4
Eblum alimi, eltum alimi a ekubin
1 Owo n kehm kpe seenge fere nyehn eblum kpee ni ane kp'limi atem go njini:
N nyehne abonngo nya ane ba bo kp'limi bo eblum, jol nkakeltim bo kpimm;
ane ba kp'limi bo nlum kpi eko, wo bo nkakeltim bo kpimm.
2 N kehm bungu gbul gbul gbuul re, ane ba ma kpo fi, bo kpi eyebatahng sehnge aneb mbir mbir,
bo ji kpeka li go elkpin.
3 Nne no bo kal-e j'jel ye wo ga nob a ne sehnge bo njahm ebal ebal,
ye ji kala nyehn ab'bi nya ane kp'limi go njini.
4 N t'tob nyehne re enok kpee, a eko kpee ji nne kpo kak go eltum ni alimi no, kpo lohng go eteele ala ji nne kpi no bada ntem. Jia fvfo ejumjum lohngem, li ana nne kp'beke kam elfeb.
5 Agboolo ane kpo wal abo ebo, ko elrannge ba ka elbo.
6 Ga nob re nne bel ndabbo ejum alehke anyehng a enange eltim, sehnge re á bel ndabbo nsol alehke ebal go elnyennge lim eltum,
elnyennge lim eltum li ana nne kp'kame toono elfeb.
7 Owo n kehm kpe nyehn ejum jehko ji ki lohng ejumjum go njini nyia.
8 Nne awohng jolo go no lene ntahng ntahng, jol mmon a belem afii mmonannyehn.
Tvtv o, á joom lahng eltum alimi, jol afang enye we-e joom gbal.
Owo á kehm bahbe elne re, <<Anv, nne awoo me n kp'nyehne erem jo lim eltum nia ka-e,>> <<Fvfo jenji wahnge n kil elbele ngare lim elgeere?>>
Jia fvfo tob li ejum mbol mbol, a erem bi kpo kpo ko et'tane ba!
9 Ane abal ba ga nob sehnge nne awohng,
tibre, tibre nsehng eltum ebo bahke gbale.
10 Nne awohng ebo l'foro gbo, noko bahk-e mehle yiimi.
Wo eyuu a nne no bahke gboko fvfo k'bel nne no bahk-e mehle yiimi.
11 Budu o, ane abal l'noongo edi ajehng, bo bahke bele elfuubu bo.
Wo nne no li antahng bahke limi rejen kehm bele elfuubu ngubjing?
12 Jol nne awohng nne noko bahk-e ma ko elfono, ane abal bahke ma yiimi ka elbo.
Nlehke mi bo fere nja era bahke riidi eltohngo kim.
Eko edi afili ejumjum lohngem
13 Nkubin a njangkun nyi kpi ngbere nyi ga nob sehnge ek'kulu egboolo ntul, no kil jo wuk erehke.
14 Li ma jol re njangkun nyio lohngo ngbekobo ba kuumu etul, afii bo jele go ekpak go ejahbe ji á kp'fili.
15 N nyehne re ane kpee ba jolo go elkpin go njini jo toono njangkun nyio nyi ba kuumu etul toon-e.
16 Ane ba á jo fili bo, jol go nfange bo jolem.
Wo ane ba bo jele bo ngare nyi á ma kuumu etul sehng, eltim yebem bo bada a ne. Jia ejumjum lohngem, nne kp'kame na toono elfeb.