8
አይ ካታማይ ጾነቴዳ
1 ጾሳይ ኢያሳ፥ “ያዮፓ፤ ህርጎፓ! ኦላንቻቱዋ ኡባ ኔናና አካደ፥ አይ ካታማ ኦላናዉ ከሳ። አይ ካታማ ካትያ፥ አ አሳ፥ አ ካታማነ አ ቢታ ታን ነ ኩሽያን አꬃደ እማድ።
2 ኔን እያርኮ ካታማነ አ ካትያ ꬋይሴዳዋዳን፥ ሄዋዳንካ አይ ካታማነ አ ካትያ ꬋይሳ። ሽን፥ ቦንቄዳ ኦሞዱዋነ ድኤዳ መህያ ህንተንቶ አክተ። ካታማፐ ጉየ ባጋና ሙጊደ ናግያ ኦላንቻቱዋ ዎꬃ” ያጌዳ።
3 ኢያሱነ ኦላንቻቱ ኡባይ አይ ካታማ ኦላናዉ ደንዴድኖ። ኢያሱ ባረ ኦላንቻቱዋ ግዶፐ ሀታሙ ሻአ ግድያ ምኖ ኦላንቻቱዋ ዶሪደ፥ ቃማን የዴዳ።
4 ኡንቱንታ ሀዋዳን ያጊደ አዛዜዳ፤ “ስስተ፥ ካታማፐ ጉየ ባጋና ሙጊደ ናግተ። ካታማፐ ሃኪደ ቦፕተ፤ ኡባይካ ጊጊደ ናግተ።
5 ታንነ ታናና ደእያ አሳይ ኡባይ ካታማኮ ሺቃና። ሄ ዎደ አይ ካታማ አሳይ ካሰዋዳንካ ኑና ኦላና ጊደ ከሳና፤ ኑን ኡንቱንቱፐ ባቃታና።
6 ካታማፐ ኡንቱንቱ ዉር ከሳና ጋካናዉ፥ ኑን ኡንቱንቶ ዎጻና፤ ያቶፐ ኡንቱንቱ፥ ‘ካሰዋዳንካ እስራኤላቱ ኑ ስንꬃፐ ባቃቲኖ’ ያጋና።
7 ሄ ዎደ ህንተንቱ ሙጌዳ ሳኣፐ ከስነ፥ ካታማ ኦይቂ አጋና፤ ጾሳይ ህንተንቱ ጾሳይ ካታማ ህንተንቱ ኩሽያን አꬅ እማና።
8 ካታማ ኦይቄዳዋፐ ጉይያን፥ ጾሳይ አዛዜዳዋዳን ታማን ጹግተ። ስም ታን ህንተንቶ ኦዳድ” ያጌዳ።
9 ኢያሱ ኦላንቻቱዋ የድና ኡንቱንቱ ሙግያ ሳኣ ቢደ አይ ካታማፐ አዋይ ዉልያ ባጋና ደእያ ቤቴለፐነ አይፐነ ግዱዋን ሙጊደ ናጌድኖ። ሽን ኢያሱ ሄ ጋላስ ቃማ አሳና እትፐ አቄዳ።
10 ዎንተꬃ ጋላስ ጉራን ኢያሱ ደንዲደ፥ ኦላንቻቱዋ ሳልፕሴዳ፤ ያቲደ እነ እስራኤልያ ጭማቱነ ኦላንቻቱዋ ካለꬂደ አይ ካታማ ቤድኖ።
11 አናና ደእያ ኦላንቻቱ ኡባይ ቢደ፥ አይ ካታማ ማቲደ ካታማፐ ሁጲሳ ባጋና ዱንካኔድኖ፤ ኡንቱንቱፐነ አይ ካታማፐነ ግዱዋን ዎምባይ ደኤ።
12 ኢያሱ እቼሹ ሻአ ኦላንቻቱዋ አፊደ፥ ካታማፐ አዋይ ዉልያ ባጋና፥ ቤቴለፐነ አይፐ ግዱዋን ሙጋናዳ ዎꬄዳ።
