4
Rurema alega abandu baage
1 E Bahisiraheeri! Muyuvwirizagye ngiisi kwo Nahano agweti agaadeta.
Si agweti agamùlega kwokuno: «Emwe! Mutali bemeera, mutanali mu kundana,
ndaanaye úki kengiiri kwo nie Rurema ndi ho.
2 Si mugweti mugadaakana,
iri munabeesherana, noꞌkukizi yitana, noꞌkuyifunda mu bushule.
Mutakiri mu yihangirira, mugenderiiri naaho noꞌkukizi yitana.
3 Kyo kitumiri ikihugo kiinyu kikoli yumagusiri.
Ngiisi ábakituuziri mwo, bakola mu fwa.
Kiri neꞌnyamiishwa, zikola mu hera, kuguma noꞌtunyuni, neꞌfwi.»
Rurema alega abagingi baage
4 «Hatagirage umundu úgakizi lega uwabo, kandi iri amútwikiza ku byaha.
E bagingi! Nie gweti ngamùlega.
5 Si mugweti mugasiitara, gunakiri mwiꞌzuuba!
Neꞌkyanya kyaꞌkabigingwe, abaleevi biinyu beꞌbibeesha, nabo bagayibumbulika haashi.
Ubuzinda, nyoko Hisiraheeri, ngamúshereeza.
6 Na íbitumiri abandu baani bakoli gweti bagashereezibwa,
bwo babuziri ubumenyi.
E bagingi! Bwo mulahiiri ukummenya,
naani ngalahira kwo mutakiri bandu baani.
Na bwo mutaki twaziizi imaaja za Rurema winyu,
naani ndagaki twaza abaana biinyu.
7 «Balya bagingi, ikyanya bagweti bagayushuuka,
ibyaha byabo nabyo, iri binayushuuka.
Kwokwo, ngahindula ulushaagwa lwabo, zibe shoni.
8 Ikyanya abandu baani bali mu tanga amatuulo goꞌkukogwa ibyaha byabo,
abagingi banabuli longa byo bagaalya.
Kyo kinatumiri baloziizi kwaꞌbandu bingi bakizi yifunda mu byaha.
9 «Yabo bagingi, ngiisi byo bali mu gira,
byo naꞌbandi bandu nabo bakola mu kizi gira.
Kwokwo, bwo booshi bagweti bagayifunda mu byaha,
ngabahaniiriza.
10 Kundu bagakizi lya bweneene, halikago batagakizi yiguta.
Na kundu bagakizi shulehana, haliko batagakizi buta.
Mukuba, nie Nahano keera bakanjanda,
banakizi kulikira íbiri mu yikumbwa.
11 Ubushule neꞌndalwe,
keera byakubika amenge gaabo.»
Rurema adaaka ukuyikumba imigisi
12 «Abandu baani bagweti bagahanuusa umugisi gweꞌkiti,
bali mu loogeza ishuvyo mu ngoni.
Bakoli ba bashule, bwo keera bakayihandula ku Rurema wabo,
banatibitira mu biri mu yikumbwa.
13 Bagweti bagazamuukira ku marango, na ku tugangazi,
banagendi tangira yeꞌmizimu yabo amatuulo, banagiyokere noꞌmubadu.
Bali mu holeza mwiꞌdako lyeꞌkiti kyoꞌmwalooni, na kyoꞌmulubuna, na kyoꞌmushishi, kwo biri neꞌkimbehwa kiija.
Kyo kitumiri banyere biinyu, na bali-kazi biinyu, bagakizi yifunda mu bushule.
14 Kundu kwokwo, yabo banyere biinyu na bali-kazi biinyu, ndagabahana hiꞌgulu lyoꞌbushule.
Mukuba, kiri naꞌbagingi bagweti bagaagira mwene byebyo byaha byoꞌkushulehana.
Bali mu kizi yibiika ku yabo bashule,
banagendi tangira imizimu amatuulo mu mbeero.
Yayewe! Abandu, ku kyanya bakoli kubisirwi,
iri ulwabo, keera lwamala!
15 «E Bahisiraheeri, kundu keera mwayifundaga mu bushule,
haliko Abayuda batakwaniini ukubuyifunda mwo! Nanga, maashi!
Mutakolwe kwo mwagenda i Girigaali,
mutanazamuukire i Beeti-Haweni.
Mutanakolwe kwo mwabiika indahiro yeꞌbibeesha, mbu:
“Kwiꞌziina lya Nahano úyamiri ho!”»
16 Mukuba, yabo Bahisiraheeri bakola mindagabika, nga ngaavu yeꞌnjuuke.
Aaho! Kutagi kandi kwo Nahano angaki baragira, nga bibuzi mu ndaraara yoꞌmuyonga?
17 Si balya beene Hifurahimu, imigisi keera ikabashika!
Kwokwo, ngabaleka ngana, bakizi gira nga kwo baloziizi.
18 Yabo beene Hifurahimu, ikyanya bali mu ba keera bayusa ukunywa amaavu gaabo,
banayami gendi yifunda mu bushule.
Emwe! Basiimiri íbyangabateeza ishoni naaho.
19 Ku yukwo, imbuusi ngayu yaꞌkasuululu igayami bayehuula.
Na yago matuulo go bagweti bagatangira imigisi, gagabateeza ishoni.