱ መꬍና ጎዳ፥
“አዋ አይፊ ጋባኦና ቦላን፥
ዉለናን ጋምኦ።
አግናይካ አያሎና ዛንጋራ ቦላን ኤቆ”
ያጌዳ።
13 ሄዋፐ ጉየ እስራኤልያ አሳይ ባረንቱ ሞርከቱዋ ጾናና ጋካናዉ፥ አዋይ ዉለናን ጋምኤዳ። አግናይካ ባረ ደእያ ሳኣፐ ቃጽቤና።
ሄዌ ያሻራ ማጻፋን ጻፈት ኡቴዳ። አዋይ ሳሎ ግዶ ባጋን ቃጸናን ኤቄዳ፤ እት ጋላሳ ኡባ አዋይ ዉለናን ታኬዳ።
14 መꬍና ጎዳይ አሳይ ኦዴዳዋ ስሴዳ ሄ ጋላሳ ማላ ጋላሳይ ሄዋፐ ካሰ ግድናካ፥ ሄዋፐ ሃ ዶምና ኡባካ ሀንቤና። ቱሙካ መꬍና ጎዳይ እስራኤልያ አሳዉ ኦለቴዳ!
15 ሄዋፐ ጉይያን ኢያሱነ እስራኤልያ ኦላንቻቱ ኡባይ ባረንቱ ዱንካኔዳ ሳኣ ገልጋላ ስሜድኖ።
እቼሹ ካታቱ ጾነቴድኖ
16 ሄ አሞራዋናቱዋ ካተቱ እቼሻቱ ባቃቲደ፥ ማቄዳ ካታማ ማታን ደእያ ጎንጎሉዋ ግዶን ቆሰቴድኖ።
17 እያሶ፥ “እቼሹ ካተቱ፥ ማቄዳ ካታማ ማታን ደእያ ጎንጎሉዋ ግዶን ቆሰቴዳዋንታ ደሜዶ” ያጊደ ኦዴድኖ።
18 ኢያሱ፥ “ዎልቃማ ሹቻቱዋ ጎንዶርሲደ፥ ጎንጎሉዋ ፐንግያ ጎርዲደ ኡንቱንታ ናጋና ማላ፥ አሳ ያን ዎꬅተ።
19 ሽን ህንተንቱ ያን ጋምኦፕተ፤ ህንተንቱ ሞርከቱዋ የደርሲደ፥ ጉየና ኡንቱንታ ኦልተ፥ ኡንቱንታ ኡንቱንቱ ካታማ ገልሶፕተ። መꬍና ጎዳይ ህንተንቱ ጾሳይ ኡንቱንታ ህንተንቱ ኩሽያን አꬂደ እሜዳ” ያጌዳ።
20 ባረንቱ ግምበቴዳ ካታማቱዋ ባቃቲደ ገሌዳ ላፋ አሳቱ አትና፥ ህንኮ አሳ ኡባ ኢያሱነ እስራኤልያ አሳይ ዉርስ ዎꬌድኖ።
21 ሄዋፐ ጉይያን፥ አሳይ ኡባይ ሳሩዋን ስሚደ፥ ኢያሱ ዱንካኒደ ደእያ ማቄዳ ግያሳ ዬዳ። ሄደፐ ዶምና እስራኤልያ አሳ ቦላን እት ቃላነ ቃቴዳ አሳይ ባዋ።
22 ሄዋፐ ኢያሱ፥ “ጎንጎሉዋ ፐንግያ ዶዪደ፥ ሄ እቼሹ ካተቱዋ ከሲደ፥ ታዉ ሃ አኪደ ዪተ” ያጌዳ።
23 ሄዋፐ ጉየ ጎንጎሉዋ ግዶፐ የሩሳላመ ካትያ፥ ከብሮነ ካትያ፥ ያርሙታ ካትያ፥ ላክሻ ካትያነ ኤግሎና ካትያ ከሲደ አኮ አሄድኖ።
24 ኡንቱንቱ ሄ ካተቱዋ ኢያሱኮ አሄዳ ዎደ፥ ኢያሱ እስራኤልያ አሳ ኡባ ባረኮ ጼሲደ ባረናና ቤዳ ኦላ ጋዳዋቱዋ፥ “ሃ ዪደ ህንተንቱ ገድያን ሀ ካተቱዋ ቆꬍያ የꬍተ” ያጌዳ። ሄዋፐ ዪደ ባረንቱ ገድያን ኡንቱንቱ ቆꬍያ የꬌድኖ።
25 ኢያሱ ኡንቱንታ፥ “ያዮፕተ፤ ህርጎፕተ፤ ምንተነ ጻልተ። ህንተንቱ ኦለትያ ህንተንቱ ሞርከቱዋ ኡባ መꬍና ጎዳይ ሀዋዳን ኦꬃና” ያጌዳ።
26 ሄዋፐ ጉይያን ኢያሱ እቼሹ ካተቱዋ ዎꬊደ እቼሹ ምꬃ ቦላን ካቄዳ፤ ኡንቱንቱ ኦማርስ ጋካናዉ ካቁዋን ፔሼድኖ።
27 አዋይ ዉልያ ዎደ፥ ኢያሱ አዛዝና ኡንቱንታ ምꬃፐ ዎꬄድኖ፤ ኡንቱንቱ ካሰ ቆሰቲደ ደኤዳ ጎንጎሉዋ ግዶ ኦሌድኖ። ያቲደ ጎንጎሉዋ ፐንግያ ዎልቃማ ዎልቃማ ሹቻቱዋ ጎንዶርሲደ ጎርዴድኖ። ሄ ሹቻቱ ሀቼ ጋካናስካ ያን ደኢኖ።
ኢያሱ አሞራዋናቱዋ ካታማቱዋነ ሀራቱዋካ ጾኔዳ
