21
Nahano alahiiri ukukiza Abayuda
1-2 Mwami Zedekiya akalungika Pashuuri mugala Malikiya, noꞌmugingi Sefaniya mugala Maseya, kwo bagende imwa Yeremiya. Bâli gweti bagamúganuuza kwokuno: «Mwami Nebukandeneza weꞌBabeeri akola mu tuteera. Aaho! Utuhunirage imwa Nahano, gira ayiji tutabaala. Hali ikyanya angayiji tukolera ibitangaaza, nga kwo âli kizi gira yaho kare.»
3 Yabo ábakatumwa, Yeremiya anabashuvya kwo bagendi bwira Zedekiya kwo
4 Nahano Rurema waꞌBahisiraheeri adetaga kwokuno: «Uyo mwami weꞌBabeeri, kundu mwangamúlwisagya, haliko, ibilwaniiso biinyu, ndaabyo bigaagira. Si yabo Bababeeri bakoli sokaniini inzitiro zaꞌkaaya keꞌYerusaleemu, banakola bagakayifunda mwo.
5 Kiri na nienyene, nie Nahano, keera mwandaakaza bweneene. Kwokwo, naani ngamùlwisa, na ndi woꞌbushobozi bweneene.
6 Mu yako kaaya kiinyu, ngayita mwaꞌbandu, kiri neꞌbitugwa, ku njira yeꞌkiija.
7 «Nie Nahano nadeta na kwokuno: E mwami Zedekiya! Kundu uli kuguma naꞌbandi batwali beꞌBuyuda, naꞌbandi bandu baawe, halikago ngakubiika mu maboko ga mwami Nebukandeneza weꞌBabeeri. Yabo booshi, kundu bangafuushuka mu kirya kiija, niꞌzibo, niꞌshali, haliko ulya Nebukandeneza, ndaazo ndengeerwa zo agabayuvwirwa, mbu abakejeerere. Aahabi! Si agayami bayilala mwo, gira abayite.
8 «E Yeremiya, balya bandu booshi, ubabwire kwo nie Nahano nadeta kwokuno: Mutoolage! Ka muloziizi ukuba ho, kandi iri ukufwa?
9 Aaho! Ngiisi úgasigala mu Yerusaleemu, agaafwa nyene, iba kwiꞌzibo, kandi iri kwiꞌshali, kandi iri ku kiija. Haliko, ngiisi ábagahuluka mwo, banagendi yibiika mu maboko ga balya Bababeeri ábasokaniini akaaya kiinyu, booki bagafuuka, banabe bakiri bagumaana.»
10 Nahano ashubi detaga kwokuno: «Yako kaaya, ngakabiika mu maboko ga mwami weꞌBabeeri, anakajigiivye. Mukuba keera nꞌgashungika kwo ngakashereeza, ndanâye ki katabaale.» Kwokwo kwo Nahano adesiri.
Ikikando ku baami beꞌBuyuda
11-12 «Ugendi bwira imbaga ya mwami weꞌBuyuda kwokuno: Emwe bandu ba mwiꞌkondo lya mwami Dahudi! Muyuvwirize ngiisi kwo nadeta, nie Nahano:
Ngiisi shesheezi, mukizi twa imaaja zaꞌbandu ku njira íkwaniini.
Iri umundu angaba anyagwa ibindu byage, mumúfuuse mu maboko gaꞌbanyazi.
Neꞌri mwangalahira, ngaraakara ngana-ngana!
Si keera mukayifunda mu bitalaalwe!
Buno, uburaakari bwani bugakizi yaka nga muliro, ndaanaye úgabuhoohya.
13 E bandu beꞌYerusaleemu, nie Nahano kwokwo kwo nadeta: Mutuuziri ku marango,
ku lwala úluli hiꞌgulu lyeꞌndekeera, munali mu yihaya, mbu:
“Ndaaye úwangayiji tuteera, mbu anayihandalike mu kaaya kiitu kazitire!”
Kundu muli mu deta kwokwo, nienyene ngakizi mùlwisa.
14 Ngamùhana ngana-ngana, nga ngiisi kwo bimùkwaniini.
Na nduulike ulubako lwinyu mwoꞌmuliro,
halinde gunasingoole byoshi íbimùsokaniini.»
Kwokwo, kwo Nahano adesiri.