91
Nahano ye butibitiro bwani
1 Rurema ye riiri hiꞌgulu lya byoshi,
ye na mwene ubushobozi bwoshi.
Kwokwo, ngiisi úli mu langwa mu kabisho kaage,
agakizi luhuuka mu kimbehwa kyage.
2 Ngaadeta hiꞌgulu lya Nahano, ti:
«Wehe we butibitiro bwani, we na ndi mu sikamira mwo.
We Rurema wani,
unali we mbiisiri kwoꞌmulangaaliro.»
3 Ku kasiisa, Rurema agakukiza mu mibashu yaꞌbatezi,
anakukize na ku kyanya kyeꞌkiija.
4 Ee ma! Ayamiri ali mwemeera.
Kwokwo, aganakuvumbeera mu byubi byage.
Mu mashala gaage, mwo ugakizi tibitira,
halinde anabe siribo yoꞌkukizi kushuutira.
5 Ibyo bushigi, kundu biri mu teerana ikyoba,
haliko, utakizi biyoboha.
Utanayobohe, ikyanya imyambi igweti igashunguusibwa-shunguusibwa mwiꞌzuuba.
6 Ikyanya ikiija kiri mu yija kigatogeera mu kihulu, utakiyobohe.
Utanayobohe na kirya kiija íkiri mu yitana kalenge-renge.
7 Kundu abandu kihumbi bangagwa ha butambi lyawe,
kandi iri bandu bihumbi ikumi bangagwa uluhande lwawe lweꞌlulyo,
si wehe, bitagakuhika kwo.
8 Yibyo byoshi, ugabiyibonera naꞌmasu gaawe,
unabone ngiisi kwo banangora-mabi bagayiji hanwa.
9 Nahano ali hiꞌgulu lya byoshi, ye na butibitiro bwani.
Iri wangatuula mu kati kaage,
10 ndaabyo íbyangakuteera,
ndaanago makayu ágangaki yegeera ha nyumba yawe.
11 Mukuba, ngiisi ho uli mu genda,
Rurema agabwira abaganda baage kwo bakizi kulanga.
12 Banakusame,
gira amagulu gaawe gatayitimbe ku mabuye.
13 Ugakizi libata-libata ku ndare neꞌfuuhizi,
unakizi kandagira ku kihuume kyoꞌmujoka, na ku ndare ngulu.
14 Nahano adetaga kwokuno:
«Ngiisi úyamiri anguuziri, anabe asimbahiri iziina lyani,
ngamúkiza, na ngizi múlanga.
15 Ikyanya agandabaaza, ngamúyitaba.
Neꞌkyanya kyaꞌmakuba, tugayamanwa.
Ngamúguluula, ninamúgingike.
16 Ngamúheereza imyaka mingi, lyo akizi shagaluka.
Kwokwo, kwo ngamúkiza.»