7
1 تٛو، بَنْدِرَاٻٜ اَمْ ٻٜ نغِطُمِ، ندٜ اٜنْ نغَطَنَامَ اَلْکَوَلْ دٛوْ فُو طُعُمْ، اٜنْ لَاٻِنْ کٛعٜ مٜىٰطٜنْ دَغَ کٛو طُمٜ غَطٛوجُمْ ٻَلِّ مٜىٰطٜنْ اٜ ٻٜرْطٜ مٜىٰطٜنْ نغَرْتَ کٛ لَاٻَا يٜىٰسٛ اَللَّه؞ اٜنْ نغَرْتُ ٻٜ سٜنَاکِ کٜىٰوُکِ، کُلٛوٻٜ اَللَّه؞
وٜلْوٜلٛ بُلُسْ
2 کٛولٜىٰمِنْ ندٜرْ يِدّٜ؞ مِنْ نغَطَنَايِ غٛطّٛ کٛ وٛوطَا، مِنْ مَجِّنَايِ غٛطّٛ، مِنْ پٛيْرَايِ غٛطّٛ نغَمْ مِنْ نجَٻَنَمٛ غٛطُّمْ؞
3 مِ وِعَايِ حَالَ کَعَ نغَمْ مِ يٛوَنَعٛنْ غٛطُّمْ کٛ وٛوطَا؞ مِ وِعِينٛعٛنْ اٜ مِنْ نغِطِعٛنْ نَاع سٜطَّ ندٜرْ ٻٜرْطٜ اَمِنْ کٛو اٜ مِنْ فٛوفَ کٛو ندٜرْ مَيْدٜ؞
4 مِ حٛولَکٜعٛنْ ٻٜرْندٜ غٛعٛ، اٜ مِ مَنْتٛرٛوعٛنْ نَاع سٜطَّ، اٛنْ شٜمْبِطِنِييَمْ نَاع سٜطَّ؞ فُو اٜ تٛرَّاجِ طِ مِنْ نجَرَتَ، وٜلْوٜلٛ اَمْ وَلَا کٜىٰرٛلْ؞
5 نغَمْ کٛ مِنْ نغَرِ لٜيْدِ مَکِدٛونِيَ، مِنْ کٜٻَايِ سِوْتَارٜ، اَمَّا کٛو تٛيٜ تٛ مِنْ نغَيْلِتٛرِي اٜ مِنْ تٛرّٜىٰ؞ مِنْ نغٜدّٛوتِرِي اٜ وٛٻّٜ، ندٜرْ ٻٜرْطٜ اَمِنْ کُلٛلْ نَنْغِمِنْ؞
6 اَمَّا اَللَّه بَلْتِنٛووٛ ٻٜرْطٜ غٛنْٻٜ ندٜرْ وَنَّارٜ، اٛ وَلْتِنِ ٻٜرْطٜ اَمِنْ اٜ غَرٛلْ تِيتُسْ؞
7 نَاع وَرْکِ مَاکٛ تَنْ وَلْتِنِ ٻٜرْطٜ اَمِنْ، اَمَّا حَبَرُ طُمْ اٛ حٛکِّمِنْ نٛ مبَلْتِنِرْطٛنْ ٻٜرْندٜ مَاکٛ؞ اٛ وِعِيمِنْ نٛ کَاٻِرْطٛنْ نغِعٛنْيَمْ، اٜ نٛ نغَنِّرْطٛنْ دٛوْ کٛ نغَطَنْطٛنْيَمْ، اٜ نٛ نغِطِرْطٛنْ وَلُّکِيَمْ؞ کَنْجُمْ ٻٜيْدَنِيَمْ وٜلْوٜلْتُکِ؞
8 کٛو تٛ طٜرٜوٛلْ نغٛلْ مبِنْدَنْمِعٛنْ وَطِي اٛنْ نَنِي شِيَ بٜلْطُمْ، طُمْ وَنَّايِيَمْ جٛونِ، کٛو ندٜ ندٜنّٛ مِ وَنِّي، نغَمْ مِ فَامِي طٜرٜوٛلْ نغٛلْ وَطِي اٛنْ نَنِي شِيَ بٜلْطُمْ ٻٜرْطٜ، کٛو ندٜ طُمْ شَرٜلْ سٜطَّ تَنْ؞
