8
وَلُّکِ تٛکُّٻٜ يٜىٰسُ غٛنْٻٜ اُرُشَلِيمَ
1 تٛو، بَنْدِرَاٻٜ اَمْ، جٛونِ اٜ مِنْ نغِطِ اَنْدٛنْ شَاحُ طُمْ اَللَّه حٛکِّ تٛکُّٻٜ يٜىٰسُ غٛنْٻٜ مَکِدٛونِيَ؞
2 کٛو ندٜ ٻٜ ڤٛوندِرَامَ تٛرَّ کَلُّکَ، طٛنْمَا اٜ ٻٜ ندٜرْ دُلّٜرٜ کَلُّندٜ، فُو اٜ نٛنْ وٜلْوٜلٛ مَٻّٜ مَنْغٛ وَطِي ٻٜ کٛکِّي بَلَّلْ مَنْغَلْ؞
3 مِ شٜيْدَکٜ ٻٜ کٛکِّي بَلَّلْ نٛ ٻٜ مبَاوِ حٛکُّکِ، حَا مَا کٛ ٻُرِ نٛنْ؞ ندٜرْ يِدّٜ ٻٜرْطٜ مَٻّٜ،
4 ٻٜ تٛرَکٜمِنْ نَاع سٜطَّ مِنْ اَلَٻٜ ٻٜ نغَطَ جُنْغٛ ندٜرْ کُوغَلْ وَلُّکِ يِمْٻٜ اَللَّه غٛنْٻٜ اُرُشَلِيمَ؞
5 ٻٜ نغَطِي کٛ ٻُرِ ݧُمٛ اَمِنْ؞ اَرَنْدٜ ٻٜ کٛکِّي جٛومِرَاوٛ کٛعٜ مَٻّٜ، ندٜنْ مِنٛنْ مَا ٻٜ کٛکِّيمِنْ کٛعٜ مَٻّٜ نٛ اَللَّه يِطِ؞
6 ندٜ تِيتُسْ فُطِّ کُوغَلْ حَوْرُتُکِ بَلَّلْ تٛ مٛوطٛنْ، مِنْ تٛرَکٜمٛ اٛ سٛعّٛو تٛ مٛوطٛنْ اٛ يٛتِّنَنغَلْ؞
7 تٛو، اٛنْ نغَطِي بٛطُّمْ ندٜرْ کٛو طُمٜ، وَاتٛ ندٜرْ حٛولَاکِ يٜىٰسُ، اٜ مٜتُکِ بٛطُّمْ، اٜ اَنْدُکِ غٛونغَ، اٜ يِدّٜ وَلُّکِ، اٜ يِدّٜ ندٜ نغِطّٛنْمِنْ؞ نٛنْ مَا اٜ مِنْ نغِطِ نغَطٛنْ بٛطُّمْ ندٜرْ نغَعَلْ کُوغَلْ وَلُّکِ؞
8 نَاع اٜ مِ وِعَ دٛولٜ نغَطّٛنْ نٛنْ؞ مِ حٛکُّعٛنْ حَبَرُ بَلَّلْ مَنْغَلْ نغَلْ وٛٻّٜ مبَلِّ نغَمْ مِ اَنْدَ کٛو يِدّٜ ندٜ نغِطّٛنْ وٛٻّٜ ندٜ غٛونغَ؞
9 نغَمْ اٛنْ اَنْدِ کٛ جٛومِرَاوٛ مٜىٰطٜنْ يٜىٰسُ اَلْمَسِيحُ وَطَنِعٛنْ نغَمْ يِدّٜ مَاکٛ؞ کٛو ندٜ اٛ دِسْکُطٛ، نغَمْ مٛوطٛنْ اٛ وَرْتِ مٛ وَلَنَا، نغَمْ لَاوٛلْ دُلّٜرٜ مَاکٛ نغَرْتٛنْ رِسْکُٻٜ؞
10 رَا شَاوٛرِ طُمْ کٛکَّيْمِعٛنْ دٛوْ فِي طُعُمْ؞ رٛوَنِ اٛنٛنْ اَرْتِ حٛکُّکِ بَلَّلْ، نَاع اٛنْ اَرْتُ حٛکُّکِ بَلَّلْ تَنْ، حَا مَا اٛنْ اَرْتِي يِطُکِ حٛکُّکِ بَلَّلْ نغَلْ؞
11 تٛو، جٛونِ سٜيْ نجٛتِّنٛنْ کُوغَلْ نغَلْ اٜ اِرِ ٻٜرْندٜ ندٜ ڤُطِّرْطٛنْغَلْ؞ کٛکّٜىٰ کٛ مبَاوٛتٛنْ حٛکُّکِ؞
12 نغَمْ تٛ اٛنْ نغٛودِ ٻٜرْطٜ حٛکُّکِ بَلَّلْ، اَللَّه جَٻَيْ کٛ کٛکُّطٛنْ؞ اَللَّه اٜ رَارَ کٛ نغٛودُطٛنْ، نَاع کٛ اٛنْ نغَلَا؞
