7
አካና ናጋራ
1 እስራኤልያ አሳይ ጾሳዉ አማነተናን እጺደ፥ ጺነ ግ ዎꬄዳባፐ አኬዳ። ሄዋ አኬዳዌ አካና፤ አካን ካርማ ናኣ፤ ካርም ዝምራ ናኣ፤ ዝምር ይሁዳ ዛርያ ግዴዳ ዛራሀ ናኣ። ያትና፥ ጾሳ ሀንቁ እስራኤልያ አሳ ቦላ ኤጼዳ።
2 ኢያሱ ያርኮን ደኢደ ቤቴለ ካታማፐ አዋይ ዶልያ ባጋና ቤት-አዌና ግያሳ ማታን ደእያ አይ ጌተትያ ካታማ አሳ ኪቲደ፥ “ቢተ፤ ሄ ቢታ ጌድተ” ያጌዳ። አሳቱ ቢደ፥ አይ ካታማ ጌዴድኖ።
3 ጌዴዳ አሳቱ ኢያሱኮ ስም ዪደ፥ “ኡባ አሳይ አይ ካታማ ኦላናዉ ባና ኮሸና፤ ላኡ ዎይ ሄዙ ሻአ አሳ የዳ። ያን አማሬዳ አሳይ ደእያ ድራዉ፥ አሳይ ኡባይ ዳቡሮፖ” ያጌድኖ።
4 ያትና፥ ሄዙ ሻአ ግድያ አሳቱ ኦለታናዉ አይ ካታማ ቤድኖ። ሽን ኡንቱንቱ አይ ካታማ አሳ ስንꬃፐ ባቃቴድኖ።
5 አይ ካታማ ድርሳ ፐንግያፐ ዶሚደ፥ ሹቻ ቆእያ ሳኣ ጋካናዉ እስራኤልያ አሳ የደርሴድኖ፤ ደርያ ዱገꬃን ሀታማነ ኡሱፑን ግድያ አሳ ዎꬌድኖ። ሄዋን አሳ ዎዛናይ ኮልዲደ፥ ሃꬃ ከሴዳ።
6 ሄዋፐ ጉይያን ኢያሱ ካዮቲደ፥ ባረ ማዩዋ ፔꬊደ ጾሳ ታቦታ ስንꬃን ኦማርስ ጋካናዉ ጉፋኔዳ። እስራኤልያ ጭማቱካ አዋዳን ሀኔድኖ፤ ባረንቱ ሁጲያንካ ባና ቆሌድኖ።
7 ሄዋፐ፥ ኢያሱ ሀዋዳን ያጌዳ፤ “ሀይ ፖራ! ኡባ ሞድያ ጾሳዉ፥ ኑና አሞረ አሳዉ አꬃ እማደ ዉርስሳናዉ አያዉ ዮርዳኖሳ ሻፋ ፕንꬃ አሃድ? ኑን ዮርዳኖሳ ሻፋፐ ሄፍንꬃ ባጋን አቴዶ ግዴሮኮ!
8 አቤት ጎዳዉ፥ እስራኤልያ አሳይ ጾነቲደ፥ ባረ ሞርከቱዋ ስንꬃፐ ባቃቶፐ፥ ታን ዋጎ?
9 ካናነቱነ ሀ ቢታን ደእያ አሳይ ኡባይ ሀ የዉዋ ስሲደ፥ ኑና ዶዳናዋንታ፤ ጋድያፐካ ꬋይሳናዋንታ። ስም፥ ነ ዎልቃማ ሱንꬃዉ ኔን ኦꬅያባይ አዬ?” ያጌዳ።
10 ጾሳይ ኢያሳ፥ “ደንዳ ኤአ! ሀዋዳን አያዉ ጉፋናድ?
