5
Rurema akengula Abahisiraheeri
1 «E bagingi ba Rurema, muyuvwirize bwija.
Na niinyu, mwe Bahisiraheeri! Mutegage amatwiri.
Kiri na niinyu, mwe mulyagagi ba mu mulala gweꞌkyami! Muyuvwirize.
Si keera mukahubiisa abandu iriira munda i Misipa, kiri neꞌTaboori,
kyanatuma bagamùtwira ulubaaja kwo mukahuba!
2 Keera mukabahumbira ikishimo kila, mbu bakitibukire mwo.
Kwokwo, ngamùhaniiriza mweshi.
3 «E beene Hifurahimu, e Bahisiraheeri! Ndaabyo mwangambisha.
Mukuba, byo mugweti mugaagira, byoshi mbiyiji-yiji ku bweranyange.
Keera mukanyiyogookola, nga mushule úgweti úgayiyogookola yiba.
Keera mukanayiyulubaza lwoshi-lwoshi!»
Hosheya ayerekeza Abahisiraheeri hiꞌgulu lyeꞌmigisi
4 Abahisiraheeri, ngiisi byo bagweti bagayidulumbika mwo,
bitangabazigira kwo bashubi galukira Rurema.
Mukuba, mu mitima yabo mukoli yamiri naaho zeezo nzaliro, batanaki yiji Nahano.
5 Balya Bahisiraheeri, beene Hifurahimu, ikyanya bali mu gira ibyaha, bali mu kizi yikangaata bweneene.
Binali byebyo byaha, byo bitumiri bali mu siitara.
Kiri naꞌBayuda nabo, bagweti bagasiitara nga bo.
6 Bagweti bagakizi sholera ibitugwa byabo,
banagendi bitanga ituulo imwa Nahano.
Kundu kwokwo, batali mu múbona,
bwo keera akabayiyogookola.
7 Yabo Bahisiraheeri batakiri bemeera imwa Nahano,
si bagweti bagabuta abaana imbuga.
Na bwo bali mu yikumba byeꞌbibeesha,
ha nyuma lyoꞌmwezi muguma, bagashereezibwa kuguma neꞌkihugo kyabo.
8 «Mukizi dihiriza ikibuga i Gibeya, kiri na mu kaaya keꞌRama.
Mukizi yamiza-yamiza mu kaaya keꞌBeeti-Haweni, mu kubakengula.
Mwe basirikaani ba Binyamiini! Mushokolage injira, mu kugendi lwa.
9 «E beene Hifurahimu, ulusiku ngamùhaniiriza mwe milala yaꞌBahisiraheeri, lyo mugayibonera kwo.
Ndaakwo kundi!
10 Abimangizi baꞌBayuda, bakolaga mu zimba amatongo ga beene.
Kinatume ngabafuka kwoꞌburaakari bwani nga mwijulire gwaꞌmiiji.
11 «Yabo beene Hifurahimu, bwo baloziizi bweneene ukuyikumba imigisi,
kyo kitumiri bakola mu tindimazibwa bweneene.
Ee! Ikyanya bali mu hanwa, bagweti bagavunguka.
12 Ku yukwo, beene Hifurahimu, ngabashereeza nga kulya akashwa kali mu shereeza imirondo.
Abayuda nabo, bagabungwa nga mbahwa nzibule.
13 «Beene Hifurahimu naꞌBayuda, ikyanya bakabona ngiisi kwo balwaziri,
banagendi tabaaza mwami mukulu weꞌHasuriya.
Halikago, uyo Mwami atanahasha ukubabuka, atanabakiza.
14 «Niehe ngateera beene Hifurahimu naꞌBayuda, nga ndare.
Ngaaba nga ndare mbamu, inalyagagi ndangi.
Ngabajanganula-janganula, na mbatwale ngiisi ho ndoziizi.
Ndaanaye úgayiji bafuusa.»
Rurema akyula kwo agabasiga
15 «Ha nyuma, ngagalukira ahandu haani,
na mbeere haaho, halinde ku kyanya bagayaga kwo balyagagi banabuhube, banandooze.
Ee! Ikyanya bagalonga amalibu, bagayami ndooza.»