13 ካታማፐ ሁጲሳ ባጋና ደእያ ኦላንቻቱዋነ ካታማፐ አዋይ ዉልያ ባጋና ሙግ ኡቴዳ ኦላንቻቱዋ ኡባ ሳኣ ኦይꬄዳ። ሄ ጋላስ ቃማ ኢያሱ ሄ ዎምባን አቄዳ።
14 አይ ካታማ ካቲ ሄዋ በኤዳ ዎደ፥ እነ አ ኦላንቻቱነ ኡባይ ጉራን ኤሌል ደንዲደ፥ አራብያ ዱገ አፍያ ኦግያ ኦይቂደ፥ እስራኤልያ አሳና ኦላ ጋከታናዉ ዬድኖ፤ ሽን ካቲ ካታማፐ ጉየ ባጋና ሙግ ኡቴዳ ኦላንቻቱ ደእያዋ ኤርቤና።
15 ኢያሱነ እስራኤልያ ኡባይነ ጾነቴዳዋ ማላቲደ፥ ኡንቱንቱ ስንꬃፐ ባዙዋ ስሚደ ባቃቴድኖ።
16 አይ ካታማን ደእያ አሳይ ኡባይ ኡንቱንታ የደርሳናዉ ጼገቲደ ኢያሳ የደርሲደ ካታማፐ ሃኪደ ቤድኖ።
17 አይንነ ቤቴለን ደእያ አሳይ ኡባይ እስራኤልያ አሳ የደርሳናዉ ዉር ከስ ድግና፥ ካታማይ ናግያዌ ባይናን ጮ ዶያ አቴዳ።
18 ሄዋፐ ጉይያን መꬍና ጎዳይ ኢያሳ፥ “ነ ኩሽያን ደእያ ቶራ አይ ካታማኮ ዛራደ ደንꬃ። አያዉ ጎፐ፥ ታን አይ ካታማ ነ ኩሽያን አꬃደ እማና” ያጌዳ። ኢያሱ ባረ ቶራ ካታማኮ ዛሪደ ደንꬄዳ።
19 ኢያሱ ቶራ ያ ዛሪደ ደንꬄዳ ዎደ፥ ሙግ ደእያ ኦላንቻቱ ባረንቱ ሙጌዳ ሳኣፐ ኤሌል ደንዲደ፥ ካታማ ገል አጌድኖ። ኦይቂደ፤ ኤለካ ካታማ ታማን ኦይꬅ አጌድኖ።
20 አይ ካታማ አሳይ ጉየ ስሚደ ጼልያ ዎደ፥ ካታማ ጩዋይ ሳሉዋ ከሴዳዋ በኤድኖ፤ ሽን ያነ ሃነ ባቃታናዉ ዳንዳይበይክኖ። አያዉ ጎፐ፥ ባዙዋ ባቃቴዳ እስራኤልያ አሳይ ባረና የደርሴዳ ኡንቱንቱ ቦላ ጉየ ስሜዳ።
21 ኢያሱነ እስራኤልያ አሳይ ኡባይ ሙግ ኡቴዳ ኦላንቻቱ ካታማ ኦይቄዳዋነ ጩዋይ ሳሉዋ ከሴዳዋ በኤዳ ዎደ ጉየ ስሚደ፥ አይ ካታማ አሳ ዎꬌድኖ።
22 ሙግ ኡቴዳ ኦላንቻቱካ ካታማፐ ኡንቱንቱ ቦላ ከሴድኖ። ያትና፥ አይ ኦላንቻቱ እስራኤልያ ኦላንቻቱዋን ላኡ ባጋና ድረቴድኖ። እት አሳይነ ፓጻ አተናን ዎይ ከስ አከናን ኡባ ዎꬍ ዉርሴድኖ።
23 ሽን አይ ካታማ ካትያ ፓጻ ኦይቂደ፥ ኢያሱኮ አሄድኖ።
24 እስራኤልያ አሳይ አይ ካታማ አሳይ ኡንቱንታ የደርሴዳ ደምባን ቃራ ማሻን ሙሸሬꬅ ዉርሴዳዋፐ ጉይያን፥ ኡባይካ ጉየ አይ ካታማ ስሚደ፥ ካታማን አቴዳ አሳ ኡባ ቃራ ማሻን ዎꬌድኖ።
