طٜرٜوٛلْ اَرَنْدٜوٛلْ نغٛلْ بُلُسْ وِنْدَنِ
تَسَلٛونِکَنْکٛعٜنْ
حَبَرُ دٛوْ طٜرٜوٛلْ نغٛعٛلْ
بُلُسْ لِلَاطٛ يٜىٰسُ وِنْدِ طٜرٜوٛلْ نغٛعٛلْ؞ اٛ وِنْدَنْغٛلْ تٛکُّٻٜ يٜىٰسُ وٛنْٻٜ غَرِيرِ تَسَلٛونِکَ نغٛنْدِ ندٜرْ لٜيْدِ مَکِدٛونِيَ؞ اٜ طُمْ کَمّٛو بُلُسْ وِنْدِي طٜرٜوٛلْ نغٛعٛلْ حَکُّندٜ دُوٻِ 15-05 غَطَ دَݧْنغٛلْ يٜىٰسُ؞ اٛ وِنْدُنغٛلْ شَرٜلْ کٛ اٛ وٛنِ اٜ غَرِيرِ کٛرِنْتِ غَطَ اٛ رِيوَامَ دَغَ غَرِيرِ تَسَلٛونِکَ؞
اٛ وِنْدُنغٛلْ نغَمْ اٛ سٜمْبِطِنَ تٛکُّٻٜ يٜىٰسُ دٛوْ حٛولَارٜ مَٻّٜ؞ اٛ يٜتِّي اَللَّه نغَمْ حٛولَارٜ مَٻّٜ، اٜ حٛلُّکِ يِدّٜ حَکُّندٜ مَٻّٜ، اٜ وَطُکِ ٻٜرْندٜ مَٻّٜ دٛوْ اَلْمَسِيحُ؞ اٛ سٜمْبِطِنِ تٛکُّٻٜ يٜىٰسُ دٛوْ ݧَلْندٜ وَرْتٛيْکِ اَلْمَسِيحُ؞ اٛ اٜکِّتِنِيٻٜ نٛ ٻٜ نجٛوطٛرْتٛو اٜ نٛ ٻٜ نغَطِرْتَ کَ کُوغَلْ حَا يٜىٰسُ وَرْتٛيَ؞
1
1 مِنْ بُلُسْ اٜ سِيلَ اٜ تِمٛوتِ وِنْدِ طٜرٜوٛلْ نغٛعٛلْ؞ مِنْ مبِنْدَنْغٛلْ تٛکُّٻٜ يٜىٰسُ وٛنْٻٜ غَرِيرِ تَسَلٛونِکَ ٻٜ اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ جٜيِ؞
اَللَّه بَرْکِطِنَعٛنْ حٛکَّعٛنْ جَمْ؞
جٛنْدٜ تَسَلٛونِکَنْکٛعٜنْ اٜ حٛولَارٜ مَٻّٜ
2 کٛو ندٜيٜ اٜ مِنْ نغٜتَّ اَللَّه نغَمْ مٛوطٛنْ اٛنْ فُو، اٜ مِنْ نغَطَنَعٛنْ دٛعَارٜ؞
3 يٜىٰسٛ اَللَّه مٜىٰطٜنْ ݧَاکٛ مٜىٰطٜنْ مٛ دٛوْ، اٜ مِنْ ݧُمَ دٛوْ کُوطٜ مٛوطٛنْ طٜ حٛولَارٜ، اٜ نٛ يِدّٜ ندٜ نغٛودُطٛنْ وَطَتَعٛنْ اٛنْ کُوَ نَاع سٜطَّ، اٜ نٛ مُݧِرْتٛنْ ندٜرْ تٛرَّ نغَمْ کَمُّندٜ مٛوطٛنْ دٛوْ جٛومِرَاوٛ مٜىٰطٜنْ يٜىٰسُ اَلْمَسِيحُ؞
4 بَنْدِرَاٻٜ ٻٜ اَللَّه يِطِ، اٜ مِنْ اَنْدِ اَللَّه سُٻِيعٛنْ؞
5 نغَمْ حَبَرُ بٜلْطُمْ طُمْ مِنْ نغَدَّنِعٛنْ نَاع طُمْ بٛلِيطٜ تَنْ، اَمَّا اٜ طُمْ وٛودِ بَوْطٜ، اٜ رُوحُ اَللَّه، اٜ تَبِّتِنْکِ غٛونغَ مَاجُمْ؞ اٛنْ اَنْدِ اِرِ جٛنْدٜ ندٜ مِنْ نغَطِ حَکُّندٜ مٛوطٛنْ نغَمْ طُمْ نَفَنَعٛنْ؞
6 اٛنْ نغَرْتِي اٜکِّتٛتٛوٻٜ تٛ اَمِنْ اٜ تٛ جٛومِرَاوٛ، نغَمْ اٛنْ نجَٻِي وٛلْدٜ اَللَّه ندٜرْ وٜلْوٜلٛ نغٛ رُوحُ اَللَّه حٛکَّتَ، کٛو ندٜ اٛنْ نجَرِي تٛرَّ نَاع سٜطَّ؞
7 نٛنْ نغَرْتِرْطٛنْ کٛ فُو تٛکُّٻٜ يٜىٰسُ وٛنْٻٜ لٜيْدِ مَکِدٛونِيَ اٜ اَکَايَ اٜکِّتٛتٛو؞
8 نغَمْ دَغَ تٛ مٛوطٛنْ وٛلْدٜ جٛومِرَاوٛ حٜٻِ سَنْکِتَاکِ نَاع اٜ لٜيْدِ مَکِدٛونِيَ اٜ اَکَايَ تَنْ، اَمَّا کٛو تٛيٜ طُمْ اَنْدِي حٛولَارٜ مٛوطٛنْ دٛوْ اَللَّه؞ نغَمْ نٛنْ نَاع سٜيْ تٛ مِنْ مبِعِي غٛطُّمْ دٛوْ مَاجُمْ؞
9 نغَمْ کَمْٻٜ اٜ کٛعٜ مَٻّٜ کٛکَّتَ حَبَرُ نٛ نجَٻّٛرِيطٛنْمِنْ کٛ مِنْ نغَرِ تٛ مٛوطٛنْ؞ ٻٜ کٛکِّيمِنْ حَبَرُ نٛ اَلِرْطٛنْ تٛکُّکِ غُنْکِيجِ نغَرْتُطٛنْ تٛ اَللَّه، نغَمْ کُوَنٛنْ اَللَّه مٛ يٛنْکِ مٛ غٛونغَ،
10 ندٜنْ کٜطٛوطٛنْ وَرْتٛيْکِ ٻِطّٛ مَاکٛ دَغَ دٛوْ، مٛ اٛ اُمِّنِ دَغَ مَيْدٜ، وَاتٛ يٜىٰسُ کِسْنَيْطٛعٜنْ دَغَ مٛنّٜرٜ اَللَّه غَرَيْندٜ؞