13 کٛ نغِطُمِ وٛنِ نَاع تٛرّٛنْ کٛعٜ مٛوطٛنْ نغَمْ مبَلّٛنْ وٛٻّٜ، اَمَّا اٜ مِ يِطِ يِمْٻٜ فُو ڤٛتِّدَ؞
14 جٛونِ طُوطُکِ جَوْدِ مٛوطٛنْ وَلَّيْ وٛنْٻٜ ندٜرْ دُلّٜرٜ؞ يٜىٰسٛ طٛعٛ کَمْٻٜ مَا، ٻٜ مبَلَّعٛنْ ندٜرْ دُلّٜرٜ مٛوطٛنْ، نغَمْ کٛو طُمٜ فٛتِّدَنَ کٛو مٛيٜ؞
15 نٛنْ نٛ طُمْ وِنْدِرَا، «نٛکُّطٛ طُطُّمْ طُمْ طُوطَايِ؞ نٛکُّطٛ سٜطَّ، طُمْ فَمْطَايِ؞»
تِيتُسْ اٜ حِغٛوٻٜ مُوطُمْ
16 اَمَّا يٜتّٛورٜ تَبِّتَ تٛ اَللَّه غَطُطٛ تِيتُسْ وَرْتِ غِطّٛ وَلُّکِعٛنْ نٛنْ نٛ مِنْ نغِطِرِ وَلُّکِعٛنْ؞
17 نَاع نغَمْ مِنْ تٛرَکٜمٛ تَنْ وَطِ اٛ جَٻِ يَاکِ تٛ مٛوطٛنْ، اَمَّا کَنْکٛ اٜ حٛورٜ مَاکٛ سُٻِ يَحَ تٛ مٛوطٛنْ نغَمْ اٛ حَاٻِي اٛ وَلَّ؞
18 مِنْ لِلْدٛيَيْمٛ اٜ بَنْدِرَاوٛ مٜىٰطٜنْ مَنٜتٜىٰطٛ کٛو تٛيٜ تٛ تٛکُّٻٜ يٜىٰسُ کَوْرِتَتَ؞ اٜ مٛ مَنٜىٰ نغَمْ وَعَجِنْکِ حَبَرُ بٜلْطُمْ؞
19 نَاع کَنْجُمْ تَنْ، ٻٜ شُٻِيمٛ نغَمْ اٛ يَادَ اٜ اَمِنْ ندٜرْ يَادُ يَارُکِ بَلَّلْ نغَلْ طُمْ حَوْرِتَنِ تٛکُّٻٜ يٜىٰسُ غٛنْٻٜ اُرُشَلِيمَ؞ کَنْجُمْ وٛنِ کُوغَلْ بٛنْغَلْ نغَلْ مِنْ نغَطَتَ نغَمْ مَوْنِنْکِ جٛومِرَاوٛ، طٛنْمَا نغَمْ حٛلُّکِ نٛ مِنْ نغِطِرِ وَلُّکِ؞
20 اٜ مِنْ ندٛغَّ تٛع غٛطّٛ مٜتَ کَلُّکَ دٛوْ نٛ مِنْ کُوِرْتَ کُوغَلْ مَنْغَلْ نغَعَلْ نغَلْ مٛٻْتُکِ اٜ سٜنْدُکِ؞
21 اٜ مِنْ نغِطِ مِنْ نغَطَ کٛ حَانِ، نَاع يٜىٰسٛ جٛومِرَاوٛ تَنْ، اَمَّا حَا مَا اٜ يٜىٰسٛ يِمْٻٜ؞
22 طٛنْمَا مِنْ لِلْدٛيَيْٻٜ اٜ بَنْدِرَاوٛ مٜىٰطٜنْ، ندٜ طُطُّمْ مِنْ ڤٛوندِيمٛ مِنْ نغِعِي اٜ مٛ يِطِ وَلُّکِ اٜ طَتٜ طُطّٜ، اَمَّا جٛونِ اٛ ٻُرِي يِطُکِ وَلُّکِ نغَمْ اٜ مٛ حٛولِيعٛنْ نَاع سٜطَّ؞
23 تِيتُسْ، اٛ حِغٛ کُوغَلْ اَمْ، مِنْ اٜ مَاکٛ اٜ مِنْ کُودَ نغَمْ مٛوطٛنْ؞ بَنْدِرَاٻٜ مٜىٰطٜنْ جَادٛوٻٜ اٜ مَاکٛ، ٻٜ لِلَاٻٜ ندٜرْ تٛکُّٻٜ يٜىٰسُ اَلْمَسِيحُ، کُوغَلْ مَٻّٜ اٜ تٜدِّنَمٛ؞
24 نغَمْ نٛنْ، کٛلّٜىٰٻٜ يِدّٜ مٛوطٛنْ اٜ کٛ وَطَتَ اٜ مِنْ مَنْتِتٛرٛوعٛنْ، نغَمْ کَوْتٜ تٛکُّٻٜ يٜىٰسُ تَبِّتِنَ مَنْتٛرَاکِعٛنْ کِ مِنْ مَنْتٛرْتٛوعٛنْ طُمْ غٛونغَ؞