5
Lim ana a ko nwongo ka Jehova
1 Jo baabe akpade eljen enya a l'je go Etahk Esowo. Jo je re wo song wuungu atung, sehnge re wo song lim njom nyi agboolo ane, bo ji kil jo kahn re boblim ebi.
2 Ka jo warre go nnyo, jol ejum ki-a jo foomo go eltim re wo bung ejum ajehng ajehng go esamahr bi Esowo.
Esowo li go elbung, wo li ga ndi, owo wahnge nobo re wo k'ga jo bung.
3 Nne kpo leeme nlem tib go nsol gbalee nyi wob-e go eltim,
fvfo egboolo nne kpo bung alum gbalee.
4 A l'ko nwongo a Esowo, ka laange ellimi ejum jio.
Esowo eltim we-e kpehme yebe bada agboolo ane; lim ji a ko nwongo.
5 Ga fuumu re nne k'ko nwongo sehnge re á ko, k'lim ji á nyame no.
6 Ka taame nnyo ema gbul-a kak go abiafem. Fvfo ka yiimi nfaabe a ntiigetib no Etahk Esowo re, <<Nwongo nyi n ko no, n soodo na.>> Jenji wahnge a bahke limi re eltim rak Esowo bade ajum ji a bungu no, fere rannge eltum abo enya?
7 Alem gbalee a eb'bungu gb'gbal kehme lohng ejumjum.
Fvfo jo fahl Esowo.
Afang ejumjum lohngem
8 A l'nyehn go esi jahbe re bo kp'limi nkpak eblum, fere jo lam elam eje go ebi mbang, taar-e eno eje, nsol ana nyio ki-a jo kpo esi, tibre ntubesi abalimentum awohng awohg kpo bel nne no kpe fil-e. Wo atubesi bao abal abal kpi nne no kp'ware sehnge bo ane abal abal.
9 Nsehng nyi ndi li ka ane kpee; yefono ntul kpo tob li nsehng go ebgbe bi bo bahme.
10 Nne awohng awohng no akpohko kpo kor-e, akpohko we-e nehm tiki gbal;
nne awohng awohng no nsol afang kpo kor-e, nsehng afang we-e nehm tiki gbal.
Jia fvfo ejumjum lohngem.
11 Ana nsol kp'ruru,
ano wo ane ba kpo li kpo tob rur.
Anv nsehng anyii li no a nne no kpi no, sehnge re kpo kor bo re bo jo ko amahr jo nyehn?
12 Ellu ni nne no ma lim nltum kpo yebe sehng, jol afii bo li nsol ntiil afii bo li gbalee,
wo efangene, nsol afang ebo nehm taame re bo lal.
13 Me n nyehn egburu ebi ejum go njini nyia,
ji li re, nne l'behr afang enye es'kohro bahke koko ebi ba ka-e,
14 afii afang nyao fere tane tib go ebibesi,
wahnge á l'jel mmon, ejumjum nehm kpe jol ji elkv alehke.
15 Nne awohng awohng kpo lohng ebun ebun go ala nnyehn ba, ana nne awohng awohng ba no, ano wo á bahke feere.
Ejumjum á nehm bel go ntum enye kpee nyi á jo nyennge lim, ji á bahke fili go ege ebo asongo.
16 Jia fvfo egburu ebi ejum ji:
Tibre ana nne awohng awohng ba no, ano wo á bahke feere,
fvfo nsehng anyii bo kpi no, eji bo kp'nyennge lim eltum ka elfeb?
17 Go afung enye kpee, á kpo li nsol go ejannge,
a elmarre ekubin a erakatahng.
18 Ejum ji a ji m ma nyehn re kp'nobo: Ji li re, ga fuumu re nne jo li fere jo w'wo, jo bel elwohngo go ntum abo enye nyi á kp'limi go njini nyia go abon afung elkpin ba Esowo me-e ka,
tibre jia ji li ji Esowo me-e ka.
19 Budu o, Esowo l'ka nne agburu afang á fere bel nsol,
fere ka-e eko re á jo li nsehng go nsol nyio, fere ko re ano wo elkpin li no, jo bel eyebatahng go eltum ene, jia ayare nya Esowo nya.
20 Nne noo nehm jo tir gbalee bade afung nya elkpin ene, tibre Esowo me-e bum re á jo li elfo.