Umuteeko gwa kana
90
(Zaburi 90–106)
Imyaka kihumbi iri mu ba nga lusiku luguma
1 Amahuuno ga Musa, umukozi wa Rurema.
E Nahano, tuyamiri tutuuziri imwawe,
mu bibusi byoshi.
2 Ikyanya utâli zaazi bumba imigazi, kandi iri ikihugo,
wâli koli yamiri ho.
3 Ugweti ugakizi galulira abandu mu luvu, mu kudeta:
«Ngahwe! Mushubire mu luvu.»
4 Mu masu gaawe, imyaka kihumbi iri mu ba nga lusiku luguma keera úlwalenga,
kandi iri nga kihande kiguma kyoꞌbushigi.
5 Uli mu kizi mala abandu, mu kubahuniza.
Bali mu ba nga kishuka kya shesheezi.
6 Kundu kiri mu ba kidohiri bweneene,
haliko kabigingwe, kiri mu ba keera kyaholoka, kinayume.
7 Uburaakari bwawe, buli mu tuleeza mweꞌkinyukura,
halinde tunahuumirwe ngana.
8 Ibyaha biitu, kundu byangabishamiri,
si wehe ubibwini byoshi-byoshi,
keera wabibiika ku bweranyange imbere lyawe.
9 Isiku ziitu zooshi, ziri mu mala mu buraakari bwawe,
na mu kigongeero.
10 Yizo siku ziitu, ziri mu hekera ku myaka makumi galinda.
Kandi iri twangaba tuli neꞌmisi, twangahisa kiri naꞌmakumi galimunaana.
Kundu kwokwo, mu yizo siku zooshi,
tuli mu longaga naaho amakuba, noꞌmwizingeerwe.
Ziri mu lenga duba, iri tunagenda.
11 Aaho! Nyandagi úwangasobanukirwa ngiisi kwoꞌburaakari bwawe bubambiri bweneene?
Yubwo buraakari bwawe, ngiisi kwo buli buhamu,
kwo na kwokwo abandu bakwiriiri bakizi kuyoboha bweneene.
12 Aaho! Utuyigirize ngiisi kwo tukwaniini ukukizi haruura isiku ziitu,
halinde tukizi ba bitegeereza.
13 E Nahano, si tulyagagi bakozi baawe!
Aahago! Ugayama uli mu turakarira halinde mangoki?
Ukizi tuyuvwirwa indengeerwa, maashi!
14 Ngiisi shesheezi, ukizi tuyereka urukundo lwawe úlutâye male,
lyo tukizi kuyimbira ku bushambaale.
15 Keera tukahisa imyaka mingi tutuuziri mu makuba.
Aaho! Utuheerezagye igindi ngeꞌyo, halinde tujeberere.
16 Bwo ugweti ugakizi gira amagambo gaꞌkahebuuza,
ukizi gayereka abakozi baawe.
Ukizi yerekana ubulangashane bwawe mu baana biitu.
17 E Rurema, Nahamwitu, ukizi tugashaanira.
Ngiisi byo tuli mu gira naꞌmaboko giitu, ukizi tusikamiza byo.
E waliha, irya mikolwa yaꞌmaboko giitu, ukizi gisikamya.