20
Pashuuri abiika Yeremiya mu nyumba yeꞌmbohe
1 Bulya buleevi, ikyanya Yeremiya akabutangaga, umugingi muguma úwâli riiri mukulu waꞌbalaliizi beꞌnyumba ya Nahano, iziina lyage Pashuuri mugala Himeeri, anabuyuvwa.
2 Lyeryo, uyo Pashuuri anayami múgwatiisa, anamúhimbula. Anabuli múkonera ha mulyango gwa Binyamiini, ha nyumba ya Nahano.
3 Iri bukakya shesheezi, uyo Pashuuri anabuli múshwekuula. Haaho, Yeremiya anamúbwira: «Nahano keera ahindula iziina lyawe. Utagaki hamagalwa Pashuuri. Si ukola ugakizi hamagalwa Magiri-Mishabibu (kuli kudeta: kuhuumirwa ngiisi luhande).
4 «Nahano akubwiraga kwokuno: “Ukola ugakizi huumirwa, mwe naꞌbiira baawe booshi. Ikyanya mugaaba muli mwiꞌzibo, yabo biira baawe baꞌBayuda bagaminikwa mu masu gaawe ku ngooti. Na ábagasigala, ngabatanga booshi mu maboko ga mwami weꞌBabeeri. Uyo mwami, anabatwale imbohe i Babeeri, anagendi basivya neꞌngooti.
5 «“Kano kaaya keꞌYerusaleemu, ibindu byamwo byoshi, ngolaga ngabiheereza abagoma, ngeꞌmimbu, neꞌbindu byoꞌmulimbo, na byoshi íbiri mu bihinda byaꞌbaami beꞌBuyuda. Byoshi, abagoma bagabitwala i Babeeri.
6 «“Na naawe, e Pashuuri! Ugagwatwa imbohe, kuguma naꞌbandu ba mu mwawe booshi, munatwalwe i Babeeri. Iyo munda, yo ugagendi fwira, unaziikirwe yo, mwe naꞌbiira baawe, kundu wâli kizi batangira ubuleevi kwo bagagenduukirwa.”»
Yeremiya atakira Rurema
7 E Nahano! Si ukandeba, nanayemeera kwo bibe kwokwo.
Bwo we mbimiri imisi, ndaakwo kundi.
Kwokwo, abandu bakola mu mbonyoleza ubwakya-ubwayira,
iri bananjekeereza.
8 Ngiisi kyanya ndi mu deta, na nyami yitulikania ku nduulu, mbu:
«Emwe! Kiteero neꞌmishaabo!»
Yizo ndumwa za Nahano, ikyanya ndi mu zimenyeesa abandu,
bali mu nduka, iri banajambura.
9 Uyo Nahano, hali ikyanya ndi mu deta kwo ngamúyibagira,
na mbe ndakiri mu deta kwiꞌziina lyage.
Haaho, igambo lyage liri mu yami nyaka mwo nga muliro.
Kundu nangayigumiiriza mbu niliyishwekere kwo, si liri mu huluka naaho!
10 Nyuvwiti ngiisi kwaꞌbandu bingi bakola mu hwehwetezania, mbu:
«Ngiisi luhande, hakola ikihuumula naaho! Aahago! Tugendi lega Yeremiya imwaꞌbakulu biitu!»
Kiri naꞌbiira baani ba vyuka-ngwejere, bagweti bagaloleera,
babone ngiisi kwo nangatibukira haashi.
Bali mu nyigambira, ti: «Tugirage tumútebe, halinde tumúgwase.
Kwokwo, lyo twangamùyihoola!»
11 Kundu kwokwo, Nahano ayimaaziri ha butambi lyani, ali kikalage kyeꞌndwani.
Ku yukwo, balya booshi ábakola mu ndibuza, bagasiitara, banayideedeke haashi.
Ee ma! Bwo batashobwiri ukumbima, bagalonga ishoni,
banakizi teteerwa imyakuula, halinde ishoni zaabo zitâye yibagirwe.
12 E Nahano woꞌbushobozi bwoshi! We mu geza ábakwaniini.
Uli mu loleekeza íbiyifundereziizi mu mitima yabo, kiri na mu menge gaabo.
Kwokwo, ngoli yibiisiri imwawe, gira umbulanire.
Yabo bagoma, lekaga mbone ngiisi kwo ugabayihoola.
13 Mukizi yimbira Nahano! Mukizi múhuuza!
Si ye mu kiza ábatashobwiri mu maboko ga banangora-mabi.
14 Ulusiku lwo nꞌgabutwa kwo, ludaakwe!
Hatanagire úgaadeta kwo luli lweꞌmigashani.
15 Kiri noꞌlya úkagendi menyeesa daata, ti: «Ewe! Wabuta umwana woꞌbutabana!»
16 Ulya mundu, abaagage ngoꞌtwaya two Nahano akashereeza, buzira kutukejeerera.
Ku ngiisi mukyo, akizi yuvwa akashiba.
Na ngiisi kalenge-renge, akizi yuvwa ulujongo lweꞌkiteero.
17 Aahago! Ikyanya nꞌgabutwa, kituma kiki Nahano atakayami nyita?
Nga Rurema ákinyitire mu nda ya maawe naaho!
Bwangábiiri bwija inda yage, ibaagage yo shinda yani.
18 Iyo nda ya maawe, kituma kiki nꞌgagilyoka mwo?
Si isiku zaani zooshi, ndi mu libuuka naaho, iri na njengeerwa!
Kiri na ku mbeka yoꞌburambe bwani, si ngagenderera naaho ukukizi negurwa!