28 ሄ ጋላስ ኢያሱ ማቄዳ ካታማ ኦይቂደ ካታማ ኡባ ꬋይሴዳ፤ ካታማን ደእያ አሳ ኡባ እቱዋነ አሸናን ዉርስ ዎꬌዳ። እያርኮ ካታማ ካትያ ካሰ ዎꬌዳዋዳን፥ ማቄዳ ካታማ ካትያካ ዎꬌዳ።
29 ሄዋፐ ጉይያን ኢያሱነ አናና ደእያ አሳይ እስራኤልያ አሳይ ኡባይ ማቄዳ ካታማፐ ሊብና ግያ ካታማ ቢደ ኦሌድኖ፤
30 መꬍና ጎዳይ ሄ ካታማካ ካታማ ካትያካ እስራኤልያ አሳ ኩሽያን አꬂደ እሜዳ። ኢያሱ እቱዋነ አሸናን፥ ካታማን ደእያ አሳ ኡባ ቃራ ማሻን ቡሳኬዳ። ያርኮ ካታማ ካትያ ካሰ ዎꬌዳዋዳን፥ ሊብና ካታማ ካትያካ ዎꬌዳ።
31 ሄዋፐ ጉይያን ኢያሱነ አናና ደእያ እስራኤልያ አሳይ ኡባይ ሊብና ካታማፐ ላክሻ ካታማ ቢደ ሄ ካታማ ዶዲደ ኦሌድኖ።
32 መꬍና ጎዳይ ላክሻ ካታማ እስራኤልያ አሳ ኩሽያን አꬂደ እምና ኢያሱ ሄ ካታማ ላኤንꬆ ጋላሳን ኦይቄዳ። ሊብና ካታማ ኦꬄዳዋዳን ላክሻ ካታማካ ኦꬄዳ፤ ሄ ካታማን ደእያ አሳ ኡባ ቃራ ማሻን ቡሳኬዳ።
33 ሄ ዎደ፥ ገዜራ ካታማ ካትያ ሆራም፥ ላክሻ ካታማ ካትያ ማዳናዉ ዬዳ፤ ሽን ኢያሱ አካ አ አሳካ ጾኔዳ፤ ኡንቱንቱፐ እት አሳይነ ፓጻ አትቤና።
34 ሄዋፐ ስሚደ፥ ኢያሱነ አናና ደእያ እስራኤልያ አሳይ ኡባይ ላክሻ ካታማፐ ኤግሎና ካታማ ቢደ ሄ ካታማ ዶዲደ ኦሌድኖ።
35 ሄ ጋላስ ኤግሎና ካታማ ኦይቂደ ቃራ ማሻን ቡሳኬድኖ። ላክሻ ካታማ ኦꬄዳዋዳን፥ ኤግሎና ካታማን ደእያ አሳ ኡባ ዉርስ ዎꬌድኖ።
36 ሄዋፐ ጉይያን ኢያሱነ አናና ደእያ እስራኤልያ አሳይ ኡባይ ኤግሎናፐ ከብሮና ቢደ ከብሮና ኦሌድኖ።
37 ሄ ካታማ፥ ኡንቱንቱ ካትያነ ሄ ካታማ ዩሹዋን ደእያ ቄር ካታማቱዋ ኦይቄድኖ። ኡንቱንቱን ደእያ አሳ ኡባካ ቃራ ማሻን ቡሳኬድኖ። እት አሳካ አሽበይክኖ። ኢያሱ ኤግሎና ኦꬄዳዋዳን ሄ ካታማካ ኦꬄዳ፤ ኡንቱንቱን ደእያ አሳካ ዉርስ ዎꬌዳ።
38 ሄዋፐ ጉይያን ኢያሱነ አናና ደእያ እስራኤልያ አሳይ ኡባይ ዳቢራ ካታማ ስሚደ ኦሌድኖ።
39 ኡንቱንቱ ሄ ካታማካ፥ ካትያካ፥ ካታማ ዩሹዋን ደእያ ቄር ካታማቱዋካ ኡባ ኦይቂደ ኡንቱንቱን ደእያ አሳ ኡባ እቱዋነ አሸናን ዉርስ ዎꬌድኖ። ኢያሱ ከብሮና ካታማነ ሊብና ካታማነ አ ካትያ ኦꬄዳዋዳን፥ ዳቢራ ካታማነ አ ካትያ ኦꬄዳ።
40 ኢያሱ ቢታ ኡባ፥ ገዝያ፥ ኔጌባ ባዙዋ፥ ጋꬋ ጋድያነ ኡንቱንቱ ካተቱዋናካ ኦይቄዳ። መꬍና ጎዳይ እስራኤልያ ጾሳይ አዛዜዳዋዳን፥ ጋድያ ቦላን ፓጻ ሸምፑዋና ደእያ አሳ ኡባ እቱዋነ አሸናን ዉርስ ዎꬌዳ።
41 ኢያሱ ኡንቱንታ ቃዴሳ-ባርነፐ ዶሚደ ቢደ ጋዛ ጋካናዉ፥ ቃይ ጎሸና ቢታ ኡባፐ ዶሚደ ቢደ ጋባኦና ጋካናዉ ኡባ ጾኔዳ።
42 መꬍና ጎዳይ እስራኤልያ ጾሳይ እስራኤልያ አሳዉ ኦለቴዳ ጋሱዋን፥ ኢያሱ ሄ ካተቱዋ ኡባ ኡንቱንቱ ቢታናካ እት ገደ ኦላን ጾኔዳ።
43 ሄዋፐ ጉይያን ኢያሱነ እስራኤልያ አሳይ ኡባይ ባረንቱ ዱንካኔዳ ሳኣ ገልጋላ ስሜድኖ።