9 جٛونِ اٜ مِ نَنَ بٜلْطُمْ ندٜرْ ٻٜرْندٜ اَمْ، نَاع نغَمْ اٛنْ نَنَايِ بٜلْطُمْ، اَمَّا نغَمْ شِيَ نَنْکِ بٜلْطُمْ مٛوطٛنْ وَطِ تُوبُطٛنْ؞ نغَمْ شِيَ نَنْکِ بٜلْطُمْ کِنْ طُمْ اِرِ کِ اَللَّه يِطِ؞ نغَمْ نٛنْ مِنْ نغَطَنَايِعٛنْ کٛ وٛوطَا؞
10 نغَمْ شِيَ نَنْکِ بٜلْطُمْ اِرِ کِ اَللَّه يِطِ اٜ وَطَ نٜطّٛ تُوبَ حٜٻَ کِسْندَمْ؞ کِ وَطَتَا اٛ وِعَ، «دَا اٜ مِ اَنْدُنٛو،» اَمَّا شِيَ نَنْکِ بٜلْطُمْ اِرِ کِ دُونِيَارُ اٜ فٛوطَ مَيْدٜ؞
11 ندَارٜىٰ نغِعٛنْ کٛ شِيَ نَنْکِ بٜلْطُمْ مٛوطٛنْ وَدَّنِعٛنْ، کِ وَطِيعٛنْ اٛنْ نغَرْتِي تِيطُٻٜ، اٛنْ نغَرْتِي کَاٻُٻٜ کٛلَّ اٛنٛنْ نَاع اٛنْ غَطٛوٻٜ کٛ وٛوطَا، اٛنْ ٻٜرْنِي دٛوْ کٛ وٛوطَا، اٛنْ کُلْتٛرِي، اٛنْ کَاٻِي نغِعٛنْيَمْ، اٛنْ نغِطِي وَلُّکِيَمْ، اٛنْ کَاٻِي نغِعٛنْ طُمْ تَپَنِي غَطٛووٛ حَکّٜ کِيتَ؞ اٛنْ کٛلِّي اٛنْ نغَطِي کٛ حَانِ دٛوْ کٛ مبِنْدَنّٛومِعٛنْ؞
12 نغَمْ نٛنْ، کٛو ندٜ مِ وِنْدَنِينٛعٛنْ طٜرٜوٛلْ، نَاع نغَمْ نٜطّٛ غَطُطٛ کٛ وٛوطَا مبِنْدُمِنغٛلْ، کٛو نغَمْ نٜطّٛ غَطَنَاطٛ کٛ وٛوطَا، اَمَّا مِ وِنْدُنغٛلْ نغَمْ نغِعَنٛنْ غِتٜ مٛوطٛنْ نٛ نغِرُّطٛنْمِنْ يٜىٰسٛ اَللَّه؞
13 کَنْجُمْ وَلْتِنِ ٻٜرْطٜ اَمِنْ؞
کٛ ٻُرِ نٛنْ، وٜلْوٜلٛ نغٛ تِيتُسْ نَنِ مبٜلْنَنِيمِنْ ٻٜرْطٜ، نغَمْ اٛنْ فُو اٛنْ مبٜلْنَنِيمٛ ٻٜرْندٜ؞
14 مِ مَنْتٛرَکٜعٛنْ يٜىٰسٛ تِيتُسْ، اٛنٛنْ بٛو اٛنْ شٜمْتِنَايِيَمْ؞ نٛنْ نٛ کٛو طُمٜ طُمْ مِنْ مبِعِعٛنْ طُمْ غٛونغَ، نٛنْ مَا مَنْتٛرَاکِ کِ مِنْ مَنْتٛرِيعٛنْ يٜىٰسٛ تِيتُسْ تَبِّتِنَامَ طُمْ غٛونغَ؞
15 يِدّٜ ندٜ تِيتُسْ يِطِعٛنْ جٛونِ ٻُرِي ندٜ ندٜنّٛ، تٛ اٛ ݧُمِي نٛ تٛکِّرْطٛنْ کٛ طُمْ وِعِعٛنْ، اٜ نٛ نجَٻّٛرِيطٛنْمٛ ندٜرْ مَنْغُ اٜ فَامَنْکِ؞
16 اٜ مِ نَنَ بٜلْطُمْ نغَمْ اٜ مِ حٛولِيعٛنْ اٜ ٻٜرْندٜ غٛعٛ؞