11 እስራኤልያ አሳይ ናጋራ ኦꬄዳ፤ ታን ኡንቱንቱና ጫቀቴዳ ታ ጫቁዋ አꬌድኖ። ኡንቱንቱ ማጋራ ጌተቴዳ ሚሻቱዋፐ አኬድኖ፤ ዉኤድኖ፤ ዎርዶቴድኖ። ቃይ ሄ ሚሻ ኡንቱንቱ ባረንቱ ሚሻና ጋꬅ ዎꬄድኖ።
12 ሄዋ ድራዉ፥ እስራኤላቱ ባረንቱ ሞርከቱዋ ስንꬃን ኤቃናዉ ዳንዳይክኖ። ኡንቱንቱ ꬋያናዉ በስያ ድራዉ፥ ባረንቱ ሞርከቱዋ ስንꬃፐ ባቃቴድኖ። ማጋራ ጌተቴዳ ሚሻ ህንተንቱ ማታን ደእያዋ ህንተንቱ ꬋይሳና ꬋዮፐ፥ ሀዋፐ ስንꬃዉ ታን ህንተንቱና ግድከ።
13 “ደንዳ፤ አሳ ጌሻ። ኡንቱንቶ ሀዋዳን ያጋደ ኦዳ፤ ‘ዎንትዉ ህንተንቱ ሁጲያዉ ጌይተ። ጾሳይ እስራኤልያ ጾሳይ ህንተንታ፤ “እስራኤላቶ፥ ማጋራ ጌተቴዳ ሚሻይ ህንተንቱ ማታን ደኤ። ህንተንቱ ሄ ሚሻ ህንተንቱ ማታፐ ድጋና ጋካናዉ፥ ህንተንቱ ሞርከቱዋ ስንꬃን ኤቃናዉ ዳንዳይክታ” ያጌ።
14 ዎንታ ጉራ፥ ህንተንቱ ዛርያን ዛርያን ሺቅና ጾሳይ፥ “ሀዋ” ጌተትያ ዛሪ፥ ባረ ያራን ያራን ሺቃና፤ ቃይ ጾሳይ፥ “ሀዋ” ግያ ያራይ ባረ ሶ አሳን አሳን ሺቃና፤ ቃይ ጾሳይ፥ “ሀዋ” ግያ ሶ አሳይ እት እት አሳይ ታራን ታራን ሺቃና።
15 ሄዋፐ ጉይያን ማጋራ ጌተቴዳዋና ኦይቀቴዳ አሳይ፥ ባረዋ ኡባና ታማን ጹገታና። አያዉ ጎፐ፥ ጾሳ ቃላ ጫቁዋ እ አꬊደ፥ እስራኤልያ አሳ ግዶን ካዉሻባ ኦꬄዳ’ ያጋ” ያጌዳ።
16 ኢያሱ ዎንተꬃ ጋላስ ጉራን ደንዲደ፥ እስራኤልያ አሳ ዛርያን ዛርያን ሺሽና ይሁዳ ዛሪ አከቴዳ።
17 ይሁዳ ዛሪ ሺቅና፥ ዛራሀ ያራይ አከቴዳ፤ ዛራሀ ያራይ ሺቅና፥ ዝምራ ሶ አሳይ አከቴዳ።
18 ዝምራ ሶ አሳይ ሺቅና፥ ዉርሰꬃን ዝምራ ናኣ ናአይ፥ ካርማ ናአይ አካን አከቴዳ።
19 ሄዋፐ፥ ኢያሱ አካና፥ “ታ ናአዉ፥ ጾሳ እስራኤልያ ጾሳ ቦንቻ፤ አ ጋላታ። አነ ኔን ኦꬄዳዋ ታዉ ቆሰናን ኦዳ” ያጌዳ።
20 ሄዋፐ ጉየ አካን ኢያሳ፥ “ኤ ቱማ! ታን ጾሳ እስራኤልያ ጾሳ ናቃድ። ታን ኦꬄዳዌ ሀዋ:
21 ኑን ኦሞዴዳ ሚሻ ግዶን ታን እት ሎእያ ባብሎነ ጋድያ ካባ፥ ላኡ ጼቱ ጻጋራ ብራነ ባጋ ኪሎ ግድያ ዎርቃ በኣድ፤ አካናዉ አሞቴዳ ድራዉ አካድ። ያታደ ታ ዱንካንያ ግዶን ቢታ ጋርሳን ቆሳድ፤ ብራይካ ኡባፐ ጋርሳና ደኤ” ያጌዳ።
22 ኢያሱ አሳ ኪትና፥ ኡንቱንቱ ዱንካንያ ዎጺደ ገልያ ዎደ፥ ዱንካንያ ግዶን ሚሻ ቆስ ዎꬄዳዋ ደሜድኖ፤ ብራይካ ሚሻቱዋፐ ጋርሳና ደኤ።
23 ኪተቲደ ቤዳ አሳቱ ሚሻ ዱንካንያ ግዶፐ አኪደ፥ ኢያሱኮነ እስራኤልያ አሳ ኡባኮ አሄድኖ፤ ጾሳ ስንꬃን ዎꬄድኖ።
24 ሄዋፐ ጉይያን ኢያሱነ እስራኤልያ አሳይ ኡባይ አካና ብራ፥ ካባ፥ ዎርቃ፥ አ አቱማ ናናነ ማጫ ናና፥ አ ሚዛ፥ ሀረቱዋነ ዶርሳቱዋ፥ አ ዱንካንያነ አዉ ደእያዋ ኡባ አኪደ፥ መቱዋ ዎምባ ግያሳ አሄድኖ።
25 ኢያሱ አካና፥ “ሀ መቱዋ ኑ ቦላ አያዉ አሃድ? ጾሳይ ሀቼ ነ ቦላካ መቱዋ አሀና” ያጌዳ።
እስራኤልያ አሳይ ኡባይ አካናነ አ ሶ አሳ ሹቻን ጫድ ዎꬊደ፥ አዉ ደእያዋ ኡባ ታማን ጹጌዳ።
26 ኡንቱንቱ አካና ቦላን ሀቼ ጋካናዉ ደእያ ዳሮ ሹቻ ኬሌድኖ። ያትና፥ ጾሳይ ባረ ኤጽያ ሀንቁዋ ዛሬዳ። ሀቼ ጋካናዉ ሄ ሳአይ መቱዋ ዎምባ ጌተቴዳዌ ሀዋሳ።