25 ሄ ጋላስ አይ ካታማ አሳይ አቱማዌነ ማጫዌ ኡባይ ዉር ሀይቄዳ፤ ሀይቄዳ አሳይ ኡባይ ታማነ ላኡ ሻአ።
26 ኢያሱ አይ ካታማን ደእያዋ ኡባ ሙለ ዉርሳና ጋካናዉ፥ ካታማኮ ማል ዎꬄዳ ቶራ ዱገ ዎꬅቤና።
27 ሽን መꬍና ጎዳይ ኢያሳ አዛዜዳዋዳን፥ እስራኤልያ አሳይ ሄ ካታማ መህያነ ደእያባ ባረንቶ አኬድኖ።
28 ኢያሱ አይ ካታማ ጹግና ሀቼ ጋካናዉ ሹቻ ኬላ ግዲደ አት አጌዳ።
29 አይ ካታማ ካትያ ኦማርስ ጋካናዉ ምꬃ ቦላን ካቄዳ። አዋይ ዉልያ ዎደ፥ ኢያሱ አዛዝና፥ አ አሃ ካቄዳ ምꬃፐ ዎꬂደ ካታማ ገልያ ፐንግያን ኦሌድኖ፤ አ ቦላን ዳሮ ሹቻ ኬሌድኖ። ሹቻይ ሀቼ ጋካናዉ ሄ ሳኣን ደኤ።
ኤባላ ደርያን ህጊ ናባበቴዳ
30 ሄዋፐ ጉይያን ኢያሱ ኤባላ ግያ ደርያ ቦላን መꬍና ጎዳዉ እስራኤልያ መꬍና ጎዳዉ ያርሹዋ ያርሽያ ሳኣ ግምቤዳ።
31 መꬍና ጎዳ ቆማይ ሙሴ እስራኤልያ አሳ አዛዜዳዋዳንነ ሙሴ ህግያ ማጻፋን ጎዳዉ፥ ያርሽያ ሳአይ ማሰትቤናነ ብራታይ ቦችቤና ሹቻፐ ግምበቴዳ። አን መꬍና ጎዳዉ ጹግያ ያርሹዋነ እትፐተꬃ ያርሹዋ ያርሼድኖ።
32 ሄ ሳኣን እስራኤልያ አሳይ ጼልሽን፥ ኢያሱ ሙሴ ህግያ ዱቆዋ ሹቻ ቦላን ጻፌዳ።
33 ሄ ዎደ፥ እስራኤልያ አሳይ ኡባይ፥ እስራኤልያ ዛራቱ፥ አላጋቱ፥ ጭማቱ፥ ጋዳዋቱነ ዳናቱ ኡባይ መꬍና ጎዳ ቃላ ጫቁዋ ታቦታ ቶኬዳ ሌዊያ ዛርያ ግድያ ቄሳቱዋ ስንꬃን ቃላ ጫቁዋ ታቦታፐ ኡሸቻ ባጋናነ ሀድርሳ ባጋና ኤቄድኖ። ኡንቱንቱፐ ባጋ አሳይ ባረንቱ ዞኪያ ጋሪዛማ ግያ ደርያኮ ዛርና፥ ባጋ አሳይ ኤባላ ግያ ደርያኮ ዛሪደ ኤቄድኖ። ኡንቱንቱ መꬍና ጎዳ ቆማይ ሙሴ ካሰ አዛዜዳዋዳን፥ እስራኤልያ አሳ አንጃናዉ ሄዋዳን ሀኔድኖ።
34 ሄዋፐ ጉይያን ህግያ ማጻፋን ጻፈቶዋዳን፥ ኢያሱ ህግያ ቃላ ኡባ፥ አንጁዋካ ሸቃካ ናባቤዳ።
35 ሙሴ አዛዜዳዋ ኡባፐ ኢያሱ ናባበናን አጌዳ እት ቃላይካ ባዋ። ኩመንꬃ እስራኤልያ ሺቆ፥ ማጫ አሳዉ፥ ናናቶ፥ ኡንቱንቱ ግዶን ደእያ አላጋቱዋናካ ኡባዉ ናባቤዳ።